پاکستان کے لیے نامزد امریکی سفیر ڈونلڈ بلوم کا کہنا ہے کہ پاکستان سے تجارتی اور معاشی تعلقات بڑھانا امریکا کے مفاد میں ہے۔

 امریکا کی سینیٹ کمیٹی برائے خارجہ تعلقات میں بیان دیتے ہوئے ڈونلڈ بلوم کا کہنا تھا کہ بطور سفیر پاکستان پر زور دوں گا کہ دہشت گرد گروہوں کےخلاف بلا تفریق کارروائی کرے، پاکستان اور امریکا القاعدہ، داعش اور کالعدم تحریک طالبان پاکستان (ٹی ٹی پی) کے خلاف مل کر کام کریں گے۔

ونلڈ بلوم نے کہا کہ پاکستان پر زور دیا جائے گا کہ لشکر طیبہ اور جیش محمد کے خلاف بھی کارروائی کرے، خطہ کسی اور تنازع کا متحمل نہیں ہو سکتا، ساتھ ہی پاکستان اور بھارت کے مابین تناؤ کو کم کرنے پر بھی کام کیا جائے گا، باہمی اور  دوطرفہ تعلقات کے لیے بھارت اور پاکستان دونوں کو ہی کام کرنا ہوگا۔

امریکی سفیر کا کہنا تھا کہ اقلیتوں کے ساتھ سلوک نے پاکستان کا امیج خراب کیا، اقلیتوں کے حقوق اور مذہبی آزادی کے لیے بھی آواز  اٹھائی جائے گی، پاکستان کوکہا جائےگا کہ صحافیوں اور انسانی حقوق کے نمائندوں کو ہراساں نہ کیا جائے۔

کراچی کے علاقے نیو کراچی سیکٹر 5 ایف میں پولیو مہم کے دوران جھگڑا ہوگیا، جب کہ اس دوران فائرنگ سے ایک شخص پاؤں پر گولی لگنے سے زخمی بھی ہوا، جسے عباسی شہید اسپتال منتقل کردیا گیا۔
ترجمان کراچی پولیس کے مطابق علاقے میں اسسٹنٹ ڈپٹی کمشنر سینٹرل کی موجودگی میں پولیو مہم جاری تھی، ایک گھر میں پولیو رضاکار نے بچوں کو پولیو قطرے پلانے کا کہا، لیکن والدین نے بچے کو پہلے ہی قطرے پلائے جانے کا دعویٰ کیا، سرکاری افسران نے پولیو قطرے پلانے کا اصرار کیا تو جھگڑا ہوگیا، والدین کی جانب سے بچے کو پولیو کے قطرے پلانے سے انکار پر تلخ کلامی ہوئی، اور اسی دوران اسسٹنٹ ڈپٹی کمشنر کے گن مین کی جانب سے گولی چلادی گئی، جو 20 سالہ نوجوان عقیل کی ٹانگ پر لگی، نوجوان کو فوری اسپتال منتقل کردیا گیا، جہاں اس کی حالت خطرے سے باہر بتائی جاتی ہے۔
پولیس حکام کے مطابق واقعے کی اطلاع ملتے ہی ایس ایس پی سینٹرل فوری موقع پر پہنچے اور صورت حال کو کنٹرول کر لیا گیا، جب کہ فائرنگ میں ملوث گن مین کو حراست میں لے کر تھانے منتقل کر دیا گیا ہے، اور علاقہ پولیس ضابطے کی کارروائی عمل میں لا رہی ہے۔

سرکاری سکول کی چوتھی جماعت سے نکالنے پر 7سالہ بچہ والد کے ہمراہ لاہور ہائیکورٹ پہنچ گیا۔
لاہور میں ایک انوکھا واقعہ پیش آیا جہاں پر سات سالہ بچہ اپنے والد کو لیکر سرکاری سکول کےخلاف لاہور ہائیکورٹ اس لئے پہنچ گیا کیونکہ اسے چوتھی جماعت سے نکال دیا گیا تھا۔
بچے کے والد کی درخواست پر عدالت نے سی ای او ایجوکیشن جھنگ سمیت دیگر سے جواب طلب کرلیا ہے۔
اس موقع پر بچے کے والد نے استدعا کی کہ اپنے بیٹے اظہر کو ٹیچر نے زبردستی جماعت سے نکالا،بیٹے کو پڑھا لکھا کر بڑا آدمی بنانا چاہتا ہوں، عدالت بیٹے کو متعلقہ سکولز مین دوبارہ داخل دینے کا حکم دے۔

وزیراعظم عمران خان کی زیر صدارت افغانستان کی صورتحال پر اجلاس جاری ہے۔
تفصیلات کے مطابق وزیر اعظم عمران خان کی زیر صدارت افغانستان کی صورتحال اور امن وامان پر اجلاس ہوا، اجلاس میں وزراء، عسکری حکام نے شرکت کی۔ مشیر خزانہ شوکت ترین، وزیر داخلہ شیخ رشید نے بھی شرکت کی۔
ذرائع کے مطابق وزیراعظم عمران خان کو افغانستان کی صورتحال پر بریفنگ دی گئی، افغانستان کی موجودہ صورتحال میں حکومتی اقدامات پر مشاورت کی گئی، اجلاس میں پاک افغان بارڈر صورتحال کا بھی جائزہ لیا گیا۔
ذرائع کے مطابق ملکی امن و امان کی صورتحال پر بھی غور کیا گیا۔ او آئی سی وزراء خارجہ اجلاس پر بھی حکمت عملی پر مشاورت ہو گی۔