اسلام آباد: (ویب ڈیسک) تحریک انصاف کے وائس چیئرمین شاہ محمود قریشی کا کہنا ہے کہ ڈی جی آئی ایس پی آرکی ایک متوازن پریس کانفرنس تھی، سیاسی مداخلت کے ہمارے مؤقف کی ڈی جی آئی ایس پی آر نے تائید کی ہے۔
شاہ محمود قریشی نے کہا کہ یہ ایک خفیہ دستاویز ہے اسے پبلک اس طرح نہیں کرنا چاہیے، اس میں سکیورٹی کے کوڈ ہیں، اس سے پاکستان کا سسٹم کمپرومائز ہوسکتا ہے، مراسلے کا اخباروں میں شائع ہونا اوربازاروں میں بٹنا مناسب نہیں۔
شاہ محمود قریشی نے مزید کہا کہ آج کی پریس کانفرنس سے ہمارے مؤقف کو تقویت ملتی ہے، ہر جماعت ڈی جی آئی ایس پی آر کی پریس کانفرنس کی اپنے مطابق تشریح کرےگی، مناسب حل یہ ہے کہ سپریم کورٹ جوڈیشل کمیشن تشکیل دے، چیف جسٹس آف پاکستان مناسب ٹی او آرز کے ساتھ چھان بین کروائیں، جوڈیشل کمیشن میں سکیورٹی کمیٹی اور اسپیشل کیبنٹ کمیٹی اجلاس کے منٹس پیش کیے جائیں۔

لاہور: (ویب ڈیسک) پنجاب میں بلدیاتی انتخابات کا پہلا مرحلہ، کاغذات نامزدگی اکیس سے پچیس اپریل تک جمع ہونگے، پولنگ 9 جون کو ہوگی، الیکشن کمیشن نے شیڈول جاری کر دیا ہے۔
ترجمان الیکشن کمیشن کے مطابق کاغذات نامزدگی 21 سے 25 اپریل تک جمع کرائے جا سکیں گے، پہلے مرحلے کے دوران ضلع ڈی جی خان، راجن پور اور مظفر گڑھ میں بلدیاتی الیکشن ہوگا، لیہ، خانیوال، وہاڑی، بہاولپور، ساہیوال، پاکپتن بھی پہلے مرحلے کے اضلاع میں شامل ہیں۔
الیکشن کمیشن کا کہنا ہے کہ ٹوبہ ٹیک سنگھ، چنیوٹ، خوشاب، سیالکوٹ، حافظ آباد اور منڈی بہاؤالدین میں بھی بلدیاتی الیکشن 9 جون کو ہو گا، جہلم اور اٹک میں بھی بلدیاتی انتخابات کے لیے پولنگ 9 جون کو ہو گی جبکہ پنجاب میں بلدیاتی انتخابات کے پہلے مرحلے میں 17 اضلاع میں الیکشن ہوگا۔

لاہور:(ویب ڈیسک) حساس ادارے کے افسر حارث پر تشدد کا معاملہ، پاکستان مسلم لیگ (ن) کے رہنما خواجہ سلمان رفیق اور حافظ نعمان کی گرفتاری ڈال دی گئی ہے۔
پولیس کی جانب سے خواجہ سلمان رفیق اور حافظ نعمان کو مقدمے میں نامزد کیا گیا، مقدمہ مدعی کے مطابق خواجہ سلمان اور حافظ نعمان کی ایماء پر حارث کو بہیمانہ تشدد کا نشانہ بنایا گیا، دونوں ساتھ والی گاڑی میں موجود تھے، ملزمان کی ایماء کے بغیر ملازمین تشدد نہیں کرسکتے۔
مسلم لیگ ن کے رہنما خواجہ سلمان رفیق اور حافظ نعمان گرفتاری کے لیے تھانہ گارڈن ٹاؤن میں موجود تھے جہاں ان کی گرفتاری ڈال دی گئی۔
خواجہ سلمان رفیق کا کہنا تھا کہ پولیس نے کہا گاڑی اور اپنے بندے ہمارے حوالے کر دیں، ہم نے چاروں لوگوں کو پولیس کے حوالے کر دیا ہے، اس واقعے سے ہمارا تعلق نہیں، ہماری گاڑی اس وقت وہاں موجود نہیں تھی، اگر ہم موقع پر موجود ہوتے تو ایسا واقعہ نہ ہوتا، جو بھی وجوہات تھی ہمارے اسٹاف کو پہلے پولیس کو اطلاع کرنی چاہیے تھی، موبائل لوکیشن سے پتا چل جائے گا ہم اس وقت کدھر تھے، ہم نے حقائق جاننے کے لیے اپنے اسٹاف کو پولیس کے حوالے کیا۔
حافظ نعمان کا کہنا تھا کہ ہم تصور بھی نہیں کرسکتے تھے کہ ایسا واقعہ ہوگا، میجر حارث اور ان کی فیملی کے ساتھ ہمدردی کا اظہار کرتے ہیں، ہم اپنے آپ کو قانون سے بالاتر نہیں سمجھتے، کل افسوس ناک واقعہ رونما ہوا، مذمت کرتے ہیں، ہمارے اسٹاف کی گاڑی پیچھے تھی، گھر پہنچے تو پتا چلا اسٹاف کا راستے میں جھگڑا ہوگیا ہے، ہم گھرمیں بیٹھے ہوئے تھے یہ بات ہمارے علم میں آئی، میرے پی اے نے بتایا ہماری گاڑی کی ونڈ اسکرین توڑ دی گئی ہے، جب ہم نے ویڈیو دیکھی تو اس واقعے کا دفاع نہیں کریں گے۔
قبل ازیں حساس ادارے کے افسر پر تشدد کرنے والے تین ملزمان کو گرفتار کر کے مقدمہ درج کر لیا گیا، ملزمان کے خلاف مقدمہ گارڈن ٹاؤن تھانے میں درج کیا گیا، کلمہ چوک کے قریب فیروزپور روڈ پر حساس ادارے کے سینئر افسر پر تشدد کیا گیا، واقعہ گاڑی آپس میں ٹکرانے کے باعث پیش آیا، گاڑی میں سیاسی شخصیات کے گارڈ بیٹھے تھے۔
ذرائع کے مطابق واقعہ کے وقت دو حکومتی سیاسی رہنما اگلی گاڑی میں موجود تھے ،جھگڑے میں تشدد کے باعث حساس ادارے کے افسر کا بازو فریکچر ہو گیا جو علاج کے لئے سی ایم ایچ میں زیر علاج ہے، گاڑی سیاسی رہنما کی تھی جس میں گارڈز سوار تھے، تھانہ گارڈن ٹاؤن پولیس نے حساس ادارے کے افسر کی گاڑی بھی تحویل میں لے لی، ملزمان کی غنڈہ گردی پر موقع پہ موجود شہریوں نے لینڈ کروزر روکنے کی کوشش کی تاہم ملزمان فرار ہو گئے۔