اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے کہا ہے کہ پنجاب اسمبلی میں جو کچھ ہوا وہ قابل مذمت ہے، ہم ایسے شرمناک قبضہ شدہ الیکشن کو مسترد کرتے ہیں۔
سماجی رابطے کی ویب سائٹ ٹوئٹر پر پیغام جاری کرتے ہوئے عمران خان نے لکھا کہ پنجاب اسمبلی کا واقعہ تمام جمہوری اصولوں اور آئین کے خلاف تھا، ایوان میں کوئی نہیں تھا جو فرضی الیکشن کنڈکٹ کرا رہا ہو، معمول کےعمل کی خلاف ورزی کی گئی۔

لاہور: (ویب ڈیسک) گورنر پنجاب کے عہدے سے ہٹائے جانے والے عمر سرفراز چیمہ نے کہا ہے کہ صدر مملکت جب تک ڈی نوٹیفائی نہیں کرتے میں آفس ہولڈر ہوں، سیکرٹری اسمبلی کی رپورٹ پر حلف برداری کو موخر کیا گیا، ایڈووکیٹ جنرل پنجاب اور اسپیکر اسمبلی سے کل کے واقعے کی رپورٹ پر رائے مانگی ہے، وزیراعظم کے پاس گورنر کو ہٹانے کا صوابدیدی اختیار نہیں۔
لاہور میں پریس کانفرنس کرتے ہوئے عمر سرفراز چیمہ کا کہنا تھا کہ حمزہ شہباز اپنی منجی تھلے ڈانگ پھیرے، غنڈوں کو بلا کرغنڈہ گردی کی گئی، ڈپٹی اسپیکر ایک لوٹے ثابت ہوئے ہیں، غیر آئینی کام کو آئینی قرار نہیں دے سکتا، رپورٹ پر رائے آنے تک حلف نہیں لے سکتا، حلف برداری موخر کی گئی ہے۔
لاہور ہائیکورٹ کے فیصلے کے مطابق وزیراعلیٰ کا اتنخاب صاف شفاف ہونا تھا، وزیراعلیٰ پنجاب کے انتخاب سے متعلق جو کچھ ہوا وہ قوم نے دیکھا، کل جو کچھ ہوا وہ افسوسناک ہے، گزشتہ روز ارکان پنجاب اسمبلی پر تشدد کیا گیا، انہیں لوگوں نے پاک فوج کے میجر کو تشدد کا نشانہ بنایا، آئین و قانون کی دھجیاں اڑائی جارہی ہیں، پنجاب اسمبلی کے واقعے کی جتنی مذمت کی جائے وہ کم ہے، دیکھنے کی ضرورت ہے کہ کن لوگوں کو اقتدار دیا جارہا ہے۔
انہوں نے مزید کہا کہا کہ لوگوں کو ہراساں کیا جا رہا ہے، مارپیٹ کے ذریعے الیکشن نہیں ہونا چاہیے، جس کے پاس اکثریت ہوتی ہے وہ تحمل سے کام لیتا ہے، ن میں سے ش نکالنے کی کوشش کی جارہی ہے، کل کا وزیراعلیٰ کا الیکشن متنازع ہوگیا ہے، میں نے آئین و قانون کی پاسداری کا حلف لیا ہے، وزیراعلیٰ کا الیکشن لاہور ہائیکورٹ کی ہدایات کےمطابق نہیں کرایا گیا، ارکان پارلیمنٹ کے اوپر کل دھاوا بولا گیا۔
ان کا کہنا تھا کہ آئینی عہدے پر بیٹھا ہوں کوئی غیر آئینی کام نہیں کروں گا، حمزہ شہباز اپنے گھر کی خبر لیں، ان کا الیکشن گھر سے متنازع بنایا گیا، سازش کے تحت ان کو اقتدار پر مسلط کروایا جارہا ہے، سازش کے تحت ان کو اقتدار پر مسلط کروایا جارہا ہے، ان لوگوں نے 4 سال عمران خان سے این آر او مانگا، ان کی پریشانی صرف اقتدار کے لیے ہے۔

لاہور: (ویب ڈیسک) گورنر پنجاب عمر سرفراز چیمہ کو عہدے سے ہٹا دیا گیا۔
خیال رہے کہ چودھری سرور کو گورنر پنجاب کے عہدے سے ہٹانے کے بعد پاکستان تحریک انصاف کی جانب سے عمر سرفراز چیمہ کو نئے گورنر کا عہدہ سونپا گیا تھا۔
ذرائع کے مطابق اس سے قبل گورنر پنجاب عمر سرفراز چیمہ نے نو منتخب وزیراعلیٰ پنجاب حمزہ شہباز کی حلف کی تقریب موخر کروا دی اور گورنر نے آئینی ٹیم سے مشاورت مکمل کی۔
گورنر نے آئینی سفارشات صدر مملکت کو بھیجنے کا فیصلہ کیا، صدر مملکت کی آئینی ٹیم سفارشات کا جائزہ لے گی جبکہ اس حوالے سے عمر سرفراز چیمہ نے سپیکر پنجاب اسمبلی چودھری پرویزالٰہی ، سابق وزیر اعلیٰ عثمان بزدار سے بھی مشاورت کی تھی۔

ممبئی: (ویب ڈیسک) حال ہی میں رشتہ ازدواج میں منسلک ہونے والی بولی وڈ کی معروف جوڑی رنبیرکپور اور عالیہ بھٹ، جس کے شادی کے چرچے ہر زبان زد عام ہیں، کی مہندی کی دلکش تصاویر بھی بالآخر سامنے آگئیں۔
رنبیر کپور اور عالیہ بھٹ کی شادی ان کی ممبئی میں رہائش گاہ میں ہوئی تھی جس میں صرف ان کے اہلخانہ اور قریبی دوستوں نے شرکت کی تھی۔
اس شادی کی پاپاراٹزی تو خوب وائرل ہوئی تھیں تاہم وہ صرف شادی کے مقام پر آنے اور جانے والے مہمانوں کی تھی۔
تاہم اب عالیہ بھٹ نے اپنے مداحوں کے لیے اپنی رسم حنا کی تصاویر انسٹاگرام پر شیئر کردی ہیں جس میں دلہا، دلہن اور کپور خاندان نمایاں ہے۔
عالیہ بھٹ نے تصاویر کے ساتھ انسٹاگرام پر لکھا کہ رسم حنا خواب جیسا تھا، یہ دن پیار، فیملی اور دوستوں کا تھا، یہ دن بہت سارے فرنچ فرائز، لڑکے والوں کی سرپرائز پرفارمنس، مسٹر کپور کی جانب سے ایک بڑا سربرائز اور خوشی کے آنسو کے ساتھ حسین لمحات سے بھرا تھا‘۔
دوسری جانب رنبیر کپور کی والدہ نیتو سنگھ نے بھی اپنے انسٹا ہینڈل پر شادی کی تصاویر شیئر کیں۔