سانگلہ ہل ( این این آئی)صوبائی محتسب پنجاب کے ضلعی ایڈوائزر ملک شہزاد نے میونسپل کمیٹی
دفترمیں کھلی کچہری کا انعقاد کیا،کھلی کچہری میں ریٹائرڈ ملازمین کمیٹی اور شہریوں کی بڑی تعداد نے شرکت کی اور اپنے مسائل کے بارے میں آگاہ کیا، ریٹائرڈ ملازمین اور شہریوں کی جانب سے سب سے زیادہ شکایات پنشن اور گریجوایٹی نہ ملنے، محکمہ بلدیہ کی جانب سے ناجائز تجاوزات کے نام پر تنگ کرنے اور نقشہ فیس کی آڑ میں رشوت طلب کرنے کے حوالے سے سامنے آئیں،ریٹائرڈملازمین نے موقف اختیار کیا کہ ریٹائرڈ ملازمین کو سالہا سال سے پنشن اور گریجوایٹی کے حصول کے لیے دفاتر کے چکر لگانا پڑ رہے ہیں، جبکہ بلدیہ اہلکار غریب ریڑھی بانوں اور دکانداروں کو ناجائز تجاوزات کا بہانہ بنا کر ہراساں کرتے ہیں اور گھروں کے نقشہ جات کی منظوری میں بلا جواز تاخیر اور بھاری فیس وصول کی جا رہی ہے،اس موقع پر صوبائی محتسب کے ایڈوائزر ملک شہزاد نے شکایات کو غور سے سنا اور موقع پر ہی متعدد درخواستوں پر احکامات جاری کیے۔
