راولپنڈی: (ویب ڈیسک) سربراہ عوامی مسلم لیگ اور سابق وزیر داخلہ شیخ رشید نے کہا ہے کہ ملک معاشی طور پر تباہ اور اقتدار کے بھوکوں کا جمعہ بازار لگا ہوا ہے۔
سماجی رابطوں کی ویب سائٹ ٹوئٹر پر اپنا پیغام جاری کرتے ہوئے سابق وزیر داخہ شیخ رشید نے کہا ہے کہ ملک معاشی طور پر تباہ اور اقتدار کے بھوکوں کا جمعہ بازار لگا ہوا ہے، آج سے ریسکیو آپریشن کا پہلا دن ہے۔
شیخ رشید نے کہا ہے کہ اداروں کا سیاست سے دور ہونا قابل تحسین ہے لیکن ادارے اپنے عوام سے دور نہیں رہ سکتے، ایک ہفتے میں 2 صوبائی اسمبلیوں کا فیصلہ ہو جائے گا، والدین اپنے بچوں کا گلا کاٹ رہے ہیں اور یہ یورپ میں چھٹیاں گزار رہے ہیں۔

گوجرانوالہ : (ویب ڈیسک) گوجرانوالہ پولیس نے تھیلی سیمیا میں مبتلا بچے کی بڑی خواہش پوری کردی ۔
سی پی او گوجرانوالہ عمر سلامت نے تھیلی سیمیا کے مریض بچے کو ایک دن کا اعزازی سی پی او بنا کر اس کی خواہش پوری کر دی،بچے کو گارڈ آف آنر بھی پیش کیا گیا ۔
تھیلیسمیا کے مرض میں مبتلا گوجرانوالہ کے حمزہ نے سی پی او بننے کی خواہشش کا اظہار کیا تو سی پی او عمر سلامت نے اس کی خواہش پوری کرنے کے لیے فوری احکامات جاری کیے اور اسے ایک دن کے لیے اعزازی سی پی او کے اختیارات دے دیئے ۔
اعزازی سی پی او بننے والے حمزہ نے پولیس کی تمام برانچز اور بلڈ کیمپ کا دورہ کرنے کے ساتھ ساتھ پولیس افسران کے مسائل بھی سنے۔ اس موقع پر حمزہ کے ساتھ اس کے والدین بھی خوش تھے.۔
حمزہ کو پولیس کی جانب سے گارڈ آف آنر بھی پیش کیا گیا جبکہ یاد گار شہدا پر حاضری بھی دی۔

لاہور: (ویب ڈیسک) لاہور ہائیکورٹ نے 50 کروڑ روپے کی مالیت سے کم نیب کیسز میں گرفتار ملزمان کی ضمانتوں کے حوالے سے بڑا فیصلہ سنا دیا۔
تفصیلات کے مطابق لاہور ہائیکورٹ نے 50 کروڑ سے کم مالیت کے نیب ریفرنس میں قید 5 ملزمان کی ضمانت منظور کر کے رہائی کا حکم دے دیا۔
لاہور ہائیکورٹ نے نیب ترامیم ایکٹ میں جیلوں میں قید ملزمان کو ضمانتوں کا فورم نہ دینے پر تشویش کا اظہار بھی کیا ہے۔
جسٹس مرزا وقاص رؤف اور جسٹس انوار حسین پر مشتمل بینچ نے دس صفحات پر مشتمل تفصیلی فیصلہ جاری کر دیا۔
فیصلے میں کہا گیا ہے کہ عدالت کسی کو اجازت نہیں دے سکتی کہ وہ بغیر کسی قانون کے کسی کے آزادی پر قدغن لگائے، نیب ترمیمی ایکٹ کے بعد اس کیس میں زیر حراست ملزمان کو ضمانت دینا انکا حق ہے، نیب ترمیمی ایکٹ کے بعد پچاس کروڑ سے کم مالیت کے کیسز میں احتساب عدالتوں کا دائرہ اختیار ختم ہو گیا۔
عدالتی فیصلے میں مزید کہا گیا ہے کہ احتساب عدالتیں 50 کڑورں سے کم مالیت کے کیسز نیب کو واپس بھجوا رہی ہیں، جیلوں میں قید نیب کے وہ ملزمان جو 50 کڑور سے کم کرپشن میں ملوث ہیں ان کے پاس ضمانتوں پر رہائی کیلئے کوئی فورم موجود نہیں۔
فیصلے کے مطابق راولپنڈی کی احتساب عدالت نے دائرہ اختیار ختم ہونے پر ملزمان کی درخواست ضمانتیں واپس کر دیں، ایسی صورتحال میں درخواست گزاروں کے پاس ریلیف کے لیے کوئی آپشن باقی نہیں رہاتھا، درخواست گزاروں کے پاس صرف ایک ہی راستہ تھا کہ وہ اپنے مستقبل کے حوالے سے کچھ ہونے کا انتظار کریں۔
فاضل ججز نے اپنے فیصلے میں مزید کہا کہ آئین پاکستان کے تحت زندگی اور آزادی ہر ایک کا بنیادی حق ہے، عدالتیں شہریوں کے بنیادی حقوق کی محافظ ہیں، ایف آئی اے اور دیگر کسی قانون نافذ کرنے والے ملزمان کے خلاف قانون کے مطابق کارروائی کے لیے مکمل آزاد ہونگے، عدالت ہاؤسنگ سوسائٹی فراڈ کیس میں گرفتار پانچ ملزمان کو ضمانت پر رہا کرنے کا حکم دیتی ہے۔
بعدازاں لاہور ہائی کورٹ نے گرفتار ملزمان کو ایک ایک لاکھ روپے کے مچلکوں کے عوض ضمانت پر رہا کرنے کا حکم دے دیا۔

اوکاڑہ: (ویب ڈیسک) اوکاڑہ میں تھانہ کینٹ کی حدود میں ڈکیتی کے دوران دکاندار کی فائرنگ سے 2 ڈاکو ہلاک اور ایک فرار ہوگیا، ہلاک ہونے والے ڈاکو متعدد وارداتوں میں مطلوب تھے۔
اوکاڑہ میں تھانہ کینٹ کے علاقہ 47 تھری آر میں دکاندار نے واردات کیلئے آنے والے دو ڈاکوؤں کو فائرنگ کر کے موت کے گھاٹ اتار دیا، ایک ڈاکو فرار ہوگیا، ہلاک ہونے والے دونوں ڈاکو پولیس کو متعدد وارداتوں میں مطلوب تھے، ڈاکوؤں کی شناخت عدنان اور کنگن کے ناموں سے ہوئی ہے۔
پولیس کے مطابق دونوں ڈاکو واردات کے بعد فرار ہو رہے تھے کہ دکاندار نے فائرنگ کردی، پولیس کی بھاری نفری موقع پر پہنچ گئی، لاشوں کو پوسٹ مارٹم کیلئے ڈی ایچ کیو ہسپتال منتقل کر دیا گیا ہے۔