پنجاب بھر میں اوور سپیڈنگ کرنیوالوں کیخلاف کارروائیوں میں تیزی

لاہور (کرائم رپورٹر) ڈی آئی جی ٹریفک پنجاب محمد وقاص نذیر کی ہدایت پر صوبہ بھر میں اوور سپیڈنگ کرنے والوں کے خلاف بلاامتیاز کارروائیوں میں تیزی لائی گئی ہے۔ ترجمان ٹریفک پولیس کے مطابق رواں سال اوور سپیڈنگ پر 25 ہزار سے زائد شہریوں کے خلاف کارروائی کی جاچکی ہے۔ ترجمان کے مطابق سیف سٹی کیمروں کی مدد سے تیز رفتاری کرنے والی گاڑیوں کی نشاندہی اور شواہد کی بنیاد پر ای چلاننگ کا سلسلہ جاری ہے جبکہ موٹر سائیکلوں، عام گاڑیوں اور کمرشل ٹرانسپورٹ کے خلاف بھی سخت کارروائیاں عمل میں لائی جارہی ہیں۔ ڈی آئی جی ٹریفک پنجاب محمد وقاص نذیر نے کہا کہ صوبہ بھر میں موٹر سائیکل سواروں کے لیے حد رفتار60 مقرر کی گئی ہے جبکہ رفتار کی جانچ کے لیے سپیڈ گن مشینوں کا استعمال کیا جارہا ہے۔ شہریوں کی رہنمائی کے لیے پنجاب کی سڑکوں پر رفتار کی حد سے متعلق سائن بورڈز بھی آویزاں کیے گئے ہیں۔ محمد وقاص نذیر کا کہنا تھا کہ اوور سپیڈنگ کے خلاف موثر کارروائیوں سے ٹریفک حادثات میں کمی آئی ہے۔ ٹریفک پولیس کی اولین ترجیح شہریوں کے سفر کو آسان اور محفوظ بنانا ہے جس کے لیے جدید ٹیکنالوجی سے استفادہ کیا جارہا ہے۔ انہوں نے کہا کہ قیمتی انسانی جانوں کا تحفظ اور محفوظ پنجاب کے قیام کے لیے ٹریفک پولیس تمام ممکنہ اقدامات کر رہی ہے۔ شہری ٹریفک قوانین کی پابندی کریں، مقررہ رفتار کے اندر گاڑی چلائیں اور اپنی سمیت دوسروں کی زندگیوں کو محفوظ بنائیں۔