مظفرآباد: (ویب ڈیسک) آزاد کشمیر میں بلدیاتی انتخابات کے غیر سرکاری غیر حتمی نتائج آنے کا سلسلہ جاری ہے، بلدیاتی انتخابات کے دوسرے مرحلے میں باغ اور سدھنوتی کے اضلاع میں پاکستان تحریک انصاف نے میدان مار لیا۔
رپورٹ کے مطابق پونچھ اور حویلی اضلاع میں پی ٹی آئی کو شکست کا سامنا کرنا پڑا، غیر سرکاری اور غیر حتمی نتائج کے مطابق آزاد کشمیر کے ضلع باغ میں پاکستان تحریک انصاف نے میونسپل کارپوریشن کی 15 میں سے 9 نشستیں حاصل کیں جبکہ آزاد امیدواروں نے 4 اور پاکستان پیپلزپارٹی 2 نشستیں جیت سکی۔
دوسری جانب پاکستان تحریک انصاف ضلع باغ میں اپنا کونسل چیئرمین منتخب کرانے کے لئے تیار تھی جہاں کُل 28 نشستوں میں سے پی ٹی آئی نے تقریباً 12 نشتیں حاصل کیں جبکہ پاکستان مسلم کانفرنس (ایم سی) نے 4، پاکستان پیپلزپارٹی نے 3 اور پاکستان مسلم لیگ (ن) اور آزاد امیدواروں نے 2، 2 نشتیں حاصل کیں اور آزاد کشمیر جمعیت اسلام ایک نشست حاصل کرنے میں کامیاب رہی، اس کے علاوہ 4 نشستوں کے نتائج آنا باقی ہے۔
غیر سرکاری نتائج کے مطابق سدھنوتی ضلع کونسل کی 19 نشستوں میں سے پاکستان تحریک انصاف نے 11، مسلم لیگ (ن) نے 4، آزاد امیدواروں نے 2 اور آزاد کشمیر جمعیت علمائے اسلام نے ایک نشست حاصل کی جبکہ مزید ایک نشست کے نتائج کا اعلان ہونا ابھی باقی ہے۔
ڈسٹرکٹ ہیڈ کوارٹرز میونسپل میں پی ٹی آئی نے 8 میں سے 5 نشستیں حاصل کیں جبکہ آزاد امیدواروں نے 2 اور (ن) لیگ ایک نشست حاصل کرنے میں کامیاب رہی۔
غیر سرکاری اور غیر حتمی نتائج کے مطابق ضلع حویلیاں میں (ن) لیگ 12 میں سے 6 ضلع کونسل کی نشستیں جیت سکی، پیپلز پارٹی نے 4 اور پی ٹی آئی نے ایک نشست حاصل کی جبکہ ایک نشست کے نتائج واضح نہیں ہوسکے۔
ضلع پونچھ کے شہر راولاکوٹ میں 22 رکنی میونسپل کارپوریشن میں جموں کشمیر پیپلز پارٹی (جے کے پی پی) 7 نشستیں جیت سکی، اس کےعلاوہ پاکستان پیپلزپارٹی نے 4 ، مسلم لیگ (ن) اور پی ٹی آئی نے 3 ،3 اور آزاد امیدواروں نے5 نشستیں حاصل کیں۔
اس کے علاوہ ضلع پونچھ کے 29 رکنی کونسل میں پی ٹی آئی اور مسلم لیگ (ن) نے 8، 8 نشستیں حاصل کیں، پاکستان پیپلزپارٹی نے 6، جموں کشمیر پیپلز پارٹی (جے کے پی پی) نے5 اور آزاد امیدوار 2 نشستیں جیت سکے۔
قبل ازیں حکام نے بتایا تھا کہ پولنگ کے عمل کے دوران تشدد کے واقعات رپورٹ ہوئے جن میں ایک درجن سے کم لوگ متاثر ہوئے تھے۔
وزیراعظم سردار تنویر الیاس نے ڈسٹرکٹ کونسلر کے عہدے کے لیے یوسی بنگوئن میں اپنے آبائی علاقے ڈھکی پولنگ اسٹیشن میں ووٹ کاسٹ کیا۔
انہوں نے کہا کہ مجھے خوشی ہے کہ ریاست ایک ایسے عمل سے گزر رہی ہے جس کا مقصد انتخابات کے ذریعے اقتدار کو نچلی سطح تک منتقل کرنا ہے۔

لاہور : (ویب ڈیسک) وزیراعلی پنجاب چودھری پرویز الہٰی نے سندھ کے ثقافتی دن پر اہل سندھ کو مبارکباد پیش کی ہے ۔
وزیراعلیٰ پنجاب چودھری پرویز الہٰی نے سندھ کے ثقافتی دن کے موقع پر خصوصی پیغام میں کہا کہ سندھ کا ثقافتی دن ایکتا جو دھارو مقبول عام ثقافتی تہوار ہے، سندھی ثقافت مہمان نوازی، رواداری اور محبت کے جذبوں سے مالا مال ہے۔
انہوں نے کہا کہ سندھ کی ثقافت دلکش روایات کی امین ہے، یونیسکو کی فہرست میں شامل موہنجوداڑو اور مکلی کی ثقافت دنیا بھر میں پسند کی جاتی ہے۔
وزیراعلٰی پنجاب پرویز الٰہی کا کہنا تھا کہ اجرک کے رنگوں کی طرح سندھ کی ثقافت بھی دلکش امتزاج کی حامل ہے اور سچل سرمست، عبداللہ شاہ غازی اور لعل شہباز قلندر جیسے عظیم صوفیا کرام کی محبتوں سے مالا مال ہے۔
انہوں نے کہا کہ اخوت اور رواداری پر مبنی سندھی ثقافت کا حسن سب سے جدا ہے۔

اوکاڑہ: (ویب ڈیسک) اوکاڑہ کے تھانہ صدر کی حدود میں پولیس مقابلہ میں دو ڈاکو ہلاک جبکہ ان کے دو ساتھی فرار ہوگئے۔
پولیس کے مطابق تھانہ صدر کی حدود میں چار ڈاکو واردات میں مصروف تھے کہ پولیس پہنچ گئی، اس دوران پولیس اور ڈاکوؤں کے درمیان فائرنگ کا تبادلہ ہوا، گولیاں لگنے سے دو ڈاکو موقع پر ہلاک جبکہ ان کے دو ساتھی اندھیرے کا فائدہ اٹھا کر فرار ہوگئے۔
ڈی پی او اوکاڑہ فرقان بلال کا کہنا ہے کہ پولیس نے پورے علاقے کو گھیرے میں لے کر ملزمان کی تلاش شروع کر دی ہے جن کو بہت جلد گرفتار کر لیا جائے گا۔

اسلام آباد : (ویب ڈیسک) قومی ادارہ صحت ( این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 6 ہزار 704 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 6 ہزار 704 کورونا ٹیسٹ کئے گئے جن میں سے 17 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.25 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 24 مریضوں کی حالت تشویشناک ہے۔

لاہور : (ویب ڈیسک) پنجاب کے بیشتر علاقوں میں شدید دھند کا راج ہے، ملانوالی میں دھند کے باعث ڈمپر مکان سے ٹکرا گیا جس کے نتیجے میں 2 افراد زخمی ہوگئے۔
موٹروے پولیس کے مطابق لاہور سے سیالکوٹ اور ایم 1 برہان سے صوابی تک شدید دھند کے باعث ہر قسم کی ٹریفک کیلئے بند کردی گئی ہے۔
موٹروے حکام کا کہنا ہے کہ ایم ٹو لاہور سے کوٹ مومن، ایم تھری کو فیض پور سے درخانہ ، ایم 4 پنڈی بھٹیاں سے درخانہ جبکہ اوچ شریف موٹر وے ایم 5 ظاہر پیر سے شیر شاہ تک بند کردی گئی ہے۔
حکام نے عوام سے اپیل کی ہے کہ دھند کے موسم میں غیرضروری سفر سے گریز کریں جبکہ گاڑیوں میں فوگ لائٹس کا استعمال کریں۔
پولیس کا کہنا ہے کہ دھند کے موسم میں گاڑیوں میں درمیانی فاصلہ عام حالات کی نسبت زیادہ رکھیں ۔