کراچی: (ویب ڈیسک) سندھ کابینہ نے بلدیاتی ایکٹ پر اپوزیشن جماعتوں سے مذاکرات کیلیے کمیٹی قائم کر دی۔ کابینہ نے بنڈل اور بڈوآئی لینڈ کو محفوظ جنگلات قرار دے دیا جبکہ سب رجسٹرار کو پاکستان اسٹیل کی اراضی منتقل کرنے سے روک دیا۔
وزیراعلیٰ سندھ مراد علی شاہ کی زیر صدارت کابینہ کا اجلاس ہوا، جس میں حکومت نے بلدیاتی ایکٹ پر اپوزیشن جماعتوں سے مذاکرات کیلئے کمیٹی قائم کر دی۔ وزیر بلدیات ناصر شاہ نے لوکل گورنمنٹ قانون کے حوالے سے اپوزیشن جماعتوں سے بات چیت پر کابینہ کو بریفنگ دی۔ ناصر شاہ نے جماعت اسلامی، پاک سرزمین پارٹی اور دیگر جماعتوں سے بات چیت کے حوالے سے کابینہ کو آگاہ کیا۔
اجلاس میں اپوزیشن جماعتوں سے متفقہ نکات پر مکمل عملدرآمد کا فیصلہ کر لیا گیا۔ وزیراعلیٰ سندھ نے کہا کہ ناصر شاہ کی جو بات چیت ہوئی ہے، اس کو لاگو کریں گے۔ کابینہ نے بنڈل اور بڈوآئی لینڈ کو محفوظ جنگلات قرار دے دیا جبکہ سب رجسٹرار کو پاکستان اسٹیل کی اراضی منتقل کرنے سے روک دیا۔ کابینہ نے ہدایت کی کہ سندھ حکومت کی جانب سے اسٹیل ملز کو دی گئی اراضی فروخت نہیں کی جاسکتی۔
کابینہ نے گندم کی امدادی قیمت 2200 روپے مقرر اور 1 اعشاریہ 4 ملین میٹرک ٹن گندم خریدنے کی منظوری دے دی۔ سندھ کابینہ نے گندم خریدنے کیلئے 4 ہزار 450 ملین روپے فنڈز کی خریداری کے لیے منظوری بھی دی۔ کابینہ اجلاس میں بتایا گیا محکمہ جیل میں گریڈ 5 سے گریڈ 15 کی 2 ہزار 113 آسامیاں خالی ہیں۔ کابینہ نے بھرتی کے لیے تھرڈ پارٹی اوپن بڈنگ کی منظوری دے دی۔
سندھ کابینہ نے کوآپریٹو مارکیٹ اور وکٹوریہ مارکیٹ کے متاثرین کو معاوضہ دینے کی منظوری دے دی۔ مارکیٹس میں 14 نومبر 2021 کو آگ لگی تھی، سندھ کابینہ نے 91 کروڑ روپے سے زائد فنڈز مختص کرنے کی منظوری دی۔

لاہور: (ویب ڈیسک) چیف جسٹس عمرعطا بندیال نے بطور چیف جسٹس اپنی ذمہ داریاں سنبھال لیں، چیف جسٹس کا کہنا تھا کہ زیرالتوا مقدمات کا بوجھ کم کرنا ہو گا، وکلا تیاری کرکے آیا کریں، التوا سے گریز کریں۔
چیف جسٹس عمرعطا بندیال کورٹ روم نمبر ایک میں پہنچے تو وکلاء کی جانب سے انہیں چیف جسٹس بننے پر مارکباد دی گئی۔ جس پر چیف جسٹس نے وکلا کا شکریہ ادا کرتے ہوئے کہا کہ آپ جیسے وکلا کا ساتھ خوشی کا باعث ہے۔
نعیم بخاری نے کہا کہ میں آپ کی ریٹائرمنٹ کا انتظارکروں گا تاکہ آپ سے دوبارہ ملاقات ہوسکے، اس پر کمرہ عدالت میں قہقہے گونج اٹھے۔
انہوں نے کہا کہ ججز اور وکلاء ایک خاندان ہے، خوش قسمتی ہے ہماری بار بڑی زبردست ہے۔

اسلام آباد: (ویب ڈیسک) ڈرگ ریگولیٹری اتھارٹی کا بڑا اقدام، عوام کو کورونا ٹیسٹ کرانے کے لیے اسپتالوں، سینٹروں سے نجات، اب گھر بیٹھ کر خود ہی ٹیسٹ کرسکیں گے۔
ڈرگ ریگولیٹری اتھارٹی نے نوٹیفکیشن جاری کر دیا۔ جس کے مطابق عوام کو اپنا کورونا ٹیسٹ کے لیے اوور دی کاؤنٹر کٹ فروخت کی اجازت ہوگی، میڈیکل اسٹورز اور فارمیسز پر کورونا ٹیسٹ کٹ دستیاب ہوگی، اب شہری گھر پر ہی کورونا ٹیسٹ کرسکیں گے۔

راولپنڈی: (ویب ڈیسک) اے این ایف راولپنڈی نے اسلام آباد انٹرنیشنل ایئرپورٹ پر کارروائی کرتے ہوئے منشیات سمگلنگ کی کوشش ناکام بنا دی۔
غیر ملکی ائیرلائن کے ذریعے اسلام آباد سے دوہا جانیوالے مسافر شاہ زیب حسن سے 850 گرام چرس برآمد کر لئے۔ برآمد شدہ چرس اخروٹوں کے اندر مہارت سے چھپائی گئی تھی۔ گرفتار ملزم کے پیٹ میں منشیات بھرے کیپسولوں کی موجودگی کا شبہ بھی ظاہر کیا جا رہا ہے، جس کی مزید تحقیقات جاری ہیں۔ ملزم کے خلاف انسداد منشیات ایکٹ کے تحت مقدمہ درج کر لیا گیا ہے اور مزید تفتیش جاری ہے۔

لاہور: (ویب ڈیسک) وفاقی وزیر بحری امور علی زیدی اور امریکی سیکریٹری ٹرانسپورٹ پیٹ بٹگیگ کے مابین ویڈیو کانفرنس ہوئی جس میں لاجسٹکس اور ٹرانسپورٹیشن سمیت مختلف امور پر تبادلہ خیال کیا گیا۔
کانفرنس میں امریکی ناظم الامور انجیلا ایگلر، سی ای او پی آئی اے سمیت سیکرٹری میری ٹائم افیئرز، ایڈیشنل سیکرٹری خارجہ اور دیگرشریک ہوئے۔ وفاقی وزیر نے امریکی بندرگاہوں پر پاکستانی بحری جہازوں کو درپیش مسائل پر بھی روشنی ڈالی اور درخواست کی کہ کراچی میں امریکی قونصل خانے میں ایک ونڈو وقف کی جائے جس کے قیام سے سی فیررز کے ویزوں کی کارروائی کم وقت میں کی جا سکے گی۔
اس موقع پر امریکی سیکرٹری ٹرانسپورٹ نے متعلقہ حکام کے ساتھ معاملے کو آگے بڑھانے پر اتفاق کیا، کانفرنس میں امریکہ اور پاکستان کی بندرگاہوں کے درمیان ممکنہ شراکت داری اور سسٹر پورٹ کے معاہدوں پر بھی گفتگو ہوئی، فریقین نے مسائل کو حل کرنے کے لیے مشترکہ طور پر کام کرنے پر اتفاق کیا، امریکی سیکرٹری ٹرانسپورٹ نے دورہ پاکستان کی دعوت کو خوش دلی سے قبول کرلیا۔

لاہور: (ویب ڈیسک) چودھری پرویز الٰہی کا کہنا ہے کہ محکمہ زراعت، واٹر مینجمنٹ کے ملازمین کی تنخواہ اور دیگر مسائل ترجیحی بنیادوں پر حل کیے جائیں۔
سپیکر پنجاب اسمبلی چودھری پرویز الٰہی سے محکمہ زراعت کے واٹر مینجمنٹ ونگ کے پروجیکٹ ملازمین کے 1362 رکنی نمائند ہ وفد نے اسمبلی چیمبر میں ملاقات کی۔ اس موقع پر پرویز الٰہی نے کہا کہ ملک میں روزگار کا پہلے ہی مسئلہ ہے، نئے ملازمین بھرتی کرنے کی بجائے پرانے تربیت یافتہ ملازمین کے تجربے سے فائدہ اٹھانا چاہئے، ملازمین کو محکمہ زراعت کے نیشنل پروگرام فار امپروومنٹ واٹر کورسز II میں منتقل کر دیا جائے، اس طرح کی غلطی دوبارہ نہ کریں، جب راولپنڈی میں ڈینگی آیا تو پرانے ملازمین کو فارغ کر کے نئے افراد بھرتی کئے۔
چودھری پرویز الٰہی کا کہنا تھا کہ جن میں تجربے کی کمی تھی، جس کی وجہ سے بہت زیادہ نقصان ہوا، حکومت محکمہ زراعت، واٹر مینجمنٹ کے پرانے تجربہ کار ملازمین کی تنخواہ اور دیگر مسائل ترجیحی بنیادوں پر حل کرے۔

لاہور: (ویب ڈیسک) صدر مسلم لیگ ن شہباز شریف نے اٹارنی جنرل کی جانب سے نوازشریف کی واپسی سے متعلق لکھے گئے خط کا جواب دے دیا۔
نواز شریف کے معاملہ پر بیان حلفی کا معاملہ ،شہباز شریف نے جوابی خط میں کہا کہ ایسا محسوس ہوتا ہے اٹارنی جنرل نے خط وفاقی کابینہ کی ہدایت پر لکھا، یہ شریف خاندان کے میڈیا ٹرائل اور زیر سماعت مقدمےپر اثر انداز ہونے کی کوشش ہے، ہر قسم کی قانونی چارہ جوئی کا حق محفوظ رکھتا ہوں۔ بیان حلفی کی ایک بھی خلاف ورزی نہیں کی۔ معاملہ پر ہائی کورٹ کے فیصلہ کے مندرجات کو نہیں دیکھا گیا۔ سمجھنے سے قاصر ہوں کہ اٹارنی جنرل نے میرے بیان حلفی کا آخری پیرا کیوں نہیں دیکھا۔
انہوں نے خط میں مزید کہا کہ مجھے یقین ہے یہ خط سیاسی مقاصد اور متعلقہ قوانین نظرانداز کرکے لکھا گیا ، اس میں میڈیکل بورڈ کے قیام کے عمل ،کارروائی اور سفارشات کو نظر انداز کیا گیا، معاملہ لاہور ہائی کورٹ میں زیر سماعت ہے جس کے باعث اٹارنی جنرل کا خط توہین عدالت کے زمرے میں آتا ہے۔