لاہور: (ویب ڈیسک) سابق وزیراعظم نواز شریف کی میڈیکل رپورٹ لاہور ہائیکورٹ میں جمع کرا دی گئی۔ جس میں کہا گیا کہ ڈاکٹرز نے نواز شریف کو سفر کرنے سے روک دیا۔
سابق وزیراعظم نواز شریف کے وکیل امجد پرویز نے لاہور ہائیکورٹ میں رپورٹ جمع کروائی۔ نواز شریف کی میڈیکل رپورٹ 3 صفحات پر مشتمل ہے۔ رپورٹ میں کہا گیا کہ نواز شریف انجیو گرافی کے بغیر لندن سے نہ جائیں، ذہنی دباؤ میں نواز شریف کی طبیعت مزید بگڑ سکتی ہے، کلثوم نواز کی وفات کے بعد نواز شریف شدید دباو میں ہیں۔
میڈیکل رپورٹ میں مزید کہا گیا کہ نواز شریف دل کے مریض ہیں، کورونا کے سبب نواز شریف کو سانس کا مسئلہ ہو سکتا ہے، نواز شریف انجیو گرافی تک اپنی ادویات جاری رکھیں، سابق وزیراعظم ذہنی دباؤ کے بغیر سرگرمیاں جاری رکھیں، نواز شریف دل کے مریض ہیں، کورونا کے باعث جان بھی جا سکتی ہے۔ ڈاکٹر فیاض نے کہا کہ کوئی سوال ہو تو مجھ سے رابطہ کیا جائے۔

چمن: (ویب ڈیسک) جمعیت علمائے اسلام (جے یو آئی) ف کے سربراہ مولانا فضل الرحمان نے کہا ہے کہ ہم کسی سے وفاداری کا سرٹیفکیٹ لینا نہیں چاہتے۔
جے یو آئی (ف) کے سربراہ مولانا فضل الرحمان نے علما کنونشن سے خطاب کرتے ہوئے کہا کہ حکمرانوں نے معاشی لحاظ سے ملک کو کنگال کر کے رکھ دیا ہے اور ہم حکمرانوں کے خلاف جنگ لڑ رہے ہیں، یہ وطن ہمارا ہے اس کا دفاع کریں گے۔
حکومت کو تنقید کا نشانہ بناتے ہوئے انہوں نے کہا کہ ملک کو کمزور کر دیا گیا ہے اور ہم کسی سے وفاداری کا سرٹیفیکٹ لینا نہیں چاہتے۔ پاکستان کو غلامی کے طرف لے جایا جا رہا ہے۔
مولانا فضل الرحمان نے کہا کہ اقتدار میں آنے سے پہلے انہوں نے ایک کروڑ نوکریوں کا وعدہ کیا تھا جبکہ 74 سالوں میں نوکریوں کی کل تعداد ایک کروڑ تک نہیں پہنچی۔
انہوں نے کہا کہ اس ناکام حکومت کے ہوتے ہوئے کون یہاں سرمایہ کاری کرے گا ؟ یہ عوام کے نمائندے نہیں اس لیے دنیا ان سے تعاون نہیں کر رہی۔ 70 سالہ چینی دوست کو لات ماری گئی اور اسٹیٹ بینک بھی عالمی مالیاتی ادارے (آئی ایم ایف) کے کنٹرول میں چلا گیا۔
سربراہ جے یو آئی نے کہا کہ جب ہم آئیں گے تو تم بھاگ جاؤ گے۔ برطانیہ ہندوستان سے گیا تو کشمیر کا مسئلہ چھوڑ کر گیا اور اب وفاق المدارس کو کمزور کرنے کی کوششیں کی جا رہی ہیں، لوگوں سے روزگار چھینا جا رہا ہے۔

اسلام آباد: (ویب ڈیسک) یوسف رضا گیلانی نے کہا ہے کہ شاہ محمود قریشی کی تقریر سینیٹ کی توہین ہے، یہ وزیر خارجہ کے معیار کی تقریر نہیں تھی۔
سینیٹ میں اپوزیشن لیڈر یوسف رضا گیلانی نے شاہ محمود کی تقریر پر ردعمل دیتے ہوئے کہا کہ شاہ محمود قریشی کو ایوان کے اندر جواب دوں گا، جب میں اسپیکر تھا یہ میرا پارلیمانی لیڈر تھا، محترمہ نے مجھے کہا تھا کہ اسے کچھ سکھاؤں، یہ آج مجھے سکھانے آئے تھے۔
یوسف رضا گیلانی کا کہنا تھا کہ ملتان میں اگر شاہ محمود کو بچوں نے تنگ کیا ہے تو ان سے پوچھوں گا، استعفیٰ منظور کرنا نہ کرنا پارٹی کا صوابدید ہے، اگر ہم چاہتے تو شاہ محمود صرف اپنی جماعت کو تقریر سناتے، ہماری اکثریت تھی اگر ہم چاہتے تو وزیر خارجہ کی تقریر نہ ہوتی، اگر ہم اٹھ کر چلے جاتے تو کس کو سناتے، یہ ہماری مہربانی ہے ہم نے انہیں بولنے دیا۔

کراچی: (ویب ڈیسک) شہر قائد کے علاقے گلستان جوہر میں دو ڈاکو اسلحے کے زور پر شہری سے چھ لاکھ سے زائد رقم چھین کر فرار ہو گئے، ادھر ڈیفنس فیز 2 میں ملزمان کی دن دیہاڑے واردات کی فوٹیجز سامنے آگئیں۔
کراچی کے علاقے گلستان جوہر میں موٹرسائیکل سوار دو ملزمان نے بائیک پر بیٹھے شہری کو لوٹ لیا، ملزمان میں سے ایک نے موٹرسائیکل سے اتر کو شہری کو اسلحہ دکھا کر ہراساں کیا جبکہ موٹرسائیکل سوار ملزم نے شہری کا بیگ چھین لیا، بیگ میں 6 لاکھ 20 ہزار روپے اور دیگر کاغذات تھے۔
متاثرہ شہری کے مطابق گلستان جوہر بلاک 7 میں نجی بینک سے رقم نکلوائی تھی، ایک مقام پر رک کر موبائل فون پر بات کررہا تھا کہ تعاقب کرنے والے ملزمان پہنچ گئے۔
دوسری جانب ڈیفنس فیز 2 میں ملزمان نے دن یدہاڑے واردات کر ڈٓالی، دو موٹر سائیکلوں پر سوار2 ملزمان نے گھر کی دہلیز پر کارسوار فیملی کو لوٹ لیا، ملزمان فیملی سے موبائل فون اور نقد رقم لے کر فرار ہوئے، واردات کی سی سی ٹی وی پولیس کو موصول ہونے کے باوجود ملزمان پولیس کی گرفت میں نہ آسکے۔

کراچی: (ویب ڈیسک) کراچی کے مختلف علاقوں میں فائرنگ کے واقعات میں 5 افراد زخمی ہوگئے۔
لیاری کھارادر میں نامعلوم افراد نے فائرنگ کرکے تین افراد کو زخمی کردیا۔ پولیس کے مطابق زخمیوں میں میڈیکل سٹور کا ملازم 50 سالہ حبیب، 15 سالہ احمد رضا اور ایک راہ گیر شامل ہے۔ دوسری جانب منگھوپیر نیا ناظم آباد میں کار پر فائرنگ سے 2 افراد زخمی ہوگئے۔
زخمیوں کی شناخت نوراسلام اور خالد کے نام سے ہوئی ہے۔ واقعہ ابتدائی طور پر ڈکیتی مزاحمت کا شاخسانہ معلوم ہوتا ہے۔