اسلام آباد: (ویب ڈیسک) مسلم لیگ ن کی نائب صدر مریم نواز کو سکیورٹی خطرات کے معاملے پر ان کو وی آئی پی سیکیورٹی دینے کی منظوری دے دی گئی۔
وزات داخلہ نے مریم نواز کو سیکیورٹی دینے کی منظوری دی یے۔سکیورٹی وزارت داخلہ کی تھریٹ اسسمنٹ کمیٹی کی سفارش پر دی گئی۔
دستاویزات کے مطابق پولیس کے ساتھ ساتھ رینجرز اہلکار بھی مریم نواز کی سکیورٹی پر مامور ہوں گے۔ جبکہ اسلام آباد میں مریم نواز کو وفاقی پولیس اور رینجرز کی سیکیورٹی ہمہ وقت حاصل ہو گی۔
دوسرے صوبوں اور اضلاع میں متعلقہ پولیس یکیورٹی فراہم ہوگی۔مریم نواز کی ریائشگاہوں پر بھی سیکیورٹی فراہم کی جائے۔

سیہون: (ویب ڈیسک) انڈس ہائی وے پر مسافر وین اور ٹریلر کے درمیان تصادم میں 13 افراد زندگی کی بازی ہار گئے۔
ریسکیو ذرائع کے مطابق واقعے کی اطلاع ملتے ہی رضاکار اور پولیس کی ٹیمیں جائے حادثہ پر پہنچ گئیں، حادثے میں 5 افراد موقع پر ہی دم توڑ چکے تھے، 18 زخمی افراد کو ہسپتال منتقل کیا گیا اس دوران مزید 8 افراد زخموں کی تاب نہ لاتے ہوئے دم توڑ گئے۔
ریسکیوذرائع کا کہنا ہے کہ مسافر وین دادو سے حیدرآباد آ رہی تھی جبکہ ٹرک سیہون کی طرف جا رہا تھا، حادثے میں زخمی ہونے والے متعدد افراد کی حالت نازک ہے۔

اسلام آباد: (ویب ڈیسک) الیکشن کمیشن آف پاکستان نے پاکستان تحریک انصاف (پی ٹی آئی) کے منحرف ارکان قومی اسمبلی کو نا اہل کرنے سے متعلق ریفرنس مسترد کر دیا۔
تفصیلات کے مطابق قائم مقام سپیکر کی جانب سے الیکشن کمیشن آف پاکستان کو پی ٹی آئی کے 20 منحرف ارکین قومی اسمبلی کیخلاف ریفرنسز دائر کیے گئے تھے، الیکشن کمیشن نے راجہ ریاض، نورعالم خان، فرخ الطاف، احمد حسین ڈیہڑ، رانا قاسم نون، غفار وٹو، سمیع الحسن گیلانی، مبین احمد، باسط بخاری، عامر گوپانگ، اجمل فاروق کھوسہ، ریاض مزاری، جویریہ ظفر آہیر، وجیہہ قمر، نزہت پٹھان، رمیش کمار، عامر لیاقت حسین، عاصم نذیر،نواب شیر وسیر، افضل ڈھانڈلہ ریفرنس دائر کیے گئے تھے۔
الیکشن کمیشن کی طرف سے متفقہ فیصلہ سناتے ہوئے کہا گیا ہے کہ پی ٹی آئی کے منحرف ارکان قومی اسمبلی پر آرٹیکل 63 اے کا اطلاق نہیں ہوتا۔ منحرف اراکین اسمبلی ڈی سیٹ ہونے سے بچ گئے۔
اس سے قبل پی ٹی آئی کے منحرف رکن نور عالم خان کے وکیل بیرسٹر گوہر خان نے دلائل دیتے ہوئے کہا کہ پی ٹی آئی شوکاز نوٹس کے جواب میں کہا تھا نہ پی ٹی آئی چھوڑی ہے اور نہ ہی پارلیمانی پارٹی، بعد میں پارٹی نے کہا کہ عدم اعتماد پر ووٹ نہیں دینا جو ثابت کرتا ہے کہ پارٹی نے تسلیم کیا نور عالم ان کا رکن ہے۔
وکیل نے مزید کہا کہ نور عالم نے 3 اپریل کو اجلاس میں شرکت کی، پی ٹی آئی نے کہا تھا اجلاس میں شرکت کریں، پارٹی نے دوبارہ کوئی ہدایت نہیں کی آپ اجلاس میں شرکت نہ کریں، نور عالم نے کسی اور پارلیمانی پارٹی میں شمولیت اختیار نہیں کی۔
ممبر الیکشن کمیشن نے پوچھا کیا نور عالم خان نے تحریک عدم اعتماد کے دن ووٹ کاسٹ کیا؟ جس پر ان کے وکیل نے کہا تحریک عدم اعتماد پر ووٹ کاسٹ نہیں کیا۔
وکیل کا کہنا تھا کہ ان کے موکل پر آرٹیکل 63 ون (اے) کا اطلاق نہیں ہوتا، یہ کہتے ہیں بچوں کی شادی نہیں ہو گی، یہ ہمارے بچوں کے لیے اتنی فکر مند کیوں ہیں۔
ممبر کمیشن ناصر درانی نے پوچھا کہ کیسے نتیجہ نکالا الیکشن کمیشن کا 5 رکنی بینچ ہی فیصلہ سنا سکتا ہے؟ جس پر گوہر خان نے کہا کہ سپریم کورٹ اس پر فیصلہ دے چکا ہے۔

اسلام آباد: (ویب ڈیسک) رہنما تحریک انصاف عمر سرفراز چیمہ نے کہا ہے کہ میرے دفتر کو پنجاب پولیس نے یرغمال بنایا ہوا ہے، سسلین مافیا جو کر رہا ہے عوام کے سامنے ہے، عدالتوں میں انصاف نہیں ملے گا تو عوام سڑکوں پر نکلیں گے۔
اسلام آباد میں پریس کانفرنس سے خطاب کرتے ہوئے عمر سرفراز چیمہ کا کہنا تھا کہ صدر پاکستان کو آئین کے تحت رپورٹ بھیجی تھی، آئینی طور پر وزیراعلیٰ آفس خالی نہ ہونے کے باوجود انتخاب کرایا گیا، آئین میں کہیں موجود نہیں کہ سپیکر قومی اسمبلی وزیراعلیٰ سے حلف لے۔ عثمان بزدار نے جو استعفیٰ دیا وہ غیرآئینی تھا۔
انہوں نے کہا کہ میرے دفتر کو پنجاب پولیس نے یرغمال بنایا ہوا ہے، مجھ سے گاڑیاں اور سکیورٹی واپس لے لی گئی، بطور گورنر پنجاب وزیر داخلہ رانا ثنا اللہ کوخط لکھا، سسلین مافیا جو کچھ کر رہا ہے قوم کے سامنے ہے، عدالتوں میں انصاف نہیں ملے گا تو عوام سڑکوں پر نکلیں گے، عوام کو باہر نکلنے کیلئے مجبور نہ کیا جائے۔

اسلام آباد: (ویب ڈیسک) چیف جسٹس پاکستان جسٹس عمر عطا بندیال نے کہا ہے کہ کسی کو تاحیات نااہل کرنا بہت سخت سزا ہے۔
سپریم کورٹ میں آرٹیکل 63 اے کی تشریح کے لیے صدارتی ریفرنس پر سماعت ہوئی۔ چیف جسٹس عمر عطا بندیال نے ریمارکس دیئے کہ الیکشن کمیشن میں نااہلی ریفرنس پر رائے نہیں دے سکتے اور منحرف ارکان کا معاملہ الیکشن کمیشن میں زیر التوا ہے۔
پاکستان تحریک انصاف (پی ٹی آئی) کے وکیل اظہر صدیق نے مؤقف اختیار کیا کہ میرا مقدمہ نااہلی ریفرنس نہیں ہے، میرا مقدمہ یہ ہے کہ دن کی روشنی میں پارٹی کے مینڈیٹ پر ڈاکہ ڈالا گیا۔
جسٹس مظہر عالم میاں خیل نے کہا کہ اس معاملے کا جائزہ الیکشن کمیشن نے لینا ہے اور الیکشن کمیشن کے فیصلے کیخلاف اپیل سپریم کورٹ ہی آئے گی۔ آپ کی پارٹی کے کچھ لوگ ادھر کچھ ادھر ہیں۔
جسٹس جمال خان مندوخیل نے ریمارکس دیئے کہ ق لیگ کے سربراہ خاموش ہیں اور ایک بلوچستان کی پارٹی ہے ان کے لوگوں کا پتہ نہیں وہ کدھر ہیں۔ آدھی پارٹی ادھر ہے آدھی ادھر ہے اور جس کی چوری ہوتی ہے اس کو معلوم ہوتا ہے لیکن ان پارٹیوں کے سربراہ ابھی تک مکمل خاموش ہیں۔
وکیل نے مؤقف اختیار کیا کہ بھارت میں منحرف ارکان کے لیے ڈی سیٹ نہیں نااہلی کا لفظ استعمال ہوا ہے، جس پر جسٹس جمال مندوخیل نے استفسار کیا کہ بھارت کے شیڈول 10 میں منحرف رکن کی نااہلی کی معیاد کتنی ہے؟ اور یہ کیوں کہتے ہیں کہ سیاستدان چور ہیں؟ جب تک تحقیقات نہیں کی جاتیں تو ایسے بیان کیوں دیتے ہیں؟
چیف جسٹس عمر عطا بندیاں نے کہا کہ 28 مارچ کو عدم اعتماد پر قرارداد منظور ہوئی اور 31 مارچ کو عدم اعتماد پر بحث ہونا تھی اور سوال پوچھنا چاہیے تھا کہ عدم اعتماد کیوں لائی گئی؟ 31 مارچ کو ارکان نے عدم اعتماد پر ووٹنگ کا مطالبہ کیا لیکن ہم نے آئین کا تحفظ کرنا ہے اور اسی لیے آرٹیکل 63 اے کی تشریح کا ریفرنس سن رہے ہیں۔
چیف جسٹس نے کہا کہ منحرف ارکان سے متعلق آرٹیکل 63 اے کا کوئی مقصد ہے اور آئینی ترامیم کے ذریعے 63 اے کو لایا گیا۔ 1970 سے جو میوزیکل چیئر چل رہی ہے اسے اب ختم ہونا چاہیے۔
وکیل اظہر صدیق نے کہا کہ میری نظر میں قانون غیر مؤثر ہے اور ابھی بھی ہارس ٹریڈنگ ہوتی ہے۔
چیف جسٹس نے ریمارکس دیئے کہ کسی کو غلط اقدام کا اٹھانے کی اجازت نہیں دے سکتے اور قانون کے اندر عدالت کوئی تبدیلی نہیں کر سکتی۔
جسٹس اعجاز الاحسن نے کہا کہ انحراف کی ایک سزا ڈی سیٹ ہونا ہے اور ڈی سیٹ کے ساتھ دوسری سزا کیا ہو سکتی ہے ؟ آرٹیکل 63 اے میں نااہلی کی معیاد کا ذکر نہیں تو اب سوال یہ ہے کہ آرٹیکل تریسٹھ اے کو کسی دوسرے آرٹیکل کے ساتھ ملا سکتے ہیں؟ ڈی سیٹ ہونا آئینی نتیجہ ہے۔
جسٹس جمال مندوخیل نے کہا کہ سوال یہ ہے کہ منحرف کو نااہل کرنے کا طریقہ کار کیا ہو گا اور کیا اس کے لیے ٹرائل ہو گا ؟ اگر رشوت کا الزام لگایا ہے تو اس کے شواہد کیا ہوں گے؟ قانون کے مطابق الیکشن ہوں گے تو یہ چیزیں ختم ہو جائیں گی۔
جسٹس اعجاز الاحسن نے کہا کہ انحراف بذات حود ایک آئینی جرم ہے اور مخرف ارکان کے لیے ڈی سیٹ ہونا سزا نہیں ہے۔
مسلم لیگ ق کے وکیل اظہر صدیق کے دلائل مکمل ہونے کے بعد سپریم کورٹ بار ایسوسی ایشن کے وکیل عثمان منصور نے دلائل دیئے۔
چیف جسٹس نے ریمارکس دیئے کہ آئین میں جمہوری طریقے سے ترمیم کے بعد 63 اے شامل کیا گیا ہے اور کسی کو تاحیات نااہل کرنا بہت سخت سزا ہے۔ سپریم کورٹ نے تاحیات نااہلی کی کچھ شرائط مقرر کر رکھی ہیں اور ہم سمجھتے ہیں انحراف ایک سنگین غلطی ہے۔ ملک کو مستحکم حکومت کی ضرورت ہے تاکہ ترقی ہو سکے۔
انہوں نےکہا کہ کسی کو بھی غلط کام سے فائدہ اٹھانے کی اجازت نہیں دے سکتے۔
جسٹس اعجاز الاحسن نے سپریم کورٹ بار کے وکیل سے استفسار کیا کہ کیا آپ سمجھتے ہیں انحراف کرنا ٹھیک ہے ؟ اور آئین میں انحراف کو غلط کہا گیا ہے۔
وکیل منصور اعوان نے مؤقف اختیار کیا کہ ضمیر کی آواز پر جو انحراف کرے اس کی سزا ڈی سیٹ ہونا ٹھیک ہے اور جس نے پیسے لے کر انحراف کیا اس کی سزا سخت ہونی چاہیے۔
جسٹس منیب اختر نے کہا کہ اگر کسی کے ضمیر کا معاملہ ہے تو استعفٰی دے اور ضمیر کی بات ہے تو انحراف نہ کریں اور انحراف سے بہتر ہے ضمیر کی آواز پر استعفی دیا جائے تاہم انحراف کرنے والوں کے لیے عوام سخت لفظ استعمال کرتے ہیں لیکن وہ لفظ میں استعمال نہیں کروں گا۔
انہوں نے کہا کہ منحرف ارکان ہوٹلوں میں جاتے ہیں تو عوام آوازیں کستے ہیں اور منحرف اراکین نے آخر کار عوام میں جا کر ان کا سامنا کرنا ہے۔ آرٹیکل 63 اے کو آرٹیکل 17 ٹو کے ساتھ پڑھ سکتے ہیں اور آرٹیکل 17 کی ذیلی شق 2 کے تحت سیاسی جماعتوں کے حقوق ہوتے ہیں۔
اٹارنی جنرل اشتر اوصاف نے کہا کہ اگر عدالت چاہے گی تو اگلے ہفتے منگل کو عدالت کی معاونت کروں گا۔
چیف جسٹس نے ریمارکس دیئے کہ عدالت کے سامنے بڑا اہم اور پیچیدہ سوال ہے اور ایسے معاملات پر کہیں لائن کھینچنا پڑے گی۔ پیر کو صدارتی ریفرینس پر ہماری معاونت کریں۔ کیا آرٹیکل 63 اے کی تشریح اس انداز سے کرسکتے ہیں جس سے سیاسی و قانونی استحکام آئے۔
انہوں نے کہا کہ کیا آئینی تشریح میں پارٹی سربراہ کو اجازت دے دیں؟ پارٹی سربراہ چاہے تو منحرف ارکان کے خلاف کارروائی کرے اور پارٹی سربراہ نہ چاہے تو کارروائی نہ کرے۔ ہمارے سیاسی نظام میں بہت زیادہ اتار چڑھاؤ، ہیجان، دباؤ اور عدم استحکام ہے جبکہ عدالت نے فریقین کے درمیان فیصلہ کرنا ہوتا ہے اور ہزاروں مقدمات عدالتوں کے سامنے زیر التوا ہیں۔
اشتر اوصاف نے کہا کہ عدالتی بحث سے کسی نہ کسی سمت کا تعین ہوجائے گا۔
عدالت نے ریمارکس دیئے کہ ایک نقطہ یہ بھی ہے کہ منحرف رکن کا ووٹ شمار نہ کیا جائے۔ ہر معاملے عدالت میں آرہا ہے۔
سپریم کورٹ نے آرٹیکل 63 اے کی تشریح کے لیے صدارتی ریفرنس پر سماعت پیر تک ملتوی کر دی۔

وفاقی وزیر برائے منصوبہ بندی احسن اقبال کا کہنا ہے کہ آئندہ بجٹ نوجوانوں کا بجٹ ہو گا، نوجوانوں کی تربیت کے منصوبے لائے جائیں گے۔

لندن پہنچنے پر میڈیا سے گفتگو کرتے ہوئے احسن اقبال کا کہنا تھا کہ سابق حکومت نے سی پیک کو نظر انداز کیا، عمران خان نے سی پیک کو سرد مہری کا شکار رکھا لیکن اب سی پیک کا ہر 15 روز میں جائزہ اجلاس ہو گا، چینی کمپنیوں کے مسائل ترجیحی بنیادوں پر حل ہوں گے اور سی پیک کے منصوبوں میں سکیورٹی مزید بہتر بنائیں گے۔

احسن اقبال کا کہنا تھا کہ سابق حکومت نے ترقیاتی بجٹ میں بڑی کٹوتی کی اور ترقیاتی بجٹ کو کم کرکے 500 ارب کر دیا گیا، آئندہ بجٹ نوجوانوں کا بجٹ ہو گا۔

ان کا کہنا تھا کہ آئندہ بجٹ میں نوجوانوں کی تربیت کے منصوبے لائیں گے، نوجوانوں کو روزگار، کھیل اور تفریح کے مواقع فراہم کریں گے، نوجوانوں کی تعلیم پر خصوصی توجہ دیں گے۔

ان کا یہ بھی کہنا تھا کہ آئندہ بجٹ میں ہائر ایجوکیشن کے لیے فنڈز بڑھائیں گے، تکمیل کے قریب منصوبے مکمل کرنا بھی ترجیح ہے، منصوبے تیزی سے مکمل کرکے عوام کو فائدہ پہنچائیں۔

وفاقی وزیر برائے منصوبہ بندی کا کہنا تھا کہ آئندہ بجٹ بلوچستان میں ترقی کی رفتار تیز کرے گا۔

خیال رہے کہ وفاقی وزیر برائے منصوبہ بندی احسن اقبال بھی وزیراعظم شہباز شریف کے ہمراہ لندن پہنچے ہیں جہاں وہ آج پارٹی قائد نواز شریف سے اہم امور پر تبادلہ خیال کریں گے۔

کراچی: (ویب ڈیسک) سابق وزیرداخلہ شیخ رشید نے کہا ہے کہ جب تک ا لیکشن کی تاریخ کا اعلان نہیں ہوتا وہ کسی سے ملاقات نہیں کریں گے۔
نجی نیوزسے گفتگوکرتے ہوئے شیخ رشید احمد نے کہا کہ وہ عمران خان کی جماعت سے نہیں لیکن ان کے ساتھی ہیں، ان کے پاس بھی اطلاعات ہیں کہ ہم الیکشن کی طرف جارہے ہیں ۔
شیخ رشید نے کہا کہ ان کی بھی مقتدر حلقوں سے ملاقاتیں ہورہی ہیں،عمران خان نے ہدایت دی کہ کسی سے ملونہ ہی بات کرو جب تک الیکشن کی تاریخ نہیں آتی،ماحول سے ایسا لگ رہاہے کہ ہم انتخابات کی طر ف جارہے ہیں۔

لاہور : (ویب ڈیسک) محکمہ تعلیم پنجاب نے یکم جون سے گرمیوں کی چھٹیوں کا اعلان کر دیا۔
محکمہ تعلیم کے مطابق رواں سال موسم گرما کی تعطیلات یکم جون سے شروع ہوں گی۔ محکمہ نے تمام سکولوں کی انتظامیہ کو 31 مئی تک طلباء کو گرمیوں کی چھٹیوں کا کام فراہم کرنے کی ہدایت کی ہے۔
گرمیوں کی چھٹیاں دو ماہ یعنی 31 جولائی تک جاری رہیں گی جبکہ نئے تعلیمی سیشن کا آغاز یکم اگست سے ہو گا۔ نیا نصاب موسم گرما کی تعطیلات میں سرکاری سکولوں کے طلباء میں تقسیم کیا جائے گا۔