کراچی: (ویب ڈیسک)
ایچ بی ایل پی ایس ایل 7 میں شریک تمام کھلاڑیوں کو معاوضوں کی 70 فیصد رقم ادا کر دی گئی جب کہ باقی 30 فیصد ایونٹ ختم ہونے کے6ہفتوں میں دے دی جائے گی۔
ایچ بی ایل پی ایس ایل کا ساتواں ایڈیشن ان دنوں لاہور میں جاری ہے،34 میں سے 17 میچز مکمل ہو چکے،گزشتہ روز پی سی بی نے تمام شریک کھلاڑیوں کو معاوضوں کی 70 فیصد رقم بذریعہ چیک ادا کردی،پاکستانی کھلاڑیوں کو روپے میں ادائیگی ہوئی، غیرملکی کرکٹرز کے معاوضوں کی رقم ڈالر میں تقسیم کر کے دی گئی،اس میں سے واجب الادا ٹیکس کی رقم منہا کر لی گئی۔
معاوضوں کا باقی30فیصد حصہ ایونٹ ختم ہونے کے بعد6 ہفتوں میں دینا ہوگا،پی سی بی ذرائع نے اس حوالے سے بتایا کہ ابتدا سے ہی ایچ بی ایل پی ایس ایل نے اپنا ایک معیار قائم کیا ہے، ہم معاوضوں میں کبھی تاخیر نہیں کرتے کیونکہ ایسا کرنے کی صورت میں نہ صرف ایونٹ بلکہ ملک کا بھی خراب امیج سامنے آتا ہے۔
کھلاڑی ایک دوسرے کو جب اس حوالے سے آگاہ کرتے ہیں تو بعد میں بڑے ناموں کو بلانے میں بھی مشکلات ہوتی ہیں،اسی لیے ہم نے ایک مربوط سسٹم بنایا ہے۔
دوسری جانب چیک ملنے پر مسرور ایک کرکٹر نے کہا کہ پہلے تو ایونٹ شروع ہونے کے چند دن بعد ہی کافی رقم مل جاتی تھی اس بار تو کئی دن گذرنے کے بعد ایسا ہوا، البتہ ہم خوش ہیں کہ زیادہ تاخیرنہیں ہوئی۔
واضح رہے کہ پی سی بی کھلاڑیوں کو معاوضوں کی ادائیگی خود کرتا ہے، ٹورنامنٹ ختم ہونے کے بعد سینٹرل ریونیو پول میں سے فرنچائزز سے یہ رقم واپس لے لی جاتی ہے، سری لنکا اور بنگلادیش کی لیگز میں کھلاڑی معاوضوں میں تاخیر کی شکایت کرتے رہے ہیں، اس کی وجہ فرنچائزز کو براہ راست ادائیگی کا اختیار دینا تھی، اسی لیے پی سی بی نے یہ ذمہ داری اپنے ذمہ لی ہے۔

کراچی: (ویب ڈیسک)
ٹیسٹ اسکواڈ کی سلیکشن پر تبصرہ جھاڑتے ہوئے یونس خان حقائق سے لاعلم نکلے۔
آسٹریلیا سے ہوم ٹیسٹ سیریز کیلیے منتخب اسکواڈ پر تبصرہ کرتے ہوئے یونس خان حقائق سے لاعلمی میں کئی باتیں کرگئے۔
ٹی وی پر تبصرے میں سابق کپتان نے کہا کہ حال ہی میں ختم ہونے والے ڈومیسٹک سیزن میں کھلاڑیوں کی کارکردگی پر نظر ڈالیں تو کم بیک کرنے والے فہیم اشرف کی کیا پرفارمنس ہے؟ حارث رؤف اور امام الحق نے کتنی 4 روزہ کرکٹ کھیلی؟ شان مسعود ایچ پی ایل پی ایس ایل 7میں تو بہترین پرفارم کررہے ہیں،کیا ان کو ٹی ٹوئنٹی میں پرفارمنس کی بنیاد پر ٹیسٹ اسکواڈ میں شامل کیا گیا ہے؟
واضح رہے کہ شان مسعود نے گذشتہ فرسٹ کلاس سیزن کی8 اننگز میں 71.71کی اوسط سے 502رنز بنائے،ان میں 3سنچریاں بھی شامل ہیں،ان کا اسٹرائیک ریٹ 95.98بھی سب سے بہتر ہے۔ امام الحق نے7اننگز میں 531رنز اسکور کیے، ایوریج بھی 106.20رہی،انھوں نے 2سنچریاں اور اتنی ہی ففٹیز بھی بنائیں۔
دوسری جانب فہیم اشرف دورہ نیوزی لینڈ2020سے اب تک مسلسل ٹیسٹ اسکواڈ کا حصہ ہیں،آل راؤنڈر جب منتخب ہوئے تو یونس خان ہی بیٹنگ کوچ تھے مگر وہ کھل کر تبصرہ جھاڑتے ہوئے حقائق کو یکسر نظر انداز کرگئے، حالانکہ اعداد و شمارکی انٹرنیٹ پر متعلقہ ویب سائٹس کی کوئی کمی نہیں۔
یاد رہے کہ آسٹریلوی ٹیم کے دورہ پاکستان میں محمد یوسف بیٹنگ کوچ کی ذمہ داری سنبھالیں گے۔

احمد آباد: (ویب ڈیسک)
ویراٹ کوہلی 15 ویں بار صفر پر آؤٹ ہو گئے۔
ویسٹ انڈیز سے ہوم سیریز کے تیسرے اور آخری ون ڈے میں ویراٹ کوہلی 2 بالز پر بغیر کوئی رن بنائے پویلین لوٹ گئے، الزاری جوزف کی گیند پر وکٹ کیپر شائی ہوپ نے کیچ تھاما۔
کوہلی نے ویسٹ انڈیز سے تین میچزمیں 8، 18 اور 0 کے ساتھ8.66 کی اوسط پائی،یہ کسی بھی سیریز میں ان کی دوسری بدترین کارکردگی شمار ہوئی، اس سے قبل پاکستان کیخلاف 13-2012 کی سیریز کیے تین میچز میں انھوں نے محض 13 رنز بنائے تھے،اوسط 4.33 رہی تھی۔
اس سے قبل کوہلی بنگلادیش کیخلاف جون 2015 کی سیریز میں 50 پلس اسکور کرنے میں ناکام رہے تھے۔ون ڈے فارمیٹ میں وہ 15 ویں مرتبہ صفر کی خفت سے دوچار ہوئے ہیں۔