عوامی مسلم لیگ کے سربراہ اور سابق وفاقی وزیر داخلہ شیخ رشید نے کہا ہے کہ اداروں سے کسی صورت محاذ آرائی نہیں چاہتے لیکن اگر لڑائی ہوئی تو اس جنگ میں عمران خان کے ساتھ ہوں گے۔
غیر ملکی نیوز ویب سائٹ کو انٹرویو دیتے ہوئے شیخ رشید نے کہا کہ سابق حکومت کی اداروں کے ساتھ بعض غلط فہمیاں پیدا ہو گئی تھیں جو کہ نہیں ہونی چاہئیں تھیں، فوج جمہوری حکومت کے ساتھ ہوتی ہے لیکن کچھ نہ کچھ ایسا ہوا کہ اتحادی جماعتیں ساتھ چھوڑ کر حزبِ اختلاف کے ساتھ جا ملی تھیں۔
سابق وفاقی وزیر کا کہنا تھا کہ لڑائی کے حق میں نہیں اور اب بھی چاہتے ہیں کہ ان کی صلح ہوجائے، رواں ہفتے اس کا آغاز کیا ہے تاہم اس پر تاحال کوئی جواب موصول نہیں ہوا، قبل از وقت عام انتخابات کے انعقاد کے لیے عمران خان حکومت کے ساتھ بات چیت کے لیے تیار ہیں، لیکن اس کے لیے ضروری ہوگا کہ مقتدر قوتیں ضامن بنیں۔
انہوں نے کہا کہ لانگ مارچ کا مقصد ملک میں مارشل لاء کا نفاذ نہیں بلکہ اس کا مقصد جلد انتخابات کا اعلان ہے، فوج ملک میں جمہوریت کا تسلسل برقرار رکھنا چاہتی ہے، جمہویت قائم رکھنے کا ایک ہی راستہ ہے کہ قبل از وقت انتخابات کرائے جائے، بصورتِ دیگر نہ ہم رہیں گے اور نہ حکومت۔
ان کا کہنا تھا کہ اگر عمران خان کے اعلان پر اسلام آباد میں ایک بڑا اجتماع ہوگیا تو پھر ان کی سیاست چھا جائے گی، عام انتخابات کی تاریخ لیے بغیر لانگ مارچ کے شرکا اسلام آباد سے واپس نہیں جائیں گے۔

خادم الحرمین الشریفین شاہ سلمان بن عبدالعزیز آلسعود نے عیدالفطر پر عالم اسلام کو مبارکباد پیش کی ہے۔
اپنے تہنیتی پیغام میں خادم الحرمین الشریفین نے کہا کہ اللہ نےماہ مقدس کےروزہ ،راتوں کے قیام کا موقع نصیب فرمایا اللہ نےہمیں پھرعبادت اور قربت کا عظیم موقع دیا۔
شاہ سلمان بن عبدالعزیز آلسعود نے کہا کہ اللہ پورے عالم اسلام کے ماہ صیام کے روزے، عبادات کوقبول فرمائے۔
شاہ سلمان نے اپنے پیغام میں عالم اسلام پر اپنی صفوں میں اتحاد پیدا کرنےکی تلقین کی اور مظلوم کی حمایت ، بےسہارا لوگوں کی مدد کی بھی تلقین کی۔
مسجد الحرام اور مسجد نبویﷺ میں نماز عید الفطر ادا کردی گئی، خادم حرمین شریفین شاہ سلمان بن عبدالعزیز سمیت سعودی قیادت اور شاہی خاندان کے افراد نے بھی مسجدالحرام میں نماز عید ادا کی۔
خادم حرمین شریفین شاہ سلمان بن عبدالعزیز سمیت سعودی قیادت اور شاہی خاندان کے افراد نے بھی مسجدالحرام میں نماز عید ادا کی، اس موقع پر سیکیورٹی کے انتہائی سخت انتظامات کیے گئے تھے۔
دوسری جانب متحدہ عرب امارات اورخلیجی ممالک میں عیدالفطر آج روایتی جوش وجذبے کے ساتھ منائی جارہی ہے، برطانیہ اورفرانس میں بھی آج عید منائی جائے گی جبکہ امریکااورکینیڈا میں مقیم مسلمان بھی مسلم کلینڈر کے مطابق دو مئی کوہی عید منائیں گے۔

پاکستان علما کونسل کے چیئرمین مولانا طاہر اشرفی نے کہا ہے کہ مسجد نبویؐ کا واقعہ منصوبہ بندی سے کیا گیا۔
پریس کانفرنس کرتے ہوئے مولانا طاہر اشرفی کا کہنا تھا کہ مسجد نبویؐ کا واقعہ انتہائی افسوسناک اور قابل مذمت ہے، پاکستان علما کونسل واقعہ کے ذمہ داران کےخلاف کارروائی کا مطالبہ کرتی ہے۔
انہوں نے مزید کہا کہ سعودی حکومت اپنے قوانین کےمطابق واقعہ کی تحقیقات کر رہی ہے، ذمہ داران کے خلاف کارروائی کی جائے، مسجد نبوی ﷺ کا واقعہ افسوسناک اور قابل مذمت ہے۔

خاتون اور چار بچوں کو قتل کرنیوالے قاتل کو گرفتارکرلیا گیا، قاتل مقتولہ کے شوہر کا بھتیجا نکلا۔
گزشتہ روز کوئٹہ سے جنوب مغرب میں 25 کلو میٹر دور کچلاک کے علاقے کلی پوٹی ناصران میں قتل کی لرزہ خیز واردات سامنے آئی تھی، جہاں نامعلوم ملزمان نے تیز دھار آلے سے ایک خاتون اور اس کے چاربچوں کو بے دردی سے تیز دھار آلے کے ساتھ ذبح کرکے قتل کردیا تھا، تاہم ڈپٹی کمشنر پشین کے مطابق قاتل کو گرفتار کرلیا گیا ہے۔
ڈپٹی کمشنر پشین نے پریس کانفرنس میں لرزہ خیز واردات کے حوالے سے بتایا کہ بوستان میں خاتون اور چار بچوں کو قتل کرنے والا قاتل گرفتارکرلیا گیا ہے، قاتل مقتولہ کے شوہر کا بھتیجا ہے، جس کی عمر 20 سال اور نام محمود اللہ ہے۔ ملزم محمود اللہ واردات کے بعد افغانستان فرار ہو گیا تھا اور ایک روز بعد ہی دوبارہ واپس آیا تو اسے گرفتار کرلیا گیا۔
ڈپٹی کمشنر پشین نے انکشاف کیا کہ قاتل محمود اللہ نے ابتدائی تفتیش میں اعتراف جرم کرتے ہوئے بتایا کہ مقتولہ کے شوہر حکمت اللہ نے دو شادیاں کررکھی ہیں، اور قتل کی اس لرزہ خیز واردات میں اس کی دوسری بیوی بھی شامل ہے، واردات کے دوران مقتولہ سکینہ بی بی نے مزاحمت کرکے قاتلہ کو زخمی بھی کیا تھا۔

جہانگیرہ اسٹیشن روڈ کے علاقے میں 3 بچے واٹر ٹینک میں گر کر جاں بحق ہوگئے۔
پشاور ڈویژن کے ضلع نوشہرہ کے علاقہ جہانگیرہ اسٹیشن روڈ کے علاقے میں پانی کی ٹینکی میں گر کر 3 بچے جاں بحق ہوگئے،بچوں کی شناخت 6 سالہ بلال عمر، 4 سالہ بچی فجر عمر اور 3 سالہ مدثر عمر کے نام سے ہوئی۔
ریسکیو حکام کے مطابق جہانگیرہ اسٹیشن روڈ کے مقام سے کنٹرول روم کو تین بچوں کے واٹر ٹینکی میں گرنے کی اطلاع ملی، اطلاع ملتے ہی ریسکیو اسٹیشن 33 اکوڑہ خٹک سے میڈیکل ٹیم بمع ایمبولینس روانہ ہوگئی تاہم بچے پانی میں ڈوب کر جاں بحق ہوچکے تھے۔
جاں بحق ہونے والے تینوں بچے آپس میں بہن بھائی تھے۔

پارٹی کی نائب صدر مریم نواز کے جلسوں کے لیے مسلم لیگ (ن) نے تیاریاں شروع کردیں، عوامی رابطہ مہم کے تحت پنجاب اور خیبرپختونخوا میں جلسوں کا شیڈول جاری کردیا۔
ذرائع کے مطابق مریم نواز مئی کے آخری ہفتے میں بہاولپور میں بڑا جلسہ کریں گی، مریم نواز 6 مئی کو اٹک، 8 مئی کو اوکاڑہ اور 11 مئی کو صوابی میں جلسے کریں گی۔
انہوں نے بتایا کہ مریم نواز سینٹرل پنجاب، جنوبی پنجاب اور کے پی کے میں جلسے اور مریم نواز عید کے بعد عوامی رابطہ مہم کی قیادت کریں گی۔
ذرائع کے مطابق مسلم لیگ (ن) کی عوامی رابطہ مہم عید الفطر کے فوری بعد شروع کی جائے گی، پاکستان مسلم لیگ (ن) کا عوامی رابطہ مہم شروع کرنے کا فیصلہ کیا ہے۔