آسٹریلوی ٹینس اسٹار نک کرگیوس کو کوکین کے استعمال سے متعلق ڈوپنگ کیس میں ایک ماہ کی معطلی کی سزا دی گئی ہے تاہم ان کی یہ سزا مقررہ مدت سے کم کر دی گئی ہے۔
انٹرنیشنل ٹینس انٹیگریٹی ایجنسی (آئی ٹی آئی اے) کے مطابق کرگیوس نے جون میں اسپین کے شہر مالورکا میں اے ٹی پی ٹور کے ایک ایونٹ کے دوران مثبت ڈوپ ٹیسٹ دیا تھا۔
انہیں 4 اگست سے عارضی طور پر معطل کیا گیا تھا۔
آئی ٹی آئی اے نے بتایا کہ 31 سالہ کھلاڑی نے ادارے سے منظور شدہ ایک ٹریٹمنٹ پروگرام میں حصہ لیا جس کے باعث عالمی اینٹی ڈوپنگ قوانین کے تحت مقررہ تین ماہ کی معطلی کو کم کرکے ایک ماہ کر دیا گیا۔
تحقیقات کے دوران کرگیوس نے بتایا کہ انہوں نے مالورکا میں میچ سے قبل رات کو سماجی طور پر کوکین استعمال کی تھی۔
ایک آزاد سائنسی ماہر نے بھی ان کے بیان کو نمونے میں موجود کوکین کی مقدار سے مطابقت رکھنے والا قرار دیا۔
آئی ٹی آئی اے کے مطابق کرگیوس کی معطلی جمعرات کو ختم ہو جائے گی تاہم انہیں مالورکا ایونٹ کی انعامی رقم اور رینکنگ پوائنٹس سے محروم ہونا پڑے گا۔
کرگیوس پہلے ہی اس واقعے پر معذرت کرتے ہوئے اسے اپنی ’بڑی غلطی‘ قرار دے چکے ہیں۔
