ازبکستان کی نجی ایئرلائن سینٹرم ایئر نے 3 ستمبر 2026 سے تاشقند اور کراچی کے درمیان براہِ راست پروازیں شروع کر دی ہیں، جس سے پاکستان اور ازبکستان کے درمیان فضائی رابطے مزید مضبوط ہوگئے ہیں۔
سینٹرم ایئر کی پہلی براہِ راست پرواز ایئربس A320 کے ذریعے تاشقند سے روانہ ہوکر جمعرات کی صبح 4 بج کر 20 منٹ پر کراچی ایئرپورٹ پہنچی۔ طیارے کا کراچی آمد پر روایتی واٹر کینن سیلوٹ کے ساتھ استقبال کیا گیا۔
پرواز کی آمد کے موقع پر کراچی ایئرپورٹ پر استقبالیہ تقریب منعقد ہوئی، جس میں سندھ حکومت اور مقامی انتظامیہ کے نمائندوں، ازبک سفارتی حکام، سندھ ٹورازم ڈویلپمنٹ کارپوریشن، ایئرلائنز، ٹور آپریٹرز اور میڈیا نمائندگان نے شرکت کی۔
حکام کے مطابق اس نئے فضائی رابطے سے سیاحت، تجارت، کاروباری روابط اور عوامی سطح پر رابطوں کو فروغ ملے گا۔ کراچی پاکستان کا اہم تجارتی اور بندرگاہی شہر ہونے کے باعث وسطی ایشیا کے ساتھ کاروباری روابط کے لیے بھی اہم کردار ادا کرسکتا ہے۔
سینٹرم ایئر کی جانب سے جاری شیڈول کے مطابق تاشقند-کراچی روٹ پر ہفتے میں دو براہِ راست پروازیں چلائی جائیں گی اور دونوں سمتوں میں ایئربس A320 طیارے استعمال ہوں گے۔
اس روٹ کے آغاز کے بعد پاکستان اور ازبکستان کے درمیان براہِ راست پروازوں کی مجموعی تعداد 8 فی ہفتہ ہوگئی ہے۔ اس سے قبل تاشقند سے لاہور کے لیے چار جبکہ اسلام آباد کے لیے دو ہفتہ وار پروازیں چل رہی تھیں۔
نئے روٹ سے تاجروں، سرمایہ کاروں، سیاحوں، طلبہ اور خاندانوں کے لیے دونوں ممالک کے درمیان سفر مزید آسان ہونے کی توقع ہے، جبکہ کراچی کے ذریعے وسطی ایشیا اور پاکستان کے درمیان تجارتی و سفری رابطوں کو بھی فروغ مل سکتا ہے۔
