کراچی: (ویب ڈیسک) کراچی ساحل دودریا کے قریب دو گاڑیوں میں تصادم کے نتیجے میں ایک خاتون جاں بحق جبکہ خاتون سمیت تین افراد زخمی ہو گئے، دوسری جانب رات گئے ٹریفک حادثات میں دو افراد جاں بحق ہو گئے۔ دو پولیس مقابلوں میں دو ڈاکووں کو زخمی حالت میں گرفتار کر کے اسلحہ برآمد کر لیا گیا۔
کراچی ساحل دو دریا کے قریب دو گاڑیوں میں تصادم کے متاثرین کراچی یونیورسٹی کے طالب علم تھے۔ جاں بحق خاتون کی شناخت اومی کے نام سے ہوئی۔ خاتون کا تعلق سومالیہ سے تھا، تمام زخمیوں کا تعلق کینیا سے تھا اور کراچی یونیورسٹی کے ہاسٹل میں رہائش پذیر تھے۔
پولیس کے مطابق متاثرہ افراد کی کار نے ڈبل کیبن گاڑی کوہٹ کیا جس کی وجہ سے حادثہ پیش آیا۔ دوسری جانب شارع فیصل کارساز کے قریب ٹریفک حادثے میں موٹرسائیکل رائڈر جاں بحق ہو گیا، پولیس کے مطابق واقعہ تیز رفتاری کے باعث پیش آیا۔
ادھر سلطان آباد پی آئی ڈی سی کے قریب نامعلوم تیز رفتار گاڑی کی ٹکر سے موٹرسائیکل سوار 26 سالہ مصطفی جان بحق ہو گیا، لاش کو سول ہسپتال منتقل کر دیا گیا۔
کراچی میں رات گئے دو مبینہ پولیس مقابلے ہوئے، گلشن معمار ناردرن بائی پاس اور ملیر ہالٹ کے قریب پولیس مقابلوں میں دو ڈاکووں کو زخمی حالت میں گرفتار کر کے اسلحہ اور مسروقہ سامان برآمد کر لیا گیا۔

لاہور: (ویب ڈیسک) موسم کا حال بتانے والوں نے آج ملک کے اکثر علاقوں میں موسم خشک رہنے کی پیشگوئی کی ہے، گلگت بلتستان میں بارش کا امکان ہے۔
محکمہ موسمیات کے مطابق آج پنجاب،سندھ اور خیبرپختونخوا میں موسم خشک رہے گا، گلگت بلتستان کے کچھ علاقوں میں ہلکی بارش اور برفباری کی توقع ہے۔
اسلام آباد میں مطلع ابر آلود رہے گا، بلوچستان میں کوئٹہ اور قلات میں موسم سرد رہنےکی پیشگوئی ہے۔

پشاور: (ویب ڈیسک) خیبرپختونخوا کے 13 اضلاع میں بلدیاتی انتخابات کے لیے ری پولنگ آج ہو رہی ہے جو بغیر کسی وقفے شام 5 بجے تک جاری رہے گی۔ کسی ناخوشگوار واقعے سے نمٹنے کیلئے سکیورٹی کے سخت انتظامات کئے گئے ہیں۔
پشاور سمیت چارسدہ، نوشہرہ، خیبر، مہمند، مردان، کوہاٹ، کرک، بنوں، لکی مروت، ڈیرہ اسماعیل خان، بونیر اور باجوڑ میں مجموعی طور پر 500 سے زائد پولنگ سٹیشن قائم کیے گئے ہیں۔ لوکل باڈی الیکشن میں سات لاکھ سے زائد ووٹر حق رائے دہی استعمال کریں گے، ڈیرہ اسماعیل خان میں میئر کی نشست کا انتخاب مرکز نگاہ ہے، عمر امین گنڈاپور، فیصل کریم کنڈی اور کفیل نظامی میں کڑا مقابلہ متوقع ہے۔
ری پولنگ میئرسٹی ، تحصیل چیئرمین، نیبرہڈ اورویلیج کونسل کی نشستوں پر ہو رہی ہے، انتخابات کے پہلے مرحلے میں پولنگ سٹیشنز پر توڑ پھوڑ، ہنگامہ آرائی اور امیدواروں کی وفات کے باعث پولنگ روک دی گئی تھی۔

اسلام آباد: (ویب ڈیسک) کورونا کی پانچویں لہر نے مزید 41 افراد کی جان لے لی، چوبیس گھنٹوں میں تین ہزار 206 مریض سامنے آ گئے۔
این سی او سی کے مطابق کورونا سے اب تک ہونے والی اموات کی تعداد 29 ہزار 772 ہو گئی ہے، 14 لاکھ 83 ہزار 798 شہری وبا سے متاثر ہیں جبکہ کورونا کے ایکٹو کیسز کی تعداد 78 ہزار 398 ہو گئی ہے۔ ملک بھر میں مثبت کیسز کی شرح پانچ اعشاریہ سات نو فیصد ریکارڈ کی گئی۔
گذشتہ 24 گھنٹے کے دوران 55 ہزار 304 کوروناٹیسٹ کیےگئے، مجموعی طور پر تاحال ملک بھر میں 2 کروڑ 57 لاکھ 51 ہزار 321 ٹیسٹ کیے جا چکے ہیں۔ گذشتہ روز کورونا کے 4935 مریض صحت یاب ہوئے جس کے بعد شفا پانے والے افراد کی مجموعی تعداد 13لاکھ 75 ہزار 628 ہو گئی ہے،کورونا سے متاثر 1623 مریضوں کی حالت تشویشناک ہے۔
اعدادوشمار کے مطابق پنجاب میں 4 لاکھ 94 ہزار 971، سندھ میں 5 لاکھ 57 ہزار 931 کیسز، خیبرپختونخوا 2 لاکھ 9 ہزار 758 اور بلوچستان سے اب تک 35 ہزار 56 کیسز رپورٹ ہوئے ہیں۔ اسلام آبادایک لاکھ 33 ہزار 37، گلگت بلتستان میں 11 ہزار 183 کیسز اور آزاد کشمیر میں کورونا مریضوں کی تعداد 41 ہزار 862 ہو گئی۔