عراقی سرزمین کا ایران کے خلاف استعمال ہونا ناقابلِ برداشت ہے: ایران

تہران: (ویب ڈیسک) ایرانی وزارت خارجہ نے عراق کو وارننگ دی ہے کہ وہ عراقی سرزمین ایران کے خلاف استعمال ہونے کو کسی صورت برداشت نہیں کریں گے۔
الجزیرہ کے مطابق ایران کی جانب سے یہ وارننگ عراق میں کردستان کے دارالحکومت اربل میں اسرائیل کے مبینہ ٹارگٹس پر میزائل حملے کرنے کے بعد سامنے آئی ہے۔
وزارت خارجہ کے ترجمان سعید خطیب زادہ نے صحافیوں سے گفتگو کرتے ہوئے کہا کہ یہ کسی بھی طرح قابل قبول نہیں ہے کہ ہمارا ایک پڑوسی، جس کے ہمارے ساتھ اچھے تعلقات ہیں، اسلامی جمہوریہ ایران کے خلاف خطرے کا مرکز بنے۔
انہوں نے دعویٰ کیا کہ اسرائیل نے بارہا عراقی سرزمین کے ذریعے ایران کے لیے سیکورٹی کے مسائل پیدا کیے ہیں، جس میں شمالی عراق کے کرد علاقے میں ایران مخالف ریلیوں اور “دہشت گرد گروپوں” کو منظم کرنا بھی شامل ہے۔
خطیب زادہ نے یہ بھی کہا کہ میزائل حملے سے پہلے عراق کو عوامی سطح پر اور سفارتی چینلز کے ذریعے بارہا خبردار کیا گیا تھا کہ وہ اپنی سرحدوں کو ایران کے خلاف سازشوں اور تخریب کاری کا مرکز بننے سے روکے۔