کراچی: (ویب ڈیسک) پاکستان پیپلز پارٹی کے چیئرمین بلاول بھٹو زرداری نے کہا ہے کہ یہ جمہوریت کی فتح ہے کہ اپوزیشن کی زیادہ تر سیاسی جماعتیں اب حکومت کے خلاف تحریک عدم اعتماد لانے کے حوالے سے متفق ہیں۔
پاکستان ڈیمو کریٹک موومنٹ (پی ڈی ایم) کی جانب سے حکومت کے خلاف تحریک عدم اعتماد لانے کے اعلان کے حوالے سے سماجی رابطے کی ویب سائٹ ٹوئٹر پر پیغام جاری کرتے ہوئے پی پی چیئرمین بلاول بھٹو زرداری نے کہا کہ وزیراعظم عوام کا اعتماد کھوچکے ہیں اور وقت آگیا ہے کہ وہ پارلیمان کا اعتماد بھی کھودیں۔

راولپنڈی: (ویب ڈیسک) آرمی چیف جنرل قمر جاوید باجوہ نے نگرپارکر کا دورہ کیا، پورادن جوانوں کے ساتھ گزارا، سپہ سالار کو فارمیشن کی آپریشنل تیاریوں پر بریفنگ دی گئی، جنرل قمر جاوید باجوہ نے ہندو کمیونٹی کے افراد سے بھی ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کو نگر پارکر کے دورہ پر لوکل کمانڈر نے فارمیشن کی آپریشنل تیاریوں پر بریفنگ دی، کورکمانڈر کراچی اور ڈی جی رینجرز سندھ بھی ہمراہ تھے، سپہ سالار نے افسروں اور جوانوں کے بلند مورال کو سراہا۔
آئی ایس پی آر کے مطابق جوانوں سے خطاب کرتے ہوئے جنرل قمر جاوید باجوہ نے کہا کہ اپنی پیشہ ورانہ تیاروں پر توجہ موکوز رکھیں، کسی بھی ابھرتے ہوئے چیلنج کے موثر جواب کے لئے بھرپور تربیت جاری رکھیں۔
آئی ایس پی آر کے مطابق آرمی چیف نے مقامی ہندو کمیونٹی کے لوگوں سے بھی ملاقات کی ، ہندو کمیونٹی سے گفتگو کرتے ہوئے کہا کہ پاکستان میں اقلیتیں برابر کے شہری ہیں، یہ ریاست کی ذمہ داری ہے کہ اقلیتوں کی حفاظت کرے۔
آئی ایس پی آر کے مطابق ہندو کمیونٹی نے ملک میں اقلیتوں کو محفوظ ماحول فراہم کرنے پر پاکستان کی کوششوں کو سراہا اور کہا کہ ہندو کمیونٹی پاکستان کی معاشی ترقی میں اپنا بھرپور کردار ادا کر رہی ہے۔

اسلام آباد: (ویب ڈیسک) وفاقی وزیر اطلاعات و نشریات فواد چودھری نے کہا ہے کہ کسی مائی کے لال میں اتنی جرات نہیں کہ تحریک عدم اعتماد لاسکے۔
پاکستان تحریک انصاف سے تعلق رکھنے والے وفاقی وزیر فواد چودھری نے کہا کہ اب سے کچھ دیر پہلے پاکستان کرپشن لمیٹڈ پارٹی کی بیٹھک ہوئی۔ انہوں نے کہا کہ پی ڈی ایم کو چیلنج کرتا ہوں کہ کل تحریک عدم اعتماد لے کرآئیں۔
وفاقی وزیر فواد چودھری نے کہا کہ مولانا فضل الرحمان کے بازووں میں حکومت کو گھر بھیجنے کی طاقت نہیں ہے۔ انہوں ںے کہا کہ اپوزیشن کے اپنے اراکین سرپرائز دیں گے۔
فواد چودھری نے کہا کہ عدم اعتماد لے کر آئیں آ پ کو آٹے دال کا بھاؤ پتہ چل جائے گا۔ انہوں نے کہا کہ آپ کے اوپر 18 فروری کو فرد جرم عائد ہونی ہے۔
فواد چودھری نے کہا کہ آپ سیاست میں وہ چوہے ہیں جن کا خیال ہے کہ چھت پر زیادہ دوڑنے سے زیادہ آواز آئے گی۔

کراچی: (ویب ڈیسک) سندھ اسمبلی نے 38 سالوں سے عائد طلبہ یونینز پر پابندی ختم کرنے کا بل متفقہ طور پر منظور کر لیا۔
ایوان میں طلبہ یونین سے متعلق مجوزہ بل قائمہ کمیٹی برائے قانون سے منظوری کے بعد پیر مجیب الحق نے پیش کیا۔
متفقہ طور پر بل منظوری کے بعد قائد ایوان مراد علی شاہ نے سب جماعتوں کا شکریہ ادا کرتے ہوئے کہا کہ بل میں طلبہ یونین سے متعلق قواعد ہیں، امید ہے کہ طلبہ یونین تدریسی عمل کو متاثر یا بند نہیں کروائیں گی۔
سندھ اسمبلی سے منظور شدہ بل کے مطابق طلبہ انتخابات سے 7 سے 11 نمائندوں پرمشتمل یونین کومنتخب کریں گے اور تعلیمی اداروں میں ہرسال طلبہ یونین کے انتخابات ہوں گے۔
بل میں کہا گیا ہے کہ تعلیمی ادارے کی سینیٹ اور سینڈیکٹ میں طلبہ یونین کی نمائندگی ہوگی جبکہ تعلیمی ادارے کی انسداد ہراساں کمیٹی میں بھی یونین کی نمائندگی ہوگی۔

اسلام آباد: (ویب ڈیسک) وفاقی وزیر داخلہ شیخ رشید احمد نے کہا ہے کہ تحریک عدم اعتماد لائی گئی تو ان کے لوگ کم نکلیں گے۔ ان کا کہنا تھا کہ اپوزیشن کے پاس کرنے کے لیے کچھ نہیں ہے۔
عوامی مسلم لیگ کے سربراہ شیخ رشید احمد نے کہا کہ بھارت میں اسلام جاگ گیا اور اپوزیشن اسلام آباد فتح کرنے آرہی ہے۔
انہوں نے اعتراف کیا کہ نوازشریف کو واپس لانے کی کوشش کر رہے ہیں، ابھی تک حل نہیں نکلا ہے۔ ان کا کہنا تھا کہ عمران خان جتنے مسائل حل کرسکتے ہیں کر رہے ہیں۔ انہوں نے کہا کہ تحریک انصاف عمران خان کا نام ہے۔
وفاقی وزیر داخلہ شیخ رشید احمد نے کہا کہ چودھری شجاعت کو جانتا ہوں وہ ہمارے ساتھ کھڑے ہیں۔ انہوں نے کہا کہ اپوزیشن کو لانگ مارچ اورعدم اعتماد کے لیے لوگ نہیں ملیں گے۔
شیخ رشید احمد نے کہا کہ ایم کیوایم پاکستان ملاقاتیں کرتی رہتی ہے، ان کی خیر ہے۔ انہوں ںے کہا کہ اسلام آباد میں ایم کیوایم کا دفتر ہے تو صبح کھول دوں گا۔
وزیرداخلہ شیخ رشید نے کہا کہ عمران خان 50 دنوں بعد مزید مضبوط ہوکر نکلیں گے۔ انہوں نے دعویٰ کیا کہ تحریک عدم اعتماد میں 12 سے 13 لوگ کم نکلیں گے۔