ریاض: (ویب ڈیسک) چین اور سعودی عرب کے درمیان توانائی، ٹرانسپورٹ، کان کنی، لاجسٹک خدمات، آٹو انڈسٹری، طبی نگہداشت، انفارمیشن ٹیکنالوجی سمیت 35 شعبوں میں تعاون کے معاہدے ہو گئے۔
سعودی خبررساں ادارے کے مطابق سعودی فرمانروا شاہ سلمان بن عبدالعزیز سے ریاض کے قصر یمامہ میں چینی صدر نے ملاقات کی اس موقع پرسعودی ولی عہد و وزیر اعظم شہزادہ محمد بن سلمان بھی موجود تھے۔
دونوں سعودی رہنماؤں نے چینی صدر شی جن پنگ اوران کے وفد کو سعودی عرب میں خوش آمدید کہا، ملاقات کے موقع پر سعودی عرب اورچین کی تاریخی دوستی کا جائزہ لیا گیا اورمختلف شعبوں میں تعلقات کو مضبوط بنانے کے حوالے سے تبادلہ خیال کیا گیا۔
چینی صدر کے دورہ ریاض کے موقع پردارالحکومت میں دونوں ملکوں کے اداروں کے درمیان مختلف شعبوں میں 35 معاہدے کیے گئے۔ فریقین نے مفاہمتی یاداشتوں پربھی دستخط کیے۔ ان میں توانائی، ٹرانسپوٹ، کان کنی، لاجسٹک خدمات، آٹو انڈسٹری، طبی نگہداشت، انفارمیشن ٹیکنالوجی جیسے اہم شعبے شامل ہیں۔
میڈیا رپورٹس کے مطابق معاہدوں سے دونوں ملکوں کے اقتصادی وسرمایہ کاری کے رشتوں کے استحکام میں مدد ملے گی جبکہ سعودی ویژن 2030 کے اہداف بھی حاصل ہوں گے۔
سعودی وزارت سرمایہ کاری نے 3 مفاہمتی یادداشتوں پردستخط کیے، ایک کے تحت المونیم انڈسٹریل کمپلکس قائم کیاجائے گا۔ دوسری مفاہمتی یاداشت پیٹرو کیمیکل کے شعبے میں امدادی صنعتوں کے استحکام سے ہے جبکہ تیسری مفاہمتی یادداشت ٹیکنالوجی کے فروغ ریسرچ اورمیڈیکل آلات کی مملکت میں تیاری کے بارے میں ہے۔
سعودی حکومت نے چین کی تین کمپنیوں کے ساتھ رہائشی امور میں بھی تین مفاہمتی یادداشتیں کیں ان میں سے ہرایک کے تحت چین کی شراکت سے ایک لاکھ مکان تعمیر کیے جائیں گے۔

نیویارک: (ویب ڈیسک) روس نے منشیات کیس میں سزا پانے والی امریکی خاتون باسکٹ بال اسٹار برٹنی گرائنرکو روسی اسلحہ ڈیلر کے بدلے میں رہا کردیا۔
امریکی صدر جوبائیڈن نے برٹنی گرائنر کے بدلے روسی اسلحہ ڈیلر وکٹر بوٹ کی رہائی کی تصدیق کی ہے۔
وائٹ ہاؤس میں خطاب کرتے ہوئے امریکی صدرکا کہنا تھا کہ برٹنی گرائنر روسی جیل سے رہا ہوگئی ہیں، وہ ٹھیک ہیں اور گھر واپس آرہی ہیں۔
امریکی حکام کے مطابق صدر بائیڈن اور نائب صدر کاملہ ہیرس نے امریکی کھلاڑی سے فون پر بات بھی کی۔
غیر ملکی میڈیا کے مطابق روس میں 10 ماہ کی قید سے رہائی کے بعد 32 سالہ برٹنی گرائنر متحدہ عرب امارات پہنچیں گی جہاں سے وہ امریکا کے لیے پرواز میں سوار ہوں گی۔
خیال رہے کہ دو مرتبہ کی اولمپک گولڈ میڈلسٹ برٹنی گرائنر کو رواں سال فروری میں ویمن نیشنل باسکٹ بال ایسوسی ایشن کی جانب سے روس میں ہونے والے مقابلوں میں شرکت کے وقت روسی حدود میں ممنوعہ منشیات( ہشیش آئل) لانے کے الزام میں گرفتار کیا گیا تھا۔
اگست میں روسی عدالت نے انہیں 9 سال سزا کے ساتھ 1 ملین روبل (تقریباً 16 ہزار 990 ڈالر) جرمانہ بھی عائد کیا تھا۔
برٹنی گرائنر کو روسی عدالت کی جانب سے سزا کو امریکی صدر جو بائیڈن نے ناقابل قبول فیصلہ قرار دیا تھا۔
اگست میں برٹنی گرائنر کی جانب سے سزا کے خلاف اپیل کی گئی تھی جسے عدالت نے مسترد کردیا تھا، خاتون کھلاڑی نے روسی عدالت میں اعتراف کیا تھا کہ ان کا کوئی ممنوعہ چیز روس لانے کا ارادہ نہیں تھا، ڈاکٹر کے نسخے پر انہوں نے مذکورہ چیز اپنے ساتھ رکھی تھی۔
برٹنی گرائنرکی رہائی کے بدلے امریکا نے روسی اسلحہ ڈیلر وکٹر بوٹ کو رہا کیا ہے جسے امریکا نے ایک اسٹنگ آپریشن میں 2008 میں تھائی لینڈ سےگرفتارکیا تھا، وکٹر بوٹ پر اسلحہ کی غیرقانونی فروخت کا الزام تھا۔
غیر ملکی خبر ایجنسی کے مطابق سابق سوویت آرمی کے لیفٹننٹ کرنل وکٹر بوٹ کو 2012 میں امریکی عدالت نے 25 برس قیدکی سزا سنائی تھی، اس پرکروڑوں ڈالرکا اسلحہ فروخت کرنے کی سازش کا الزام تھا جس کے متعلق امریکی حکام کا دعویٰ ہے کہ یہ مبینہ اسلحہ امریکیوں کے خلاف استمعال ہونا تھا۔
55 سالہ وکٹر بوٹ پر یہ بھی الزام تھا کہ اس نے سیرالیون سے لےکر افغانستان تک اسلحے کی فروخت کے معاہدے کروائے اور تشدد میں کردار ادا کیا۔
وکٹر بوٹ طویل عرصے تک امریکا کو مطلوب تھا امریکی محکمہ انصاف نے اسے اسلحے کا سب سے بڑا ڈیلر قرار دیا تھا اور مغربی میڈیا میں اسے موت کا سوداگر بھی قرار دیا گیا تاہم اپنی گرفتاری کے آغاز سے ہی وکٹر بوٹ نے خود کو بے قصور قرار دیا ہے۔

گجرات: (ویب ڈیسک) بھارتی ریاست گجرات کے ریاستی انتخابات میں بھارتی وزیراعظم مودی کی جماعت بھارتیہ جنتا پارٹی نے اکثریت حاصل کر لی جبکہ ریاست ہماچل پردیش میں کانگریس نے بی جے پی کو ہرا دیا۔
بھارتی میڈیا کے مطابق گجرات میں ریاستی اسمبلی کے انتخابات میں بھارتیہ جنتا پارٹی نے 156 نشستوں پر برتری حاصل کرلی، اپوزیشن جماعت کانگریس کو 17 اور عام آدمی پارٹی کو 5 نشستوں پر کامیابی ملی۔
کامیابی کے بعد بی جے پی نے گجرات کے وزیراعلیٰ بھوپندرا پٹیل کو دوسری مدت کے لیے وزیراعلیٰ بنانے کا فیصلہ کیا ہے۔
گجرات میں بھارتی وزیراعظم مودی کی جماعت 1995 سے مسلسل کامیابی حاصل کر رہی ہے، نریندرمودی 2014میں بھارتی وزیراعظم بننے سے پہلے 13 سال گجرات کے وزیراعلیٰ رہے تھے۔
دوسری طرف ہماچل پردیش میں ہونے والے انتخابات میں کانگریس نے 40 نشستوں کے ساتھ کامیابی حاصل کرتے ہوئے بی جے پی کو مات دی، بی جے پی 25 نشستیں لے کر دوسرے نمبر پر ہے جبکہ 3 نشستیں آزاد امیدواروں کو ملیں۔