اسلام آباد: (ویب ڈیسک) بلاول بھٹو نے حساس اداروں سے آصفہ سے ڈرون کیمرہ ٹکرانے کی تحقیقات کا مطالبہ کر دیا۔ انہوں نے کہا کہ ڈرون کا آصفہ بھٹو کی طرف بڑھنا میرے اور میرے والد کیلئے پیغام تھا، کل وزیراعظم نے بندوق کی دھمکی دی جو برداشت نہیں کریں گے۔
چیئرمین پیپلزپارٹی بلاول بھٹو زرداری نے اسلام آباد میں نیوز کانفرنس کرتے ہوئے کہا کہ پیپلزپارٹی کا عوامی مارچ عدم اعتماد کیلئے تھا، پاکستان کے عوام نے سلیکٹڈ وزیراعظم کو مسترد کر دیا، حکومت ہر معاملے میں ناکام ہوچکی، پارلیمان پر بڑی ذمہ داری ہے کہ عوامی امیدوں پر پورا اترے، پارلیمان میں بیٹھے لوگوں کو عوامی مطالبے کو ماننا پڑے گا، 2018 میں اس پارلیمان سے جو غلطی ہوئی اسے درست کیا جائے گا۔
بلاول بھٹو کا کہنا تھا کہ حساس ادارے آصفہ بھٹو پر ہوئے حملے کی تحقیقات کریں، یہ سمجھتے ہیں ہم بچے ہیں، ہم اب بچے نہیں رہے، جو میں آپ کیساتھ کروں گا آپ کی نسلیں نہیں بھولیں گی، ہم نے کبھی بندوق استعمال نہیں کی مگر استعمال کرنا جانتے ہیں، ہمارے ساتھ سیاست کریں، سیاست کرنا ہمارا اور آپ کا حق ہے، جو سمجھتے ہیں ہم ڈر جائیں گے، جان لیں ہمارے اندر شہیدوں کا خون ہے، اب گالی دینے سے وزیراعظم کی کرسی نہیں بچے گی، یہ جتنا بوکھلاہٹ کا شکار ہوں گے اتنی گالیاں دیں گے۔
چیئرمین پیپلزپارٹی نے مزید کہا کہ آپ نے اپنی ماں کے نام پر کینسر اسپتال بنا کر پیسہ کھایا، خاتون اول کی کرپشن سے متعلق کہانیوں پر آپ کیا کہتے ہیں ؟ ہمیں بتایا گیا خاتون اول کو جب تک پیسہ نہیں ملتا کوئی ٹرانسفر پوسٹنگ نہیں ہوتی، خاتون اول کیلئے بہت احترام ہے، کبھی غلط زبان استعمال نہیں کی، علیمہ باجی نے سلائی مشین بیچ بیچ کر اتنا پیسہ کمایا، شہباز شریف سے وقت پر درخواست کریں گے کوئی اچھا وزیر داخلہ رکھیں، فضل الرحمان کو گالی دینے والے تم ہوتے کون ہو ؟۔
بلاول بھٹو کا کہنا تھا کہ پنجاب میں تبادلے، تقرریاں نہیں ہوسکتیں جب تک خاتون اول کو پیسہ نہ دیا جائے، قائد عوام نے اکرام اللہ نیازی کو کرپشن پر ہٹایا جو یہ آج تک نہیں بھولے، جو کیسز آپ پر بننے والے ہیں عمران خان کو اندازہ ہی نہیں، اب آپ خاتون اول سے دعا کرائیں، آپ نے ہمارے خلاف جو کرنا ہے آج کرو کل موقع نہیں ملے گا، وزیراعظم کے کل کے بیان پر قانونی طریقہ کار اپنایا جائےگا، اینٹ کا جواب اینٹ سے دوں گا۔

یوکرین پر روس کے حملے کے بعد ماسکو پر عائد کی جانے والی پابندیوں کی وجہ سے سپلائی کے خدشات کسی حد تک ممکنہ طور پر کم کرنے کے لیے متحدہ عرب امارات کی جانب سے اوپیک کے ساتھی ممبران سے پیداوار کو بڑھانے کے متوقع مطالبے کی اطلاعات کے بعد تیل کی قیمت میں 12 فیصد سے زائد کمی آئی ہے۔

ڈان اخبار میں خبررساں ادارے ’رائٹرز‘ کی شائع رپورٹ کے مطابق عالمی سطح پر تیل کی قیمتیں تاریخ کی بلند ترین سطح سے نیچے آنے سے روسی سپلائی میں رکاوٹ سے متعلق کچھ سرمایہ کاروں کے خدشات کم ہوگئے، بین الاقوامی توانائی ایجنسی نے کہا کہ تیل کے ذخائر کو مزید استعمال کیا جاسکتا ہے۔

قیمتوں میں کمی فنانشل ٹائمز کی اس رپورٹ کے بعد سامنے آئی جس کے مطابق واشنگٹن میں متحدہ عرب امارات کے سفیر یوسف العتیبہ نے کہا کہ متحدہ عرب امارات تیل کی پیداوار بڑھانے کا حامی ہے۔

میزوہو میں توانائی کے مستقبل کے ڈائریکٹر باب یاوگر نے کہا کہ یہ معمولی نہیں ہے، وہ تقریباً 8 لاکھ بیرل بہت تیزی سے مارکیٹ میں لا سکتے ہیں، حتیٰ کہ وہ فوری طور پر روسی سپلائی کا ساتواں حصہ مارکیٹ میں لا سکتے ہیں۔

برینٹ آئل 12.4 فیصد کم ہوکر 112.15 ڈالر فی بیرل پر آگیا، جب کہ ڈبلیو ٹی آئی 11.4 فیصد کم ہوکر 109.59 ڈالر فی بیرل ہوگیا۔

دنیا کے دوسرے بڑے خام تیل کے برآمد کنندہ روس کی جانب سے یوکرین پر حملہ کے بعد دنیا نے روس پر تیل کی درآمد پر پابندی سمیت دیگر مالی پابندیوں کی صورت میں ان حملوں کا جواب دیا، اس وقت سے عالمی مارکیٹ میں تیل کی قیمتوں میں 30 فیصد سے زائد اضافہ ہوا اور یہ 2008 کی بلند ترین سطح یعنی 139 ڈالر فی بیرل پر پہنچ گیا۔

اسلام آباد: (ویب ڈیسک) شیخ رشید نے کہا ہے کہ اپوزیشن شوق پورا کرلے، عمران خان جیتنے جا رہے ہیں، اپوزیشن کے ساتھ اپریل فول منائیں گے۔
وفاقی وزیر داخلہ شیخ رشید نے اسلام آباد میں میڈیا سے گفتگو کرتے ہوئے کہا کہ 23 سے 30 مارچ اہم ہفتہ ہے، اپوزیشن شوق پورا کرلے، عمران خان جیتنے جا رہے ہیں، ہارس ٹریڈنگ ختم کرنے کیلئے اسپیکر کو اختیارات دیئے گئے، اسپیکر کے اختیارات کو کوئی چیلنج نہیں کرسکتا، اب چھانگا مانگا ہے نہ ہی مری، جہاں یہ ارکان کو رکھیں گے، 172 ارکان اپوزیشن کو لے کر آنے پڑیں گے، تحریک عدم اعتماد عمران خان کیلئے اطمینان کی تحریک بنے گی۔
شیخ رشید کا کہنا تھا کہ 30 یا 31 کو اپوزیشن کیساتھ ارکان اسمبلی اپریل فول منائیں گے، تینوں پارٹیاں انجمن مفاد باہمی میں اکٹھی ہوئی ہیں، اپوزیشن کہہ رہی ہے امپائر نیوٹرل ہے، اللہ کا شکر ہے، ہارنے پر یہ کسی نئے امپائر کا کھاتہ نہ کھول دیں، ہارنے والوں کو نیوٹرل امپائر والے بیان پر قائم رہنا ہوگا، اسپیکر کے پاس 14 روز ہوتے ہیں وہ جب چاہیں اجلاس بلالیں، عمران خان کے ساتھ سائے کی طرح کھڑا ہوں، بلاول کی ریلی مایوس کن تھی، ہماری سکیورٹی ان کے لوگوں سے زیادہ تھی۔