کراچی: (ویب ڈیسک) کراچی کے علاقے بوٹ بیسن میں ہوٹل کے باہر سکیورٹی گارڈ کی فائرنگ سے بھیک مانگنے والا بچہ جاں بحق ہوگیا۔
فائرنگ کا واقعہ مشہور فوڈ اسٹریٹ بوٹ بیسن پر پیش آیا، جہاں بھیک مانگنے والوں کا رش لگا رہتا ہے جن میں بچے بھی شامل ہوتے ہیں۔
بوٹ بیسن پر سکیورٹی گارڈ کی جانب سے بھیک مانگنے والے بچے پر فائرنگ کی گئی جس سے بچہ موت کی نیند سو گیا جبکہ واقعے کے بعد سکیورٹی گارڈ موقع سے فرار ہوگیا۔
دوسری جانب کراچی کے علاقے کورنگی میں مرتضیٰ چورنگی پر بھی فائرنگ کا واقعہ پیش آیا جس سے 2 افراد جاں بحق ہو گئے ہیں۔

اسلام آباد: (ویب ڈیسک) وفاقی وزیر ریلوے خواجہ سعد رفیق کی زیر صدارت اجلاس میں ریلوے حکام نے بتایا کہ 20 نومبر کو جعفر ایکسپریس مچھ سٹیشن تک بحال ہو جائے گی، مچھ سے کوئٹہ تک مسافروں کو بسوں کے ذریعے بھجوایا جائے گا جس کے لئے بلوچستان حکومت سکیورٹی فراہم کرے گی۔
وفاقی وزیر نے ہدایت کی کہ 20 نومبر سے قبل اسٹیشن پر نئے بنچز، اضافی واٹر کولرز اور سیکیورٹی کیمرے نصب کئے جائیں۔
وفاقی وزیر نے اپنی زیر صدارت اجلاس میں ہرک برج پر50 فیصد کام مکمل ہونے پر ڈی ایس کوئٹہ کو شاباش بھی دی۔
اجلاس کو بتایا گیا کہ مسافروں کی حفاظت یقینی بنانے کیلئے ٹرین کو انجینئرنگ ریسٹرکشنز کے ساتھ چلایا جائے گا، مچھ اسٹیشن پر7 نئے واش رومز بنا دیئے گئے ہیں جبکہ دو جنریٹر بھی نصب کئے گئے ہیں۔ وفاقی وزیر نے 20 نومبر تک اسٹیشن پر نئے بنچز، اضافی واٹر کولرز اور سیکیورٹی کیمرے نصب کرنے کی ہدایت کی۔
وفاقی وزیر کو بتایا گیا کہ کوئٹہ تفتان سیکشن سے ریلوے ریونیو سٹریم بڑھانے کے لیے چیمبرز آف کامرس سے تجاویز لی جائیں گی جبکہ ریلوے اسٹیشنز کو شمسی توانائی پر منتقل کرنے کے لیے ریوائزڈ پی سی ون کی جلد منظوری لی جائے گی۔
حکام نے وفاقی وزیر کو ٹرینوں کی آمدن اور آکیوپینسی بارے بریفنگ دی گئی اور کہا گیا کہ ایک ایک ٹرین کی ایویلیوایشن ہو گی۔
اجلاس مین پشاور ڈویژن میں ریلوے زمینوں پر تجاوزات کے خلاف بھرپور کارروائی کا بھی فیصلہ کیا گیا اور ڈی ایس کو ٹاسک دے دیا گیا کہ وہ اراضی واگزار کرائیں۔ وفاقی وزیر نے سکھر ڈویژن میں انجینئرنگ رکاوٹیںکم کرنے کے لیے ٹیکنیکل ٹیم کو رپورٹ پیش کرنے کی ہدایت کی ۔

لندن: (ویب ڈیسک) وزیراعظم شہباز شریف کل شام وطن روانہ ہوں گے، شہباز شریف کا طیارہ شام 6 بجے لندن سے پاکستان کیلئے روانہ ہوگا۔
شہباز شریف جمعے کی شام طبیعت کی خرابی کے سبب وطن روانہ نہیں ہوسکےتھے۔
شہباز شریف کے ہلکے بخار میں مبتلا ہونےکےسبب فیملی ارکان نےآرام کا مشورہ دیا تھا۔
وزیراعظم شہباز شریف چند روز قبل لندن گئے تھے اور انہیں گزشتہ روز پاکستان کے لیے روانہ ہونا تھا تاہم انہوں نے اپنا قیام ایک روز کے لیے بڑھا دیا تھا جس کے بعد انہیں جمعے کو وطن کے لیے روانہ ہونا تھا لیکن وطن واپسی کے لیے ائیر پورٹ روانگی سے قبل وزیراعظم شہباز شریف کی طبیعت ناساز ہوگئی، وزیراعظم کو ائیرپورٹ روانگی سے قبل ہلکا بخار محسوس ہوا۔

لاہور: (ویب ڈیسک) پنجاب حکومت اور ایشین ڈویلپمنٹ بینک (اے ڈی بی) کے درمیان بلیولائن انڈر گراؤنڈ پراجیکٹ کے حوالے سے تعاون پر اصولی اتفاق کر لیا گیا۔
وزیراعلیٰ چودھری پرویز الٰہی اور سابق وفاقی وزیر آبی وسائل مونس الٰہی سے ایشین ڈویلپمنٹ بینک (اے ڈی بی) کے کنٹری ڈائریکٹر یونگ یی کی قیادت میں وفد نے ملاقات کی۔
ملاقات کے دوران پنجاب میں اے ڈی بی کے تعاون سے جاری منصوبوں پر پیشرفت اور لاہور میں بلیو لائن انڈر گراؤنڈپراجیکٹ شروع کرنے پر تبادلہ خیال کیا گیا۔
اس موقع پر وزیراعلیٰ پنجاب پرویز الٰہی کا کہنا تھا کہ ایشین ڈویلپمنٹ بینک پنجاب حکومت کا اہم پارٹنر، سابق دور میں اے ڈی بی کے تعاون سے انڈر گراؤنڈ ٹرین چلانے کا منصوبہ بنایا، مسلم لیگ (ن) کی حکومت نے میرے منصوبے کو سیاسی تعصب کی نذ رکردیا۔
انہوں نے کہا کہ میٹروبس سروس شروع کر کے لاہور شہر کا حسن تباہ کیا، ہماری حکومت نے عوام کو ٹرانسپورٹ کی جدیدسہولتیں فراہم کرنے کیلئے بلیو لائن پراجیکٹ شروع کرنے کا فیصلہ کیا ہے۔
کنٹری ڈائریکٹر اے ڈی بی کا کہنا ہے کہ لاہور کو انڈر گراؤنڈ ٹرانسپورٹ سسٹم کی ضرورت ہے، خوشی ہوگی اے ڈی بی بلیو لائن پراجیکٹ کیلئے تکنیکی معاونت فراہم کرے، وزیراعلی پرویز الٰہی کی قیادت میں پنجاب حکومت کی ترجیحات درست ہیں، تعاون مزید بڑھائینگے۔

اسلام آباد: (ویب ڈیسک) چیئرمین پاکستان علماء کونسل حافظ طاہر محمود اشرفی کا سعودی ولی عہد محمد بن سلمان کا دورہ پاکستان ملتوی ہونے پر ردعمل سامنے آیا ہے۔
وڈیو بیان میں طاہر اشرفی نے کہا کہ سعودی ولی عہد کو کچھ دوسرے ممالک کا بھی دورہ کرنا تھا، سعودی ولی عہدکا دورہ، پاکستان کے داخلی معاملات کے باعث ملتوی نہیں ہوا۔
طاہراشرفی نے مزید کہا کہ سعودی ولی عہد نے اپنے شیڈول کے مطابق یہ دورہ ملتوی کیا ہے، سعودی ولی عہد جلد پاکستان کا دورہ کریں گے۔
ذرائع کے مطابق محمد بن سلمان نے 21 نومبر کو پاکستان کا مختصر دورہ کرنا تھا جو کہ اب ملتوی کردیا گیا ہے۔
ذرائع کا کہنا ہےکہ محمد بن سلمان کے دورہ پاکستان کی نئی تاریخ کا اعلان بعد میں کیا جائےگا۔