صوابی: (ویب ڈیسک) پاکستان مسلم لیگ ن کی نائب صدر مریم نواز نے کہا ہے کہ پاکستان تحریک انصاف (پی ٹی ائٓی) کے چیئر مین عمران خان کی حکومت نے ملک میں جتنے مسائل پیدا کیے اُسے دو سے تین ماہ نہیں صحیح کرنے میں دو سے تین سال لگیں گے۔ پاکستان آخری سانسیں لے رہا ہے۔ پاکستان وینٹی لیٹر پر ہے۔
مسلم لیگ ن کے پاور شو سے خطاب کرتے ہوئے مریم نواز نے کہا کہ صوابی والوں کو نوازشریف، شہبازشریف کا سلام پیش کرتی ہوں، لاہور لاہور ہوتا ہے چاہے خیبرپختونخوا میں ہو یا پنجاب میں ہو، یہاں کی عوام کو خراج تحسین پیش کرتی ہوں، عوام نے ریاستی مشینری کا مقابلہ کر کے (ن) لیگ کوفتح دلوائی۔ جھوٹوں،ڈرامے بازوں،فتنہ بازوں سے پاکستان کی جان چھوٹی، شکرہے ان قومی مجرموں سے پاکستان کی جان چھوٹی، پاکستان کوجادو، ٹونے کے اڈے کی طرح چلانے والوں سے جان چھوٹی۔
انہوں نے کہا کہ اگلے الیکشن میں خیبرپختونخوا کی بھی عمران سے جان چھوٹنی چاہیے، 4 سال حکومت کرنے کے بعد چارسیکنڈ بھی کارکردگی نہیں بتاسکتا، جس کا دامن کارکردگی سے خالی ہوپھرجھوٹے خط کے ڈرامے کی ضرورت پڑتی ہے،سازش تو ایک بہانہ تھا مقصد کارکردگی چھپانا تھا، جھوٹا خط توایک بہانہ تھا مقصد کارکردگی چھپانا تھا، عمران خان جان لو، تمہارے خلاف کوئی سازش نہیں ہوئی، تمہیں نوازشریف، کسی غیرملکی سازش نے نہیں تمہارے اپنے ایم این ایزنے عدم اعتمادسے نکالا۔
ن لیگ کی نائب صدر کا کہنا تھا کہ عمران خان ڈرامے بازی، رونا، دھونا بند کرو، یہ اتنا بڑا قومی مجرم ہیں، 4 سال ہیلی کاپٹرمیں جھولے لیتا رہا، فرح خان کے ذریعے قومی دولت کو لوٹتا رہا، اس نے بیت المال، توشہ خانہ کو نہ بخشا، یہ عوام کے مسائل سے چارسال بے خبررہا، نااہلی کوسازش کے پردے میں چھپانے کی کوشش کامیاب نہیں ہونے دیں گے، پاکستان کھائی میں گر رہا تھا اس لیے اسے عدم اعتماد کے ذریعے نکالا۔
مریم نواز نے کہا کہ یہ پاکستان کو کھوکھلا کر کے گیا، پچیس ہزارارب کے قرضوں سے ایک اینٹ نہیں لگائی، ہم سمجھ رہے تھے، پاکستان آئی سی یو میں ہیں، اب پتا چلا پاکستان آئی سی یو نہیں وینٹی لیٹر پر آخری سانسیں لے رہا ہے، عمران کی بربادی کی وجہ سے آج پاکستان وینٹی لیٹر پر ہیں، یاد رکھنا ہم عمران خان کی طرح پچھلی حکومت کا رونا نہیں روئیں گے۔
انہوں نے مزید کہا کہ نوازشریف نے 2013ء میں لوڈشیڈنگ، مہنگائی، غربت، دہشت گردی کو ختم کیا تھا، ن لیگی قائد نے موٹرویزکے جال بچھائے، وعدہ کرتی ہوں میرے والد پاکستان کوٹھیک کرکے دکھائیں گے، یہ ایک یا دوماہ کا کام نہیں، دو،تین سالوں میں حالات بہترہوں گے۔ مسلم لیگ کوکہتی ہوں عمران خان کی بری کارکردگی کا ٹوکرا اپنے سراٹھانے کی ضرورت نہیں، عمران خان کوعوام میں جانے دوتاکہ لوگ سوال پوچھیں۔
مریم نواز نے کہا کہ عمران خان اس قاتل کی طرح ہیں جو سائیڈ پر جا کر کہتا ہے قتل کس نے کیا، انہیں کہتی ہوں فکرنہ کروثابت کریں گے قتل بھی تم نے کیا اورتمہیں بھاگنے نہیں دیں گے، کرسی ہلی تو دماغ بھی ہل گیا ہے، کبھی فوج، کبھی عدلیہ کیخلاف باتیں کرتا ہے، کہتا ہے یہ میرجعفراورمیرصادق ہیں، کرسی کھسک گئی تو تمہیں میرجعفر، میرصادق نظرآگئے، قوم تمہارے تماشے کو اچھی طرح سمجھتی ہے، شکایت یہ ہے جنہوں نے پہلے سر پر بٹھایا اب ساتھ دینے کو تیارنہیں، تمہاری غلاظت کا ٹوکرا افواج پاکستان کیوں اٹھائے۔
اپنی بات کو جاری رکھتے ہوئے انہوں نے کہا کہ آئندہ الیکشن میں خیبرپختونخوا والے الیکشن میں سوچ سمجھ کرفیصلہ کرنا، کیا پنجاب والی ترقی خیبرپختونخوا کا مقدرنہیں، کیا اچھی سڑکیں خیبرپختونخوا کا مقدرنہیں؟ خدا کے واسطے اگلے الیکشن میں (ن) لیگ کوووٹ دینا۔

لاہور: (ویب ڈیسک) ڈپٹی اسپیکر پنجاب اسمبلی سردار دوست محمد مزاری نے صوبائی اسمبلی کی انتظامیہ پر سخت برہمی کا اظہار کرتے ہوئے اپنے حلقے سے کل ہنگامی طور پر لاہور پہنچنے کا فیصلہ کیا ہے۔
ڈپٹی اسپیکر پنجاب اسمبلی سردار دوست محمد مزاری نے الزام عائد کیا ہے کہ اسمبلی سیکریٹریٹ کے مجاذ آفیسرز گھٹیا ہتھکنڈوں پر اترآئے ہیں، میرے آفس کے اسٹاف کو تبدیل کردیا گیا ہے، کسی کو معطل کیا گیا ہے تو کسی کو کھڈے لائن لگایا گیا ہے۔
دوست محمد مزاری نے کہا کہ میرے گھر والے اسٹاف کو بھی بلا کر دھمکیاں دی گئی ہیں، گھر پہ تعینات اسمبلی اسٹاف کو ہراساں کیا گیا ہے اور اسٹاف سے کہا گیا ہے کہ کل سے ڈپٹی اسپیکر کے ساتھ کام نہیں کرنا ہے۔
ڈپٹی اسپیکر پنجاب اسمبلی نے کہا کہ میں ان کے آگے جھکنے والا نہیں ، تماشہ بنایا ہوا ہے، گھر میں بچے اکیلے تھے، اسٹاف کو بلاکر میری فیملی کو بھی ڈسٹرب کیا گیا۔
پنجاب اسمبلی کے ڈپٹی اسپیکر نے کہا کہ خوفز دہ نہیں، انتقامی ہتھکنڈوں کا مقابلہ کروں گا۔

کراچی: (ویب ڈیسک) شوہر نے تیزدھار آلے کے وار سے بیوی کو قتل کر دیا۔
پولیس کے مطابق احسن آباد اللہ بخش گوٹھ میں شوہر وسیم نے چھری کے پے در پے وار کر کے 35 سالہ اہلیہ فریال کو قتل کر دیا، ملزم موقع سے فرار ہونے میں کامیاب ہو گیا تاہم آلہ قتل برآمد کر لیا گیا ہے۔
پولیس کا کہنا کہ مقتولہ تین بچوں کی ماں تھی، 12 سال قبل اس کی شادی ہوئی تھی، ملزم وسیم ان دنوں بے روزگار تھا اور آئن لائن ٹیکسی بھی چلایا کرتا تھا، ملزم وسیم نے مبینہ طور پر شک و شبہات پر اہلیہ کو چھری کے وار کرکے قتل کیا، واقعہ سے متعلق مزید تفتیش کررہے ہیں۔

لاہور: (ویب ڈیسک) پاکستان مسلم لیگ ق کے سربراہ چودھری شجاعت حسین نے کہا ہے کہ سیاست میں اداروں کو موضوع بحث بنانے کی کوشش ہورہی ہے۔
مسلم لیگی رہنماؤں سینیٹر کامل علی آغا، جواد بھلی، شافع حسین، رضوان ممتاز علی سے گفتگو کرتے ہوئے چودھری شجاعت حسین نے کہا کہ آج کل سیاست اور فوج موضوع بحث بنانے کی کوشش کی جا رہی ہے، سوال یہ اٹھایا جا رہا ہے فوج کا سیاست میں کردار ہونا چاہئے یا نہیں، سیاست کا ڈکشنری میں مطلب اصلاح احوال ہے اور اس کا مطلب سیاسی، معاشی اور سماجی حالات درست کرنا ہے، ملک میں ہنگامی صورتحال ہو تو لازم ہے فوج اور حکومت اتفاق رائے سے فیصلہ کریں، حکومت کا دفاعی اخراجات کو جواز بنا کر اپنی سیاست چمکانے غیر ذمہ دارانہ رویہ قرار دیا جانا چاہئے۔
انہوں نے کہا کہ افسوس ہے ایسے افراد ملک دشمن قوتوں کو خوش ہونے کا موقع فراہم کرتے ہیں، جہاں تک سیاسی حکومت کے فرائض کا تعلق ہے اسے چاہئے کہ وہ ملکی سلامتی اور بقا کو یقینی بنانے کیلئے تمام ضروری اقدامات اٹھائے، جب ضرورت پڑے تو آئینی اختیارات استعمال کرتے ہوئے سکیورٹی ایجنسیز افواج پاکستان کو اپنی مدد کیلئے طلب کرے، اس سلسلے میں تمام مالی و دیگر وسائل بروئے کار لائے، حکومت معاملات کو سلجھانے میں اگر ناکام ہو جاتی ہے تو ملکی سلامتی کو خطرات لا حق ہو سکتے ہیں، اگر سول حکومت ایسی سنگین صورتحال میں وسائل فراہم کرنے میں ناکام ہو تو میری نظر میں افواج پاکستان اور سکیورٹی ایجنسیز ملک کو ایسی سنگین صورتحال میں بھی خطرات سے باہر نکالنے کی ذمہ دار ٹھہرائی جائے گی۔