لاہور: (ویب ڈیسک) پاکستان تحریک انصاف کے چیئر مین اور سابق وزیراعظم عمران خان نے کہا ہے کہ پاکستان میں انصاف نہ ملنا ملک کی تباہی کا سبب ہے، چیف جسٹس صاحب ہم انصاف کے لیے آپ کی طرف دیکھ رہے ہیں، جب اداروں میں میرٹ ہو گا تو تبھی ادارے مضبوط ہوتے ہیں، نوازشریف میرٹ پر فیصلہ نہیں کرے گا، نوازشریف جب آرمی چیف لگائے گا تو کہے گا پہلے میرے کیسز کو ختم اور راستے سے عمران خان کو ہٹایا جائے۔
پنجاب اور خیبرپختونخوا کے مختلف علاقوں میں پاکستان تحریک انصاف کے حقیقی آزادی لانگ مارچ کے شرکاء سے ویڈیو لنک کے ذریعے خطاب کرتے ہوئے انہوں نے کہا کہ تحریک انصاف کی حکومت میں بینکوں سے قرض واپس کرنے کا رسک 5 فیصد، آج 5۔64 فیصد ہو چکا ہے، اس کا مطلب ہماری معیشت کا قتل ہوا ہے، قوم کوسمجھنا چاہیے ان کے ساتھ ہوا کیا ہے، دنیا سمجھ رہی ہے پاکستانی معیشت کمزور ہے، اب اپنے قرض واپس نہیں کرسکے گا، بیرون ملک سے سرمایہ کاری کرنے والے بھی اب ڈریں گے، سارے قرضے دوخاندانوں نے ہمارے دس سالوں میں بڑھائے۔ روپیہ کی قدرمسلسل نیچے جارہی ہے، ملک میں ڈالرنہیں آرہے،روپیہ مسلسل گررہا ہے۔
پی ٹی آئی چیئر مین نے کہا کہ سب سے پہلا سوال ہے جن لوگوں نے سازش کر کے چوروں کو مسلط کیا اب بتائیں کون ذمہ دارہے؟ پچھلے 7 ماہ میں مہنگائی کے تمام ریکارڈ ٹوٹ گئے ہیں، ہمارے دور میں 16 فیصد اور آج مہنگائی بھی دُگنا ہو چکی ہے، ہمارے دورمیں ایکسپورٹ بڑھ رہی تھی، موجودہ حکومت کےاکنامک سروے کے مطابق پی ٹی آئی حکومت میں 6 فیصد گروتھ ہو رہی تھی، اکنامک سروے کے مطابق 32 ارب ڈالرکی ہم نے تاریخی ایکسپورٹ کی، اکنامک سروے کے مطابق 17 سال بعد زراعت میں اضافہ ہوا۔ اکنامک سروے کے مطابق سروسز سیکٹر 2۔6 فیصد گروتھ ہوئی، ہمارے دورمیں آئی ٹی سیکٹر میں 26 فیصد ریکارڈ اضافہ ہوا، مسلم لیگی حکومت نے بجلی کےمعاہدے ایسے کیے اگر بجلی کم استعمال بھی کریں گے تو پیسے پورے ہی دینے پڑیں گے، ہمارے دورمیں معیشت بڑھ رہی تھی اورملک ترقی کررہا تھا، ترقی کے باوجود سازش کے تحت ان کوبٹھایا گیا، شہباز شریف کو ایسے بٹھایا گیا جیسے اس سے زیادہ کوئی جنیئس نہیں، اسحاق ڈارنے تو آ کر کہا تھا موڈیز کو ٹھیک کرونگا اب تو غائب ہی ہو گیا ہے۔
سابق وزیراعظم نے کہا کہ دو ڈاکو خاندانوں کی حکومتوں میں بھارت ہم سے آگے نکل گیا، نوازشریف نے لندن کے مہنگے علاقے میں چار فلیٹس بنائے، نوازشریف امیر اور قوم غریب ہو گئی، اسٹیبلشمنٹ، ہینڈلرز کو سمجھایا اگر سازش کامیاب ہو گئی تو یہ ملک نہیں سنبھال سکیں گے، میں نے کہا کہیں پاکستان ڈیفالٹ نہ کر جائے انہوں نے میرے خلاف مقدمات بنائے، جو قرض دے گا وہ ہم سے قیمت مانگیں گے، جو قرض دے گا وہ ہمارے قومی اثاثے کی طرف جائیں گے، نوازشریف کو کوئی فرق نہیں پڑے گا اگرہم نیشنل سیکیورٹی پر کمپرومائز کریں گے، نواز شریف 23 دفعہ سرکاری دوروں پر لندن گیا، مجھے بھی دو لندن کے دوروں کی آفر ہوئی نہیں گیا، ہمارا ملک مقروض ہے، برطانیہ کے دورے پر نہیں گیا تھا، برطانیہ بیٹھ کر ڈیل کرتے ہیں جب گرین سگنل ملتا ہے تو واپس آجاتے ہیں، 30 سال سے یہی دوخاندان اقتدارمیں رہے دیوالیہ کس نے نکالا؟ ہماری حکومت نے ملک کو کورونا اور معیشت کوبھی بچایا، دنیا نے ہماری کورونا کی پالیسی کو سراہا۔
عمران خان نے کہا کہ جب حکومت گرائی تب انڈسٹریز ترقی کررہی تھی، کیا اب بھی کوئی سمجھتا ہے کہ یہ لوگ ملک کومسائل سے نکال سکتے ہیں، ماضی میں کسی بھی حکومت نے ایکسپورٹ بڑھانے پر توجہ نہیں دی، مسلم لیگ کے گزشتہ حکومت میں ایکسپورٹ میں اضافہ نہیں ہوا تھا، ہمارے دور میں 32 ارب ڈالر کی تاریخی ایکسپورٹ ہوئی، ہماری حکومت نے اوورسیزپاکستانیوں کے لیے روشن ڈیجیٹل اکاؤنٹ شروع کیا، بنڈل آئی لینڈ کو پی پی حکومت نے شروع نہیں کرنے دیا، پیپلز پارٹی نے آخری وقت میں منصوبے کو ختم کردیا، راوی ریورسٹی منصوبہ لاہورمیں شروع کیا۔
انہوں نے کہا کہ حکمران کہتے ہیں الیکشن کی جلدی کیوں ہے، ہمیں کوئی مسئلہ نہیں، اللہ کا خاص کرم ہے، اللہ نے لوگوں کے دل تحریک انصاف کی طرف موڑ دیئے ہیں، ہمارے ملک کو خطرہ ہے، ہم ملک کے قرض واپس نہیں کرسکیں گے، شہباز شریف بیرون ملک مانگ رہا ہے، سازش کی وجہ سے پاکستان یہاں پھنسا ہوا ہے، حقیقی آزادی مارچ کا مطلب انصاف ہے، لوگوں نے پاکستان میں رول آف لا کی حکمرانی نہیں دیکھی، میں نے برطانیہ میں رول آف لا کی حکمرانی دیکھی، تمام مسائل کی وجہ انصاف، قانون کی حکمرانی نہیں ہے، یہ جنگل کا قانون ہے، اس قانون میں خوشحالی نہیں آسکتی۔
پی ٹی آئی چیئر مین کا کہنا تھا کہ چیف جسٹس صاحب کے پاس تینوں لینڈ مارک کیسز ہیں، ارشد شریف ایسا صحافی تھا جس کے ضمیرکی کوئی قیمت نہیں تھی، ارشد شریف کو دھمکیاں دے کر ملک سے بھگایا گیا، اعظم سواتی کو تنقیدی ٹویٹ پر ننگا کر کے مارا گیا، کِدھرسے انصاف ملے گا چیف جسٹس صاحب اس لیے آپ کے پاس گئے ہیں، سب سے بڑی پارٹی کا سربراہ ہوں، مجھ پرقاتلانہ حملہ ہوا، سازش بارے پہلے ہی بتادیا تھا، تین نام لیے اب تک میری درخواست پر مقدمہ درج نہیں ہوا، سابق وزیراعظم ہوں، چیف جسٹس صاحب یہ لمحہ فکریہ ہے، تین لوگوں کا نام درج کرانا میرا بنیادی حق ہے، ہوسکتا ہے انویسٹی گیشن میں یہ نام غلط ثابت ہو جائیں، اپنی حکومت ہونے کے باوجود ایف آئی آردرج نہیں کرا سکا، یہی توکہتا ہوں ملک میں طاقت وراورکمزورکے لیے الگ الگ قانون ہے۔
سابق وزیراعظم کا کہنا تھا کہ اس ملک میں انصاف نہ ملنا ملک کی تباہی کا سبب ہے، چیف جسٹس صاحب ہم انصاف کے لیے آپ کی طرف دیکھ رہے ہیں، ہمیں انصاف کی کہیں اور امید نہیں، چیف الیکشن کمشنر ن لیگ کے قریب اوراس کو ہینڈلربھی کنٹرول کر رہے ہیں، چیف الیکشن کمشنر اور کراچی کے الیکشن کمشنر کے خلاف ہم عدالت گئے ہیں، ہم تو بار بار کہہ رہے ہیں، چیف الیکشن کمشنر غیر جانبدار نہیں، چیف الیکشن کمشنر بار بار ہمارے خلاف فیصلے کر رہا ہے، درخواست ہے چیف جسٹس صاحب چیف الیکشن کمشنر والا کیس بھی سن لیں، چیف الیکشن کمشنرنے مسلم لیگ ن ، پیپلزپارٹی کے فنڈنگ اکاؤنٹ کا فیصلہ نہیں دیا، جب پیپلز پارٹی، ن لیگ کا فنڈنگ کیس کھلے گا تو غیرقانونی فنڈنگ کا پتا چل جائے گا، چیف الیکشن کمشنر نے توشہ خانہ کیس میں ڈس کوالیفائی کر دیا، لکھ کر دیتا ہوں توشہ خانہ کیس میں کوئی غیرقانونی چیزثابت نہیں ہوگی، آصف زرداری، نوازشریف،یوسف رضا گیلانی کے توشہ خانہ کیس کے فیصلے نہیں سنائے جا رہے، آصف زرداری،نوازشریف،یوسف رضا گیلانی نے توشہ خانہ سے چارمہنگی گاڑیاں لیں۔
ان کا کہنا تھا کہ ہمیں انصاف ملے گا تو سب کو انصاف کے نظام پر اعتماد ہوگا، مفرور، سزا یافتہ، جھوٹا لندن میں تماشا کر رہا ہے، قوم سے پوچھنا چاہتا ہوں مفرور شخص کیسے ہمارے فیصلے کر سکتا ہے، ہماری نیشنل سیکیورٹی کا سب سے اہم فیصلہ مفرور کیسے کر سکتا ہے، نوازشریف کو میرٹ کے مطلب کا ہی نہیں پتا، نوازشریف وہ فیصلے کرتا ہے جو اس کی مدد کرے گا، نوازشریف نے کبھی میرٹ پرفیصلہ نہیں کیا،سابق آئی جی کی رپورٹ کے مطابق نوازشریف دور میں پنجاب پولیس کے اندر پیسے لیکر جرائم پیشہ لوگوں کو بھرتی کیا گیا، کیا ایسے شخص سے دیانت داری کی توقع کی جا سکتی ہے، کیا اخلاقی طور پر ایسا ہو سکتا ہے، جمہوریت ڈنڈوں نہیں اخلاقیات پرچلتی ہے، ڈیوڈ کیمرون نے ریفرنڈم میں شکست کے بعد استعفیٰ دے دیا تھا، پاکستان کا مفرورجھوٹ بول کر باہر بھاگا ہے۔
عمران خان کا کہنا تھا کہ جب اداروں میں میرٹ ہو گا تو تبھی ادارے مضبوط ہوتے ہیں، نوازشریف میرٹ پر فیصلہ نہیں کرے گا، پہلے چوروں کومسلط کیا پھر انہوں نے اپنے کیسز ختم کر دیئے، شہبازشریف کیس کے چارگواہان مرگئے کسی نے نہیں پوچھا۔ نواز شریف کو 40 سال سے جانتا ہوں، نوازشریف جب آرمی چیف لگائے گا تو کہے گا پہلے میرے کیسز کو ختم اور راستے سے عمران کو ہٹایا جائے، نواز شریف بزدل آدمی ہے، الیکشن میں ہارنے کا خوف ہے، نوازشریف جمخانہ میں بھی اپنے امپائرکھڑے کرکے میچ کھیلتا تھا۔ نوازشریف کو ڈر ہےعمران خان الیکشن جیت جائے گا، کرپٹ آدمی بزدل ہوتا ہے یہ پاکستان کی تقدیرسے کھیل رہا ہے، حقیقی آزادی مارچ کا مقصد ملک میں انصاف قائم کرنا ہے، اگرملک میں انصاف ہوتا تویہ سارے لوگ جیلوں میں ہوتے، ہمارا مارچ جب راولپنڈی پہنچے گا توسب کوپیغام جائے گا عوام چوروں کی غلامی نہیں کرے گی۔

اسلام آباد: (ویب ڈیسک) ارشد شریف کیس کے معاملے میں وفاقی تحقیقاتی ادارے (ایف آئی اے) کی فیکٹ فائنڈنگ کمیٹی نے فیصل واوڈا اور مراد سعید کو طلب کر لیا۔
ایف آئی اے ذرائع کے مطابق فیصل واوڈا اور مراد سعید نے دعویٰ کیا تھا کہ وہ ارشد شریف کو لاحق خطرات سے آگاہ تھے۔
ذرائع کے مطابق فیصل واوڈا اور مراد سعید کو فیکٹ فائنڈنگ کمیٹی نے پیر کو ایف آئی اے ہیڈ کوارٹرز طلب کیا ہے، دونوں رہنماؤں کو شواہد کے ساتھ ایف آئی اے ہیڈ کوارٹر آنے کے لیے نوٹس بھیجے گئے۔

کراچی: (ویب ڈیسک) پاکستان پیپلز پارٹی کے چیئر مین اور وفاقی وزیر خارجہ بلاول بھٹو زرداری نے کہا ہے کہ بدقسمتی سے سڑکوں پر سیاسی تماشے چل رہے ہیں مجبورا ان کا جواب دینا پڑتا ہے، اس وقت ہمارا نظام نہیں چل رہا، اہم تعیناتی کے بارے میں ہر طرف سے غیرضروری سیاست کی جارہی ہے، اتحادیوں اوراپوزیشن کو اس ایشوکومتنازع نہیں بنانا چاہیے۔
ڈاؤ ہسپتال میں جگر کی 75 کامیاب پیوندکاریوں کی تکمیل کے موقع پر کینسر سینٹر کا سنگ بنیاد اور او پی ڈی کے چار نئےبلاکس کی افتتاحی تقریب سے خطاب کرتے ہوئے وفاقی وزیر خارجہ کا کہنا تھا کہ جگرکاعلاج کرانے کے لیے پہلے ملک سے باہرجانا پڑتا تھا، جگرکا علاج بہت مہنگا ہوتا ہے، کینسرجیسے مرض کے کامیاب علاج کے لیےابتدائی تشخیص بہت اہم ہے، آج کل ٹی وی پربری خبریں ہی ملتی ہے، اچھی خبروں کو کم سیاسی خبروں کو زیادہ اُجاگر کیا جاتاہے۔
انہوں نے کہا کہ روس، یوکرین جنگ کے معاشی اثرات ہم بھگت رہے ہیں، سیلاب متاثرین آج بھی مدد کے انتظار میں ہیں، ہمارے لیے سیلاب متاثرین اولین ترجیح ہے، بدقسمتی سے سڑکوں پر سیاسی تماشے چل رہے ہیں مجبورا ان کا جواب دینا پڑتا ہے، اس وقت ہمارا نظام نہیں چل رہا، ترجیح عوام کی خدمت ہونی چاہیے، آپس میں گولی چلانے،لڑنے کے بجائے الیکشن میں حصہ لیں۔
بلاول بھٹو کا کہنا تھا کہ ڈاؤیونیورسٹی کی ترقی پرفخرکرتے ہیں، کورونا، یوکرین جنگ نے پوری دنیا کومتاثرکیا، پاکستان نے سیلاب جیسی تباہی کا سامنا کیا، سیلاب کی وجہ سے لاکھوں لوگ متاثرہوئے ہیں، ہم نے قوم کی ترجیح سیاسی تماشوں پر گامزن کر رکھی ہے، ہم سب کی اولین ترجیح عوام کی خدمت ہونی چاہیے۔
انہوں نے کہا کہ افسوس تعیناتی بارے ہر طرف سے غیرضروری سیاست کی جارہی ہے، آئین وقانون کے تحت یہ کام ہونا چاہیے، اتحادیوں اوراپوزیشن کو اس ایشوکومتنازع نہیں بنانا چاہیے۔ اہم تعیناتی پرغیرضروری سیاست کی جارہی ہے۔

اسلام آباد: (ویب ڈیسک) پبلک اکاؤنٹس کمیٹی نے نیب میں زیر التواء کھربو ں روپے کے مقدمات پر تفصیلی بریفنگ لینے کا فیصلہ کرتے ہوئے چیئرمین نیب کو کل طلب کرلیا۔
قومی اسمبلی کی پبلک اکاوٴنٹس کمیٹی کا اجلاس چیئرمین نور عالم کی زیر صدرات منعقد ہوا۔ اجلاس میں پبلک اکاوٴنٹس کمیٹی نے چیئرمین نیب کو کل طلب کرتے ہوئے سیکریٹری کمیٹی کو چئیرمین نیب کی اجلاس میں شرکت کے لیے خط لکھنے کی ہدایت کر دی۔
چیئرمین پی اے سی نور عالم خان نے کہا کہ اربوں کھربوں کے کیسز پر چئیرمین نیب بریفنگ دیں، خیبرپختونخوا سمیت دیگر اہم کیسوں پر چئیرمین نیب بریفنگ دیں۔
اجلاس میں وزارت سمندر پار پاکستانی کے آڈٹ اعتراضات 2019-20ء کا جائزہ لیا گیا۔ اجلاس میں چیئرمین پی اے سی نے استفسار کیا کہ او پی ایف ہاؤسنگ اسکیم میں گیس کیوں فراہم نہیں کی گئی؟ لوگ تیس تیس سال سے گیس سے محروم ہیں جس پر کمیٹی نے گیس کی فراہمی سے متعلق غفلت کے مرتکب ذمہ داران کا تعین کر کے رپورٹ طلب کرلی۔
چیئرمین نور عالم خان نے کہا کہ اوورسیز ہاؤسنگ اسکیم میں غریب مزدوروں کا حق ہے، جب اوورسیز ہاؤسنگ اسکیم بنائی گئی اس وقت گیس کی لاگت بھی کم تھی جس پر کمیٹی نے مواصلاتی نظام کی خرابی کی تحقیق کر کے رپورٹ طلب کرلی۔
کمیٹی کا وقت پر ڈی اے سی کا اجلاس نہ ہونے پر برہمی کا اظہار کیا اور کہا کہ آئندہ بروقت ڈی اے سی نہ ہونے کی صورت میں متعلقہ سیکریٹری کی تنخواہ سے پیسے لیے جائیں گے اگر سیکریٹری کام نہیں کرے گا تو متعلقہ وزیر کو بھی طلب کیا جائے گا۔

اسلام آباد: (ویب ڈیسک) گلگت بلتستان کے ضلع دیامر میں نامعلوم شرپسندوں کی جانب سے نذر آتش کئے گئے اسکول میں پھر سے رونقیں بحال ہوگئیں۔
طالبات نے حصول تعلیم کے لئے اپنے عزم کااظہار کرتے ہوئے کہا کہ ہم تعلیم حاصل کریں گی۔اللہ تعالیٰ نے ہمیں تعلیم کا حق دیا ہے اور کوئی بھی انسان اسے ہم سے چھین نہیں سکتا۔
گلگت بلتستان کے ضلع دیامر میں نامعلوم شرپسندوں کی جانب سے لڑکیوں کا نذرآتش کیاگیا اسکول آج پھر سے طالبات کے قہقہوں سے گونج اٹھا۔ جس کا افتتاح پارلیمانی سیکرٹری محکمہ تعلیم ثریا زمان نے کیا۔
اس موقع پر کمشنر دیامر، ڈپٹی کمشنر چلاس اور اسسٹنٹ کمشنر داریل بھی موجود تھے۔ تعمیر کے بعد اسکول ایک ماڈل اسکول کی تصویر پیش کررہاہے جس میں کمپیوٹر لیب کے ساتھ ساتھ لائبریری بھی ہے۔ آج اسکول کے بچے پڑھائی میں واپس آنے پر زیادہ پرجوش دکھائی دے رہے تھے اور ان کی آنکھیں امید سے بھری ہوئی تھیں۔
آج اسکول میں پہلے سے زیادہ تعداد میں طالبات موجودگی ان شرپسندوں کے لئے ایک پیغام تھا جنہوں نے اسکول کو نذر آتش کیا تھاکہ ہم علم حاصل کریں گے۔ ہم اپنے اس بنیادی حق سے پیچھے نہیں ہٹیں گے۔ اللہ تعالیٰ نے ہمیں تعلیم کا حق دیا ہے اور کوئی بھی انسان اسے ہم سے چھین نہیں سکتا۔

ڈی آئی خان: (ویب ڈیسک) ڈیرہ اسماعیل خان میں سی ٹی ڈی اور پولیس کی دہشت گردوں کے خلاف دو مختلف کارروائیوں کے دوران 7 دہشت گرد ہلاک ہو گئے ہیں۔
سی ٹی ڈی کے مطابق ڈی آئی خان کے علاقے ڈیرہ ٹاؤن کے قریب فورسز،سی ٹی ڈی اور پولیس نے مشترکہ آپریشن کیا،آپریشن کے دوراں 4 دہشت گرد ہلاک ہوئے،دہشتگردوں سے دستی بم اور اسلحہ برآمد ہوا۔
دوسری جانب ڈی آئی خان کے علاقے کولاچی میں دہشت گردوں کی موجودگی پر سیکیورٹی فورسز کے انٹیلیجنس بیسڈ آپریشن میں ٹی ٹی پی گنڈہ پور گروپ کے 3 دہشتگرد ہلاک ہوگئے۔

کراچی: (ویب ڈیسک) پاکستان آرڈی ننس فیکٹری واہ نے کثیر المقاصد ڈرونز ’’ابابیل‘‘ تیار کرلیے، جدید ڈرونز بم سے ہدف کو نشانہ بنانے کے ساتھ حالت امن میں آگ بجھانے اور ہجوم کو منتشر کرنے کے لیے آنسو گیس کے گولے پھینکے کی بھی صلاحیت رکھتے ہیں۔
دفاعی ساز و سامان کی 11 ویں چار روزہ بین الاقوامی نمائش آئیڈیاز منگل سے کراچی ایکسپو سینٹر میں شروع ہوگئی، آئیڈیاز میں جدید ہتھیاروں کے ساتھ ساتھ مقامی تیار کردہ ڈرونز بھی نمائش کیلئے پیش کیے جارہے ہیں۔
یہ کثیر المقاصد ڈرونز جنگی اور غیر جنگی دونوں حالات میں استعمال کیے جاسکتے ہیں۔ دفاعی مصنوعات کی پیداوار کے سب سے بڑے ملکی ادارہ پاکستان آرڈیننس فیکٹریز (پی او ایف)کے تیار کردہ ’’ابا بیل‘‘ سیریز کے یہ ڈرونز خاص طور پر مارٹر بم گرانے میں مہارت رکھتے ہیں تاہم ان کثیر المقاصد ڈرونز کو جنگی حالات کے ساتھ ساتھ غیر جنگی حالات، جیسے آگ بجھانے اور آنسو گیس کے شیل وغیرہ پھینکنے کیلئے بھی استعمال کیا جاسکتا ہے۔
پی او ایف، آئیڈیاز نمائش 2022ء میں 11 نئی مصنوعات متعارف کرنے جا رہا ہے، ان مصنوعات کی پیداوار شروع ہونے سے پی او ایف کی وسیع مصنوعات کی رینج میں مزید اضافہ ہوگا۔
پاکستان آرڈی ننس فیکٹریز کی تیار کردہ اسالٹ رائفلز CW-39 اور CW-56 سمیت دیگر رائفلز بھی اسی نمائش میں متعارف کرائی جائیں گی، یہ رائفلز مکمل طور پر پاکستان آرڈی ننس فیکٹریز میں تیار کی گئی ہیں جو عصر حاضر کے جدید تقاضوں اور پاکستان کی مسلح افواج کی مستقبل کی دفاعی ضرورت کو مدنظر رکھتے ہوئے تیار کی گئی ہیں۔
پی او ایف میں تیار کردہ 60 اور 81 ملی میٹر کیلیبر کے حامل ائیر ڈراپ بم بھی اس برس آئیڈیاز میں متعارف کرائے جا رہے ہیں۔ 125 ایم ایم اینٹی ٹینک ایمونیشن کی لانچنگ بھی اس نمائش کا حصہ ہے۔
عالمی معیار کے مطابق پی او ایف میں تیار کردہ 5.56×45 ایم ایم ایمونیشن اور 12.7×99 ایم ایم ہیوی اسنائپر ایمونیشن بھی آئیڈیاز 2022ء کے موقع پر متعارف کرایا جائے گا۔
پی او ایف کے ذیلی ادارے واہ انڈسٹریز میں پرنٹڈ سرکٹ بورڈز کی مکمل ڈیزائننگ، فیبریکیشن اور اسمبلنگ کا آغاز بھی کردیا گیا ہے۔ آئیڈیاز 2022ء میں پی او ایف پرنٹڈ سرکٹ بورڈز کی عالمی معیار کے مطابق تیاری کے لیے قائم کیے گئے ذیلی ادارے الیکٹرا ٹیک کو بھی متعارف کرایا جائے گا۔

لاہور: (ویب ڈیسک) سابق صوبائی وزیرداخلہ شجاع خانزادہ شہید پر دہشتگرد حملے میں ملوث سہولت کار گرفتار کرلیا گیا۔
محکمہ سی ٹی ڈی پنجاب نے خفیہ اطلاع پر کلر سیداں روڈ راولپنڈی میں کاروائی کی، جس میں سی ٹی ڈی نے سابق صوبائی وزیرداخلہ پر خود کش بم دھماکے میں ملوث سہولت کار گرفتار کرلیا ہے۔
گرفتار ملزم عبداللہ خان میر پور آزاد کشمیر کا رہائشی ہے، ملزم عبداللہ سے بھاری تعداد میں دھماکا خیز مواد برآمد ہوا ہے۔ ملزم دھماکا خیز مواد کو پنڈی اور اسلام آباد میں تخریب کاری کیلئے لے کر جا رہا تھا۔
ملزم کا تعلق کالعدم تنظیم لشکر جھنگوی اور کالعدم ٹی ٹی پی سے ہے۔ ملزم عبداللہ خان افغانستان مرکز سے تربیت یافتہ ہے۔