پاکستان پیپلز پارٹی (پی پی پی) کے چیئرمین بلاول بھٹو زرداری اور پاکستان مسلم لیگ(ن) کی نائب صدر مریم نواز نے ردعمل دے دیا ہے۔
ڈی جی آئی ایس پی آر کی پریس کانفرنس پر ردعمل دیتے ہوئے بلاول بھٹو زرداری نے سماجی رابطے کی ویب سائٹ ٹوئٹر پر لکھا کہ پاک فوج کے ترجمان کی پریس کانفرنس جمہوریت کے لئے تازہ ہوا کا ایک جھونکا تھی، نہ صرف ادارے بلکہ یہ ہر پاکستانی کی ذمہ داری ہے کہ وہ جمہوریت، آئین اور قانون کی بالادستی کا ساتھ دے، پارلیمان، عدلیہ اور اسٹیبلشمنٹ کی متنازع سے دستوری کردار میں منتقلی آسان نہیں ہوگی۔
انہوں نے لکھا کہ پاکستان کے تمام مسائل کا حل جمہوریت، جمہوریت اور مزید جمہوریت ہے، اگر ہم جمہوری راستے پر گامزن رہے تو دنیا کی کوئی طاقت پاکستان کی ترقی کو نہیں روک سکتی۔
پاکستان مسلم لیگ (ن) کی نائب صدر مریم نواز نے بھی ٹوئٹ کرتے ہوئے پریس کانفرنس پر ردعمل دیا اور عمران خان پر تنقید کرتے ہوئے کہا کہ وقت آ گیا ہے تمہارے ایک ایک جھوٹ کا محاسبہ کیا جائے، کرسی کی خاطر قومی سلامتی سے کھیلنے کی قابل مذمت کوششوں کا محاسبہ کیا جائے، حوصلہ رکھو، اب سامنا کرنا، ہمیشہ کی طرح بھاگ نہ جانا، کیونکہ یہ قوم تمہیں اب بھاگنے نہیں دے گی!۔
انہوں نے لکھا کہ آج تمہارے جھوٹ تار تار ہو گئے، اقتدار سے چمٹے رہنے کے لیے تم نے خطرناک کھیل کھیلا، این ایس سی جیسے سنجیدہ فورم کو سازشی ڈرامے کےلئے استعمال کیا، Absolutely Not کا جھوٹا نعرہ ان اڈوں کے لیے لگایا جو کبھی مانگے ہی نہیں گئے تھے، این آر او کیلئے اسٹیبلشمنٹ کے ترلے کیے، جھوٹ بولا کہ انہوں نے آپشن دیے تھے۔

سردار عبدالقیوم نیازی نے وزیراعظم آزاد کشمیر کے عہدے سے استعفیٰ دے دیا ہے۔
تحریک انصاف کے 25 اراکین اسمبلی کی جانب سے اپنی ہی جماعت کے وزیراعظم کے خلاف قانون ساز اسمبلی میں جمع کرائی گئی عدم اعتماد کی قرار داد پر رائے شماری سے قبل استعفیٰ دیکر وزارت عظمیٰ کے امید وارسردار تنویرالیاس کی راہ میں رکاوٹیں کھڑی کر دی ہیں۔
خیال رہے کہ سردار عبدالقیوم نیازی نے آج صبح ہی اپنے چند وزرا کو وزارت سے نکال دیا تھا۔
ذرائع کے مطابق وزرا کے وزارت سے نکالنے کے بعد اب وزیراعظم آزاد کشمیر سردار عبدالقیوم نیازی نے اپنا استعفیٰ صدر مملکت کو منظوری کے لئے ارسال کردیا ہے۔
انہوں نے کہا کہ وزارت عظمیٰ عمران خان کی امانت تھی واپس کر رہا ہوں۔
قبل ازیں وزیراعظم آزاد جموں و کشمیر سردار عبدالقیوم نیازی نے 5 وزراء کو کابینہ سے فارغ کر دیا۔
کابینہ سے فاروغ ہونے والوں میں سینئر وزیر تنویر الیاس، عبد الماجد خان، علی شان سونی، خواجہ فاروق اور اکبر ابراہیم شامل ہیں۔ وزراء کو مس کنڈکٹ، بد عنوانی اور مشکوک سرگرمیوں کی وجہ سے ہٹایا گیا۔
خیال رہے گزشتہ روز وزیر اعظم آزاد کشمیر سردار عبد القیوم نیازی کے خلاف تحریک عدم اعتماد جمع کرائی گئی۔ سیکریٹری قانون ساز اسمبلی کے دفتر میں تحریک عدم اعتماد ڈپٹی اسپیکر چوہدری ریاض، وزیر خوراک علی شان سونی اور پارلیمانی سیکریٹری بحالیات اکبر ابراہیم نے جمع کرائی۔
تحریک عدم اعتماد پی ٹی آئی کے 25 ارکان اسمبلی اور وزراء کے دستخطوں کے ساتھ جمع کرائی گئی۔ قانون ساز اسمبلی کے کل 53 ارکان میں سے پی ٹی آئی کے ارکان کی تعداد 31 ہے۔ تحریک عدم اعتماد پر 14 روز کے اندر قانون ساز اسمبلی میں ووٹنگ ہوگی۔

خفیہ امریکی دستاویز کے مطابق اب سے آٹھ برس قبل زمینی فضا میں ایک شہابِ ثاقب پراسرار انداز میں پھٹ پڑا تھا۔ اس کی رفتار بھی غیرمعمولی تھی اور وہ ہمارے نظامِ شمسی کی بجائے کسی اور نظام سے تعلق رکھتا تھا۔
2014 میں مشہور جزیرے پاپوا نیو گنی کے آسمان پر ایک جرمِ فلکی (آسمانی جسم) بہت زوردار آواز سے پھٹ پڑا تھا۔ حیرت انگیز بات یہ ہے کہ اس کی رفتار بہت زیادہ تھی، یہی وجہ ہے کہ اس پر تحقیق میں بہت وقت لگا ہے۔
ایک رپورٹ کے مطابق یہ چھوٹا سا شہابی پتھر تھا جس کی لمبائی صرف ڈیڑھ فٹ تھی اور 8 جنوری 2014 کو زمین کے قریب سے دولاکھ دس ہزار کلومیٹر فی گھنٹہ کی برق رفتاری سے گزرا تھا۔ یہ عام شہابیوں سے بھی بہت زیادہ رفتار ہے۔ 2019 میں تحقیق کے بعد معلوم ہوا کہ اس کا تعلق ہمارے نظامِ شمسی سے نہ تھا۔
2019 کی تحقیق سے سے یہ بھی پتا چلتا ہے کہ اس آسمانی پتھر کا راستہ اور مدار ہمارے نظامِ شمسی سے تعلق نہیں رکھتا تھا بلکہ یہ نظامِ شمسی سے باہر کہیں سے آیا تھا۔ 99 فیصد خیال ہے کہ یہ ملکی وے کہکشاں کی دبیز ڈسک یا کسی اور نظامِ شمسی کا باسی تھا۔ لیکن یہ ریسرچ پیپر نہ ہی باضابطہ طور پر کسی ریسرچ جرنل میں اشاعت کےلیے بھیجا گیا اور نہ ہی دیگر متعلقہ ماہرینِ فلکیات کو دکھایا گیا، کیونکہ اس کی تصدیق نہیں ہورہی تھی اور اسے پری پرنٹ سرور پر پوسٹ کردیا گیا۔
لیکن اس کی وجہ خود امریکی حکومت ہے جس نے ایک عرصے تک اس کا ڈیٹا خفیہ رکھا اور سائنسدانوں کو بھی نہیں بتایا۔ اب امریکی لیفٹننٹ جرنل جان ای شا نے چھ اپریل کو اس کی معلومات ٹوئٹر پر دی ہیں اور کہا ہے کہ آتشیں گولے نما پراسرار شئے درحقیقت دوسری دنیا کا شہابیہ تھا۔
اس پر تحقیقی مقالہ ہارورڈ کے نظری فلکی طبیعیات داں عامر سراج نے لکھا ہے۔ وہ چاہتے ہیں کہ جہاں مقالہ ختم ہوا ہے وہاں سے سائنسی برادری اس پر تحقیق آگے بڑھائے۔ ان کے خیال میں شہابئے کے کچھ پتھر جنوبی بحرِالکاہل کے پانیوں میں بھی گرے ہیں اور سمندری فرش میں موجود ہوسکتے ہیں۔ لیکن ان کی تلاش ایک مشکل کام ہوگا۔
تاہم عامر کہتے ہیں کہ اگر اس کا کوئی ٹکڑا ہمیں مل جاتا ہے تو دیگر نظام ہائے شمسی کے متعلق ہماری معلومات میں غیرمعمولی اضافہ ہوسکے گا۔

پاکستان نے شہبازشریف کے وزیر اعظم بننے پر امریکی تہنیتی پیغام کا شکریہ ادا کیا ہے۔
ترجمان دفتر خارجہ کی جانب سے جاری بیان میں کہا گیا ہے کہ شہبازشریف کے وزیر اعظم بننے پر امریکی تہنیتی پیغام کا شکریہ ادا کرتے ہیں۔
ترجمان کا کہنا ہے کہ پاکستان اور امریکا کے باہمی مفاد پر مبنی دیرینہ وسیع تعلقات ہیں پاک امریکاتعلقات خطےکی ترقی اور امن کےمفادمیں ہے۔
امریکا نے شہباز شریف کو وزیراعظم منتخب ہونے پر مبارکباد دیتے ہوئے کہا پاکستان کے ساتھ دیرینہ تعاون کو آگے بڑھانے کے منتظر ہیں۔
وزیرخارجہ انٹونی بلنکن کا کہنا تھا کہ پاکستان کے ساتھ دیرینہ تعاون کو آگے بڑھانے کے منتظرہیں، خوشحال، جمہوری پاکستان دونوں ملکوں کے مفاد کیلئے اہم ہے۔
یاد رہےشہباز شریف کے وزیراعظم پاکستان منتخب ہونے پر وائٹ ہاؤس کی ترجمان جین ساکی نے بریفنگ دیتے ہوئے کہا تھا کہ پاکستان میں کسی ایک سیاسی جماعت کی حمایت نہیں کرتے۔