لاہور: (ویب ڈیسک) گوگل نے اپنے صارفین کو مشورہ دیا ہے کہ وہ گوگل کروم براؤزر کو فوری اپ ڈیٹ کرلیں۔
گوگل کی جانب سے جاری بیان میں بتایا گیا کہ اس اپ ڈیٹ کا مقصد کروم براؤزر کو متاثر کرنے والے سکیورٹی بگ سے صارفین کو تحفظ فراہم کرنا ہے۔
گوگل نے بتایا کہ CVE-2022-4135 نامی سکیورٹی بگ سے صارفین کو خطرہ لاحق ہے۔اس سکیورٹی بگ کو ایک سکیورٹی محقق Clement Lecigne نے شناخت کیا تھا جس کے بعد اس کی روک تھام کے لیے گوگل کی جانب سے اپ ڈیٹ جاری کی گئی۔
گوگل نے اس حوالے سے زیادہ تفصیلات جاری نہیں کیں۔
خیال رہے کہ دنیا بھر میں انٹرنیٹ استعمال کرنے والے 56 فیصد افراد براؤزنگ کے لیے گوگل کروم کو ترجیح دیتے ہیں جس میں یکم جنوری 2022 سے 5 اکتوبر 2022 کے دوران 303 سکیورٹی کمزوریوں کو دریافت کیا گیا۔
کروم براؤزر کو اپ ڈیٹ کیسے کریں؟
عموماً گوگل کروم خودکار طور پر اپ ڈیٹ ہوجاتا ہے۔ اگر آپ کو معلوم نہیں کہ براؤزر اپ ڈیٹ ہوچکا ہے یا نہیں تو تھری ڈاٹ مینیو پر کلک کرکے سیٹنگز میں جائیں۔
وہاں اباؤٹ کروم پر کلک کریں جو پیج کے بائیں جانب سب سے نیچے ہوگا۔
اس کے بعد کروم کی جانب سے بتایا جائے گا کہ براؤزر اپ ٹو ڈیٹ ہے، اگر نہیں ہوگا تو وہ اپ ڈیٹ ہونا شروع جائے گا۔
اس کے بعد بس ری لانچ کریں گے تو کروم اپ ڈیٹ ہوجائے گا۔

جنوبی افریقا : (ویب ڈیسک) کورونا وائرس کی نئی قسم پہلے سے زیادہ خطرناک ثابت ہوسکتی ہے۔
یہ بات جنوبی افریقا میں ہونے والی ایک طبی تحقیق میں سامنے آئی۔
افریقا ہیلتھ ریسرچ انسٹیٹیوٹ کی تحقیق میں ایک ایسے فرد کے کووڈ 19 کے نمونوں کا تجزیہ 6 ماہ تک کیا گیا جس کا مدافعتی نظام بہت کمزور تھا۔تحقیق سے عندیہ ملا کہ مستقبل قریب میں کورونا وائرس کی نئی قسم زیادہ سنگین بیماری کا باعث بننے والی ہوسکتی ہے۔
یہ تحقیق اسی لیبارٹری میں ہوئی جہاں 2021 میں سب سے پہلے کورونا کی بہت زیادہ متعدی قسم اومیکرون کو شناخت کیا گیا تھا۔
اس تحقیق میں ایچ آئی وی کے ایک ایسے مریض کو شامل کیا گیا تھا جس میں کووڈ 19 کی تشخیص ہوئی تھی اور اس کے نمونوں کا تجزیہ 6 ماہ تک کیا گیا۔
6 ماہ تک وائرس سے خلیات کو پہنچنے والا نقصان اسی طرح کا تھا جیسا اومیکرون بی اے 1 قسم میں دیکھنے میں آیا تھا، مگر ارتقائی مراحل سے گزرنے کے دوران یہ وائرس کورونا وائرس کی ابتدائی قسم جیسا ہوگیا جس کو چین کے شہر ووہان میں شناخت کیا گیا تھا۔
محققین نے بتایا کہ نتائج سے عندیہ ملتا ہے کہ یہ وائرس مسلسل خود کو بدل رہا ہے اور اس کی مستقبل قریب میں ایک نئی قسم اومیکرون کے مقابلے میں زیادہ خطرناک ثابت ہوسکتی ہے۔
اس تحقیق کے نتائج ابھی کسی طبی جریدے میں شائع نہیں ہوئے اور اس میں صرف ایک فرد کے نمونوں کی جانچ پڑتال لیبارٹری میں کی گئی تھی۔
ان محققین نے ہی ماضی میں بتایا کہ کورونا وائرس کی اقسام beta اور اومیکرون دونوں ممکنہ طور پر ایچ آئی وی سے متاثر افراد میں بن کر پھیلنا شروع ہوئی تھیں۔
انہوں نے بتایا کہ وائرس کو جتنا زیادہ وقت کسی کمزور مدافعتی نظام کے مالک فرد کے اندر رہنے کا موقع ملے گا، اس کے بدلنے کا امکان اتنا زیادہ ہوتا ہے۔

لاہور: (ویب ڈیسک) آرٹیمس 1 مشن کے اورین اسپیس کرافٹ نے ایک نیا ریکارڈ بنا دیا ہے۔
اورین کیپسول چاند کے دور دراز مدار پر پہنچنے والا ناسا کا پہلا ایسا اسپیس کرافٹ ہے جسے انسانوں کو لے جانے کے لیے ڈیزائن کیا گیا ہے۔
اورین نے 1970 کے اپولو 13 مشن کا ریکارڈ توڑ دیا ہے اور وہ زمین سے اب تک 2 لاکھ 58 ہزار 706 میل دور تک سفر کرچکا ہے۔اورین اسپیس کرافٹ کے منیجر Jim Geffre نے بتایا کہ آرٹیمس 1 مشن کو ایسے ڈیزائن کیا گیا تاکہ اورین کے سسٹمز کی آزمائش ہوسکے اور چاند کے اس حصے کے مدار میں داخل ہونے سے اس کا اچھا عندیہ ملتا ہے۔
انہوں نے کہا کہ ہم اپولو 13 کے ریکارڈ کو توڑنے میں کامیاب رہے مگر سب اہم بات یہ ہے کہ ہم کھوج کو آگے بڑھا رہے ہیں اور اسپیس کرافٹ کو ماضی کے مقابلے میں زیادہ دور بھیج رہے ہیں۔
اپولو 13 نے زمین سے 2 لاکھ 48 ہزار 655 میل کے فاصلے تک سفر کا ریکارڈ بنایا تھا مگر ایسا مجبوری میں ہوا کیونکہ ایک دھماکے کے باعث ناسا کو مشن کے لیے نئے روٹ کا انتخاب کرنا پڑا۔
اورین اسپیس کرافٹ نے حال ہی میں چاند کے قریب پرواز کی تھی اور اب اس کا مشن لگ بھگ آدھا مکمل ہوچکا ہے اور جلد اس کی زمین پر واپسی کا سفر شروع ہوگا۔
سب کچھ ٹھیک رہا تو یہ اسپیس کرافٹ 11 دسمبر کو واپس پہنچے گا۔
آرٹیمس 1 مشن کی کامیابی مستقبل میں چاند کے لیے انسانی مشنز کی راہ ہموار کرے گی۔
آرٹیمس 1 کے بعد آرٹیمس 2 مشن میں انسانوں کو خلا میں بھیجا جائے گا اور ایسا 2024 میں متوقع ہے، البتہ یہ مشن چاند پر لینڈ نہیں کرے گا۔
آرٹیمس 3 وہ مشن ہوگا جس میں خلا بازوں کو 2025 میں چاند پر بھیجا جائے گا اور یہ وہاں کے قطب جنوبی پر لینڈ کرے گا۔