ریاض کی سڑکوں پر مشتعل اونٹ نے قبضہ جما لیا

ریاض: (ویب ڈیسک) سعودی عرب کے شہر ریاض میں ایک مشتعل اونٹ نے سڑکوں پر قبضہ جما لیا ہے۔
سوشل میڈیا پر گردش کرنے والی ایک ویڈیو میں ریاض کے رنگ روڈ کے ہجوم میں ایک مشتعل اونٹ کو بھاگتے ہوئے دیکھا جا سکتا ہے جو کاروں کی مخالف سمت دوڑ رہا ہے۔
اونٹ مخالف سمت میں دوڑ رہا تھا جس کی وجہ سے ٹریفک میں خلل پیدا ہوگیا اور اونٹ سے ٹکرانے سے بچنے کیلئے ایک کار کی اچانک بریک لگتی ہوئی دیکھی جا سکتی ہے
دوڑتا ہوا یہ اونٹ گاڑی چلانے والوں کو الجھا رہا ہے اور مخالف سمت سے آنے والی ٹریفک کو روک رہا ہے۔ اونٹ اس انداز میں بھاگ رہا ہے اور اس کے پیچھے بھی ایک شخص بھاگ رہا ہے جو اسے روکنے اور پکڑنے کی کوشش میں ہے۔
جنرل ڈائریکٹوریٹ آف ٹریفک نے اعلان کیا کہ ریاض ریجن میں ایک حادثہ پیش آیا جہاں ترکی الاول روڈ پر ایک گاڑی سے اونٹ گر گیا جس کے نتیجے میں گاڑی کو نقصان پہنچا۔
جنرل ٹریفک ڈیپارٹمنٹ نے جانوروں کے مالکان کو خبردار کیا ہے کہ اپنے جانوروں کو راستے سے ہٹا کر رکھیں۔ خلاف ورزی کی صورت میں 10 ہزار ریال جرمانہ ادا کرنا پڑ سکتا ہے۔