لاہور: (ویب ڈیسک) پنجاب میں وزارت اعلی کے امید وار اور اسپیکر پنجاب اسمبلی چودھری پرویزالٰہی نے کہا ہے کہ عمران خان ن لیگ کا ہاضمہ خراب کر کے ہی دم لیں گے۔
پرویز الٰہی نے کہا کہ میں نے وزیر اعلیٰ بن کر آپ کے لئے بہت کام کرنے ہیں، ہم کامیابی کے لئے پر امید ہیں۔ علیم اور حمزہ کی آپس کی لڑائی سے میرا کیا تعلق ہے۔
واضح رہے علیم خان اور حمزہ شہباز کے درمیان لڑائی کی خبریں زیر گردش ہیں، تاہم ترجمان عبدالعلیم خان نے ان خبروں کی تردید کرتے ہوئے کہا ہے کہ جھوٹی خبریں اور پراپیگنڈہ مہم پرویزالہی کو شکست سے نہیں بچا سکتی، پرویز الہی کو شکست نظر آ گئی ہے، وفاق کے بعد پنجاب میں بھی ہار تسلیم کر لیں۔
ترجمان نے مزید کہا کہ سوشل میڈیا پر ایسی بھونڈی حرکتوں سے پرویز الہی کو کچھ حاصل نہیں ہو گا، جعلی ٹوئٹ اور بوگس خبروں سے پرویزالہی کو کچھ حاصل نہیں ہو گا، عبدالعلیم خان غیر مشروط طور پر اپوزیشن کا ساتھ دے رہے ہیں۔

کراچی: (ویب ڈیسک) وزیراعظم شہباز شریف نے مزار قائد پر حاضری دی اور فاتحہ خوانی کی۔ شہباز شریف نے بابائے قوم کے مزار پر پھول بھی رکھے۔ ملکی ترقی کے لئے دعا کی گئی۔
وزیراعظم شہباز شریف نے جہاز میں اہم میٹنگ کی، شہباز شریف نے کراچی میں صنعتی ترقی اور کاروباری شخصیات کی تجاویز سے متعلق جائزہ لیا۔ وزیراعظم شہباز شریف نے دوران پرواز کراچی میں کاروباری آسانیوں سے متعلق حکام سے بریفنگ لی۔ کراچی میں ایکسپورٹ صنعتوں کو مراعات کے حوالے سے تجاویز کا جائزہ لیا گیا۔
وزیراعظم شہبا شریف گورنر ہاؤس کے بجائے وزیر اعلیٰ ہاوس میں بیٹھک لگائیں گے۔ وزیراعظم شہباز شریف کراچی دورے پر پارٹی رہنما اور دیگر سے ملاقاتیں کریں گے۔ شہباز شریف بہادر آباد میں واقع ایم کیو ایم پاکستان کے مرکز بھی جائیں گے۔ وزیراعظم شہباز شریف کی کراچی کے سرمایہ کاروں اور صنعتکاروں سے بھی ملاقات کا امکان ہے۔

اسلام آباد: (ویب ڈیسک) تحریک انصاف ممنوعہ پارٹی فنڈنگ کیس میں پی ٹی آئی وکیل نے کسی بھی بھارتی شہری سے فنڈنگ لینے کا الزام مسترد کر دیا۔ انہوں نے کہا کہ بیرون ملک سے جتنا پیسہ بھی آیا سب ظاہر کیا گیا۔
الیکشن کمیشن میں تحریک انصاف ممنوعہ پارٹی فنڈنگ کیس کی سماعت ہوئی۔ تحریک انصاف کے وکیل انور منصور نے دلائل کا آغاز کرتے ہوئے کہا کہ موجودہ حالات میں تحریک انصاف کے دفاتر غیر فعال ہیں، بعض مطلوبہ ریکارڈ دفاتر بند ہونے کی وجہ سے دستیاب نہیں ہو سکا۔
انور منصور نے کہا کہ غیرملکی حکومت، ملٹی نیشنل یا مقامی کمپنیوں سے فنڈ نہیں لئے جا سکتے، باہر سے پیسہ آیا ہے لیکن ممنوعہ فنڈنگ کا الزام غلط ہے، کسی ہندو شہری نے دوہری شہریت حاصل کی تو کیا وہ غیرملکی ہوگیا ؟ کیا پاکستان میں ہندو سکھ اور عیسائی نہیں رہتے ؟ اگر فنڈ دینے والے غیر ملکی ہیں تو اکبر بابر اپنا الزام شواہد کیساتھ ثابت کریں۔
الیکشن کمیشن نے تحریک انصاف ممنوعہ پارٹی فنڈنگ کیس کی مزید سماعت 19 اپریل تک ملتوی کر دی۔
سماعت کے بعد میڈیا سے گفتگو میں پی ٹی آئی رہنماء فرخ حبیب نے کہا کہ الیکشن کمیشن میں ایزی لوڈ والا شخص پیش کیا جاتا ہے، مریم نواز اور بلاول بھٹو خود الیکشن کمیشن میں پیش ہوں۔ اکبر ایس بابر کا کہنا تھا کہ ہم پاکستان کے لیے جبکہ عمران خان پاکستان سے لڑ رہے ہیں۔

لاہور: (ویب ڈیسک) سعودی ولی عہد محمد بن سلمان نے شہباز شریف کو وزارت عظمی کا منصب سنبھالنے پر مبارک باد دی ہے۔
غیرملکی میڈیا کے مطابق سعودی ولی عہد شہزادہ محمد بن سلمان نے وزیراعظم پاکستان کا حلف اٹھانے پر شہباز شریف کو مبارک باد دی اور ان کے لئے نیک خواہشات کا اظہار کیا۔
اس سے قبل روسی صدر ولادیمیر پیوٹن نے بھی شہبازشریف کو وزیراعظم منتخب ہونے پر مبارکباد دی ، چین کی جانب سے بھی شہباز شریف کے لئے نیک خواہشات کا اظہار کیا گیا۔ دریں اثنا ترکی کے صدر رجب طیب اردوان نے بھی شہباز شریف کو ٹیلی فون کرکے مبارکباد دی اور کہا کہ آپ کے وزیراعظم منتخب ہونے کی خبر پر بے حد مسرور ہوں۔ صدر اردوان کا کہنا تھا کہ یقین ہے کہ آپ کی قیادت میں پاکستان اور ترکی کے برادرانہ تعلقات میں مزید مضبوطی آئے گی، پاکستان اور ترکی با اعتماد بھائی ہیں، دونوں کے تعلقات میں مزید قربت لانا چاہتے ہیں۔

اسلام آباد: (ویب ڈیسک) وفاقی حکومت نے دو اہم افسران کو تبدیل کر دیا۔ دونوں افسران کو اسٹیبلشمنٹ ڈویژن رپورٹ کرنے کا حکم دے دیا۔
وفاقی حکومت نے ایڈیشنل ڈی جی سائبر کرائم ایف آئی اے بابر بخت قریشی کا تبادلہ کر کے اسٹیبلیشمنٹ ڈویژن رپورٹ کرنے کا حکم دے دیا۔ اسی طرح ایڈیشنل سیکرٹری فوڈ سیکیورٹی طاہر خورشید کو عہدے سے ہٹا دیا گیا۔ طاہر خورشید کا تبادلہ کر کے وفاقی اسٹیبلیشمنٹ ڈویژن رپورٹ کرنے کی ہدایت کی گئی ہے۔

لاہور: (ویب ڈیسک) وزیراعلی پنجاب سردار عثمان بزدار نے گورنرپنجاب عمر سرفراز چیمہ سے ملاقات کی۔ دونوں رہنماوں کا کہنا ہے کہ وزیراعلی پنجاب کے لئے انشاءاللہ ہمارے مشترکہ امیدوار چوہدری پرویز الہٰی کامیاب ہوں گے۔
وزیراعلی پنجاب عثمان بزدار گورنر ہاوس پہنچے اور گورنر پنجاب عمر سرفراز چیمہ سے ملاقات کی۔ جس میں موجودہ سیاسی صورتحال اور نامزد وزیراعلی کے انتخاب کے حوالے سے گفتگو کی گئی۔
اس موقع پر گورنر پنجاب عمر سرفراز چیمہ نے کہا کہ پرویز الہی پارٹی کے نامزد وزیر اعلی پنجاب کے امیدوار ہیں، پارٹی کے تمام ایم پی ایز اور قیادت ان کی کامیابی کے لیے مشترکہ لائحہ عمل پر کام کر کر رہے ہیں۔
وزیراعلی پنجاب عثمان بزدار نے کہا کہ انشاءاللہ ہمارے مشترکہ امیدوار چودھری پرویز الہٰی کامیاب ہوں گے، اتحادی اور ہم ایک ہیں، عمران خان کی قیادت میں پاکستان تحریک انصاف متحد ہے۔

اسلام آباد: (ویب ڈیسک) فرخ حبیب نے کہا ہے کہ صاف اور شفاف انتخابات منعقد کرانا الیکشن کمیشن کی ذمہ داری ہے، بیرونی سازش کے تحت پاکستان میں ایک امپورٹڈ وزیراعظم مسلط کیا گیا ہے۔
پاکستان تحریک انصاف کے رہنما فرخ حبیب نے میڈیا سے گفتگو کرتے ہوئے کہا کہ پی ٹی آئی واحد سیاسی جماعت ہے جس نے سیاسی فنڈ ریزنگ کی بنیاد رکھی، پی ٹی آئی نے بیرون ملک مقیم پاکستانیوں سے فنڈ ریزنگ کی، نواز شریف اسامہ سے پیسے لیکر پیپلزپارٹی کی حکومت گرانے کی کوشش کرتے تھے، فضل الرحمان لیبیا سے فنڈنگ لیتے تھے۔
فرخ حبیب کا کہنا تھا کہ ن لیگ نے 64 کروڑ کا حساب دینا ہے، پیپلزپارٹی نے بھی 35 کروڑ روپے کا حساب دینا ہے، ہم الیکشن کمیشن میں پیش ہو رہے ہیں، ن لیگ اور پیپلزپارٹی الیکشن کمیشن سے بھاگ رہی ہے، مریم نواز اور بلاول بھٹو اگلی سماعت پر خود آئیں، ہمارا مقابلہ ن لیگ اور پیپلزپارٹی سے ہے، اکبر ایس بابر کی کوئی حیثیت نہیں۔

لاہور: (ویب ڈیسک) سابق وزیر و پی ٹی آئی کے رہنما زلفی بخاری نے توشہ خانہ سے قیمتی ہار بیچنے سے متعلق میڈیا پر چلنے والی خبروں کی تردید کر دی ہے۔
زلفی بخاری نے ٹوئٹ میں ہار بیچنے والی خبروں کو کھلا جھوٹ قرار دیا، انہوں نے لکھا کہ مجھے نہ کبھی کوئی ہار دیا گیا اور نہ ہی میں نے اسے فروخت کیا ہے۔
انہوں نے ایسی خبر چلانے والے میڈیا ہاؤس کا نام لے کر سرزنش کی اور لکھا کہ کہ بی گریڈ میڈیا ہاؤس کی طرف سے سابق وزیر اعظم کو بدنام کرنے کی کوشش کی جارہی ہے۔
واضح رہے میڈیا پر سابق وزیراعظم پاکستان عمران خان سے متعلق خبریں گردش کر رہی ہیں کہ انہوں نے بیرون ملک سے تحفے میں ملنے والا قیمتی ہار زلفی بخاری کی مدد سے فروخت کیا۔
دوسری جانب سابق وزیراعظم عمران خان کے سابق معاون خصوصی زلفی بخاری نے برطانوی شہریت چھوڑنے کا اعلان کردیا ہے۔
زلفی بخاری نے بیان دیا ہے کہ جب حکومت آئے تھی تب ہی کہہ دیا تھا کہ پاکستان میں رہوں گا اور میں پاکستان میں مکمل طور پر شفٹ ہوچکا ہوں۔
انہوں نے کہا کہ اپنا برطانوی پاسپورٹ سرنڈر کرنے کے لیے برطانیہ جارہا ہوں،اب میرے پاس صرف پاکستان کی شہریت ہی ہوگی۔ آئندہ انتخابات لڑنے کا فیصلہ کیا ہے۔