لاہور: (ویب ڈیسک) وزیراعظم عمران خان کے خلاف تحریک عدم اعتماد کے اعلان کے بعد سیاسی رابطے تیز ہو گئے ہیں، لیگی صدر شہباز شریف کی چودھری برادران سے کل ملاقات کرینگے۔
یاد رہے کہ گزشتہ روز پاکستان ڈیمو کریٹک موومنٹ (پی ڈی ایم) نے وزیراعظم عمران خان کے تحریک عدم اعتماد کا لانے کا اعلان کیا ہے جس کے بعد سیاسی ماحول میں گرم ہو گیا ہے، سیاسی رہنما ایک دوسرے کے ساتھ رابطوں میں تیزی لا رہے ہیں۔
دوسری طرف قومی اسمبلی میں اپوزیشن لیڈر شہباز شریف کل چودھری شجاعت حسین اور چودھری پرویز الٰہی سے ملاقات کریں گے جس کے کے امور فائنل کر لیے ہیں، آج رات ملاقات کے شیڈول کو حتمی شکل دی جائے گی۔
لیگی صدر ق لیگ کے سربراہ چودھری شجاعت حسین کی تیمارداری کے لئے کل ان کی رہائش گاہ پہنچیں گے اور ملاقات میں سیاسی معاملات پر بات چیت کریں گے۔

لاہور: (ویب ڈیسک) حکومت مخالف اتحاد پاکستان ڈیمو کریٹک موومنٹ (پی ڈی ایم) کے سربراہ اور امیر جمعیت علمائے اسلام (ف) نے کہا ہے کہ حکومت خارجہ محاذ پر ناکام ہوچکی،عمران خان کا فون تو مودی بھی نہیں سنتا، چینی قیادت نے وزیراعظم سے ویڈیولنک پر بات کی۔
لاہور میں جامع مدینہ میں ختم بخاری شریف کی تقریب سے خطاب کرتے ہوئے پی ڈی ایم سربراہ کا کہنا تھا کہ کچھ وزراء کو وزیراعظم عمران خان نے اسناد عطا کیں جس کا مطلب انکا کھیل ختم ہوجاتاہے، ہم نے اپنے آنے والے کھیل کا عندیہ دیدیا ہے، حسن کارکردگی کا نام نہیں لے سکتا وگرنہ نوجوانوں کو عجیب خیال آئیں گے، کبھی کہتے معاشی ترقی کو دنیا نے تسلیم کر لیا، جب خود کہا تو خزانے کے وزیر کو سند سے کیوں محروم رکھا۔
انہوں نے کہا کہ حکمران کہتے ہیں وزیر خارجہ کی بہترین پرفارمنس ہے تو شاہ محمود کو سند سے کیوں محروم رکھا گیا، اگر دفاع محفوظ ہاتھوں میں ہے تو پرویز خٹک کو کیوں سند نہیں دی، وزارت ابلاغ میں فواد چودھری کو اخلاقیات کو گھر چھوڑ آتے ہیں تو اسے کیوں نہ سند دیا، شیخ رشید کو بھی سند سے محروم کر دیا، سمجھ نہیں آئی ترجیحات کیسے ذہن میں آئیں۔
مولانا فضل الرحمان نے کہا کہ ادھر سے تمغے دے رہے ہیں، حالیہ منی بجٹ میں ٹیکس بڑھا دیا، آج سے تین روپے کی بجلی کی قیمت بڑھا دی، عام آدمی اپنے بچوں کو زبح و دریا برد کر رہے ہیں، پارلیمنٹ کے سامنے بچے برائے فروخت کے کتبے لگائے جا رہے ہیں اور آپ تمغے دے رہے ہو۔ کامیاب خارجہ پالیسی کا حال دیکھیں امریکی دصر جوبائیڈن فون نہیں کرتا، مودی فون سنتا نہیں، چین جاتا تو چینی قیادت ویڈیو لنک پر بات چیت کرتی ہے۔
انہوں نے کہا کہ اگر کورونا کا بہانہ تھا تو روسی صدر ولادیمیر پیوٹن سے کیوں اسی روز ملاقات کی۔ کوئی پڑوسی ہم سے خوش نہیں، ایران خارجہ پالیسی پر بھارت کے پلڑے میں کھڑا ہے، چین پاک چین اقتصادی راہداری (سی پیک) پر نالاں ہے۔ سعودی عرب کا قرضہ اتارنے کےلئے چودہ فیصد چین نے پیسہ دیا۔

لاہور: (ویب ڈیسک) مسلم لیگ (ن) کے صدر شہبازشریف کا کہنا ہے کہ عوام کی طرف سے عدم اعتماد کا حکم جاری کرنے کا وقت آگیا ہے۔
بجلی کی قیمت میں 3 روپے سے زائد اضافہ مسترد کرتے ہوئے مسلم لیگ (ن) کے صدر اور پارلیمنٹ میں قائد حزب اختلاف شہبازشریف کا کہنا تھا کہ 4 سال میں ثابت ہوا کہ حکومت کے پاس صرف مہنگائی اور کرپشن پلان ہے، عوام کو ریلیف تو نہیں مل سکا، صرف تکلیف در تکلیف کا سلسلہ جاری ہے، عمران نیازی مہنگائی سے عوام کی زندگیاں چھیننے کے بجائے مستعفی ہوجائیں۔
شہباز شریف کا کہنا تھا کہ یہ حکومت صرف مہنگائی کی تبدیلی لائی، ہرروز اشیاء کی قیمت تبدیل ہوجاتی ہے، غریب دشمن حکومت ہر روز مہنگائی کا حکم جاری کرتی ہے، عمران نیازی ہر روز مہنگائی کی بجلی عوام پر گراتے ہیں، بجلی کے بعد اب پٹرول بم گرانے کی تیاری ہے، ایسی نکمی اور نااہل ترین، کرپٹ حکومت کا خاتمہ ہی عوام کے ریلیف کا واحد ذریعہ ہے، اب عوام کی طرف سے ان پر عدم اعتماد کا حکم جاری کرنے کا وقت آگیا ہے، تحریک عدم اعتماد کے ذریعے عوام کو اس ظالم حکومت سے نجات دلائیں گے۔

پشاور: (ویب ڈیسک) خیبر پختونخوا کے 13 اضلاع میں بلدیاتی انتخابات کے لیے ری پولنگ اتوار کو ہو گی، مجموعی طور پر 500 سے زائد پولنگ سٹیشن قائم کئے گئے ہیں۔
پشاور سمیت چارسدہ، نوشہرہ، خیبر، مہمند، مردان، کوہاٹ، کرک، بنوں، لکی مروت، ڈیرہ اسماعیل خان، بونیر اور باجوڑ میں ری پولنگ ہوگی، پولنگ کا عمل صبح 8 بجے سے شام 5 بجے تک جاری رہے گا، بنوں تحصیل بکاخیل میں پولنگ کے اوقات میں تبدیلی کرتے ہوئے پولنگ صبح 30۔9 بجے سے شام 30۔5 بجے تک ہوگی۔
صوبے کے 13 اضلاع میں ری پولنگ میئرسٹی ، تحصیل چیئرمین، نیبرہڈ اورویلیج کونسل کی نشستوں پر ہو گی، انتخابات کےپہلے مرحلے میں پولنگ سٹیشنز پرتوڑ پھوڑ،ہنگامہ آرائی اور امیدواروں کی وفات کے باعث پولنگ روک دی گئی تھی۔
اُدھر ڈی آئی خان میں سٹی میئر کے لئے بلدیاتی انتخاب کا ٹاکرا کل ہوگا، پولنگ کے لیے مجموعی طورپر 302 پولنگ سٹیشنز اور 1039 پولنگ بوتھ قائم کئے گئے ہیں، سٹی مئیر کی نشست کے لیے مجموعی طورپر 3لاکھ 44ہزارووٹر اپناحق رائے دہی کااستعمال کرینگے

لاہور: (ویب ڈیسک) مسلم لیگ ن کے رہنما حمزہ شہباز کا کہنا ہے کہ اسمبلی کے اندر اور سڑکوں پر عوام کے ساتھ مل کر عمران نیازی کا بستر گول کریں گے، تحریک عدم اعتماد پر بھی کام کر رہے ہیں، کامیاب ہوں گے۔
حمزہ شہباز نے کہ کہ ملک کا سب سے بڑا مافیا عمران نیازی ہے، عمران نیازی نے جھوٹ بول کر پرانا پاکستان بھی برباد کردیا، سن لو عوام کو زیادہ دیر جھانسہ نہیں دے سکتے، عمران نیازی صاحب جھوٹ بولنا بند کرو، عوام کی عدالت عمران نیازی کی تلاشی لے گی۔

گوجوانوالہ: (ویب ڈیسک) ٹک ٹاک نے ایک اور نوجوان کی جان لے لی، گوجرانوالہ کے علاقے قلعہ دیدار سنگھ کے محلہ اشرف ٹاؤن میں 23 سالہ آصف نے والد کے ٹک ٹاک ویڈیوز بنانے سے منع کرنے پر زہر کی گولیاں کھا کر زندگی کا خاتمہ کرلیا۔
پولیس حکام کے مطابق نوجوان کا والد مصطفیٰ پولیس کانسٹیبل ہے، اور اس نے اپنے بیٹے کو ٹک ٹاک ویڈیو بنانے پر ڈانٹا تھا، 23 سالہ آصف نے دل برداشتہ ہوکر زہر کی گولیاں کھا لیں، اسے فوری طور پر رورل ہیلتھ سینٹر پہنچایا گیا، جہاں دوران علاج دم توڑ گیا۔

لاہور: (ویب ڈیسک) نیپرا کی طرف سے 3 روپے 10 پیسے فی یونٹ بجلی مہنگی کیے جانے کے بعد پاکستان مسلم لیگ ن کی نائب صدر مریم نواز حکومت پر برس پڑیں۔
مسلم لیگ ن کی نائب صدر نے سماجی رابطے کی ویب سائٹ ٹویٹر پر لکھا کہ یہ واحد حکومت ہے جس میں عوام خود اپنے خلاف لوڈشیڈنگ کرنے پر مجبور ہو گئی ہے۔ بجلی کی قیمتوں میں روزانہ اضافے سے بجلی عوام کے دسترس سے باہر ہوگئی ہے۔
انہوں نے کہا کہ عوام سے روٹی اور دوسری ضروریات زندگی چھیننے کے بعد عوام سے وہ روشنیاں بھی چھین لی گئیں جو نوازشریف نے لوٹائی تھیں۔