لاہور: (ویب ڈیسک) سروں کے سلطان، عالمی شہرت یافتہ گائیک استاد راحت فتح علی خان آج اپنی 48 ویں سالگرہ منا رہے ہیں۔
راحت فتح علی خان 9 دسمبر 1974 کو فیصل آباد میں پیدا ہوئے اور ان کو والد فرخ فتح علی خان اور نصرت فتح علی خان کے ساتھ بچپن سے ہی قوالی کی تربیت حاصل کرنے کا موقع ملا۔
عالمی شہرت یافتہ گائیک اب تک سینکڑوں قوالیاں، گیت اورغزلیں گا چکے ہیں اور ان کے گائے گیت اور غزلیں عوام میں بے حد مقبول ہیں۔
پاکستان بھر میں ان کی شہرت کے بعد ہمسایہ ملک بھارت نے بھی ان کی آواز سے فائدہ اٹھایا، بھارتی فلم پاپ میں ان کی آواز میں گایا گیت “من کی لگن ” نے بے پناہ شہرت حاصل کی۔
راحت فتح علی خان اب تک کئی ڈراموں اور فلموں کے ٹائٹل سونگ بھی گا چکے ہیں اور انہوں نے متعدد ملی نغمے بھی گائے ہیں۔
2019 میں آکسفورڈ یونیورسٹی کی جانب سے انہیں موسیقی کے شعبے میں اعزازی طورپر پی ایچ ڈی کی ڈگری سے نوازا گیا جبکہ وہ اب تک متعدد ملکی اور غیر ملکی ایوارڈز جیت کر ملک وقوم کا نام روشن کر چکے ہیں۔

لاہور : (ویب ڈیسک) پاکستان کی معروف اداکارہ سارہ لورین نے کراچی کو ممبئی سے زیادہ رومانوی اور خوبصورت قرار دے دیا۔
نجی چینل کو دیئے گئے ایک انٹرویو میں سارہ لورین کا کہنا تھا کہ روشنیوں کا شہر کراچی بھارتی فلمی مرکز ممبئی سے زیادہ رومانوی اور خوبصورت ہے،میں خود بھی بہت رومانوی ہوں۔
انٹرویو کےدوران اداکارہ نے ممبئی اور کراچی کے رومانس بارے سوال پر جواب دیتے ہوئے کہا کہ ہمارے شہر کراچی میں پہلے ہی بہت زیادہ رومانس موجود ہے اس لئے مجھے ممبئی کے رومانس کو یہاں لانے کی ضرورت نہیں۔
اپنی اردو فلکس سیریز “ملائکہ انکاؤنٹر ” کے بارے بات کرتے ہوئے سارہ لورین کا کہنا تھا کہ سیریز میں کراچی کے منفرد دلکش اور رومانوی برانڈ کو پیش کروں گی۔
معروف اداکارہ نے اپنے مداحوں کو خصوصی پیغام دیتے ہوئے کہا کہ وہ انکی نئی سیریز لازمی دیکھیں کیونکہ اس میں ان کے لئے مزہ ہوگا۔

جدہ : (ویب ڈیسک) بھارتی فلم انڈسٹری کے معروف اداکار رنبیرکپور نے پاکستانی فلم ”دی لیجنڈز آف مولا جٹ ” کی شاندار کامیابی پر پاکستان سینما انڈسٹری کو مبارکباد پیش کردی۔
بالی ووڈ سپر سٹار رنبیر کپور کئی ماہ سے عوام کی نظروں سے اوجھل تھے اور وہ بیٹی کی پیدائش کے بعد پہلی بار اس وقت سامنے آئے جب انہوں نے جدہ میں جاری ریڈ سی انٹرنیشنل فلم فیسٹیول میں شرکت کی۔
ریڈ سی فلم فیسٹیول کی تقریب کے بعد اداکار رنبیر کپور نے صحافیوں سے گفتگو کرتے ہوئے پاکستانی سینما انڈسٹری میں تاریخ رقم کرنے والی فلم دی لیجنڈز آف مولا جٹ کی تعریف کی اور فلم کی مقبولیت پرفلم کی ٹیم کے ساتھ پاکستان سینما کو مبارکباد پیش کی۔
فوٹو اینڈ ویڈیو شیئرنگ ایپ انسٹاگرام پر رنبیر کپور کی ایک ویڈیو وائرل ہے جس میں ایک صحافی اداکار سے پوچھتا ہے کہ کیا آپ پاکستانی اداکاروں اور فلم سازوں کے ساتھ کام کریں گے؟، پاکستانی فنکاروں پر 2016 سے بھارت میں کام کرنے پر پابندی ہے ۔
رنبیر کپور نے صحافی کے سوال پر جواب دیتے ہوئے کہا کہ آرٹ کی کوئی سرحد نہیں ہوتی اور میں یقینی طور پر پاکستانی فنکاروں کے ساتھ کام کروں گا۔
اداکار کا کہنا تھا کہ درحقیقت، میں پاکستانی سنیما کو مولا جٹ کی زبردست کامیابی پر مبارکباد دینا چاہوں گا، میں معروف گلوکار عاطف اسلم کی آواز کا بھی مداح ہوں اور جب وہ گاتے ہیں تو یہ کسی ہیرو کے گانے کی طرح ہوتا ہے۔