لاہور: محکمہ خوراک پنجاب اور فلور ملز ایسوسی ایشن کے درمیان مذاکرات کامیاب ہوگئے۔
ترجمان فلور ملز ایسوسی ایشن کے مطابق مذاکرات کے بعد فلور ملز ایسوسی ایشن نے ہڑتال کا فیصلہ واپس لے لیا ہے۔
فلور ملز ترجمان کا کہنا ہے کہ مذاکرات میں 7 میں سے 5 نکات پر اتفاق ہو گیا اور بقیہ نکات پرمذاکرات جاری رکھنے پر اتفاق کیا گیا ہے۔
ترجمان کے مطابق اب فلور ملز پرائیویٹ گندم کا آٹا سفید تھیلے میں کے پی کےسمیت دیگر صوبوں کو ترسیل کر سکیں گی، فلور ملز کے لیے گندم کا کوٹا بڑھانے کابھی اصولی فیصلہ ہو گیا تاہم ملز مالکان اور محکمہ خوراک اس کے لیے مشترکہ لائحہ عمل تیار کریں گی جس کی منظوری کابینہ سےلی جائے گی۔
ترجمان کا کہنا ہےکہ بات چیت سے آٹے کی قلت اور قیمت کا مسئلہ بھی حل ہو گیا ہے۔
اسلام آباد(نامہ نگار خصوصی) وزیراعظم عمران خان نے ایف بی آر کے ٹریک اینڈ ٹریس نظام کا افتتاح کردیا ، افتتاحی تقریب سے خطاب کرتے ہوئے انہوں نے کہاکہ ٹریک اینڈ ٹریس سسٹم مالیاتی امور میں شفافیت کیلئے سنگ میل ثابت ہوگا ، نئے سسٹم کے اجراءپر مشیر خزانہ اور ایف بی آر کی ٹیم مبارکباد کی مستحق ہے ۔ مستقبل میں اس نظام کے بہتر اثرات مرتب ہوں گے ۔انہوں نے کہاکہ ہمارا سب سے بڑا مسئلہ یہ ہے کہ ملک چلانے کیلئے پیسہ نہیں ہے جس کی وجہ سے قرضے لینے پڑتے ہیں یہ پاکستان کا مسلسل مسئلہ رہا ہے۔انہوں نے کہاکہ اگر آپ کے خرچے زیادہ اور آمدن کم ہو تو مسائل پیدا ہوتے ہیں۔ ہمارے ہاں ٹیکس کلچر کبھی بنا ہی نہیں ہے۔ کرپٹ مافیا نے کبھی بھی پاکستان میں ٹیکس کلچر کو فروغ نہیں پانے دیا۔ ٹیکس چوری کو لوگ برا نہیں سمجھتے۔ ماضی میں لوگوں کو خدشہ تھا کہ ان کا دیا ہوا ٹیکس چوری ہوکر باہر چلا جائے گا ترقی یافتہ ملکوں میں کوئی سوچ نہیں سکتا،وزیر اعظم نے کہاکہ اب ملک میں ٹیکس کلچر کو فروغ دینا انتہائی ضروری ہے۔ ٹیکس کے بغیر ہم چل نہیں سکتے ۔ انہوں نے کہاکہ 2008 سے 2018 تک پاکستان کا 4 گنا زیادہ قرضہ بڑھا ۔ بے دریغ قرضہ لینے والوں کو سزائیں ملنی چاہئیں۔ گزشتہ حکمرانوں نے بیرونی دوروں پر عوام کے ٹیکس کا پیسہ بے دریغ خرچ کیا جس سے لوگوں کو اعتماد نہیں رہا ۔وزیراعظم نے کہاکہ موجودہ حکومت میں ریکارڈ ٹیکس اکٹھا ہوا ہے۔ امید ہے ٹیکس کی شرح6 ہزار ارب تک پہنچ جائے گی۔ عمران خان نے کہاکہ 6 ہزار ارب میں سے 3 ہزار ارب ماضی کے حکمرانوں کے لئے ہوئے قرضہ کی قسطوں میں چلا جائے گا باقی کروڑوں لوگوں کیلئے صرف 3ہزار ارب روپے بچ جائیں گے اس پیسے سے ہم نے عوام کو تعلیم اور صحت کی سہولیات دینی ہیں اور پھر سرمایہ کاری بھی کرنی ہے۔ یہ سب کچھ کرنا کتنا مشکل ہے ۔ زراعت کو بھی فروغ دینا ہے یہ سب کچھ کرنے کیلئے قرضہ لینا پڑتا ہے اور اس پر سود دینا پڑتا ہے ،وزیر اعظم نے کہاکہ ہم ایک عجیب چکر میں پھنسے ہوئے ہیں اس چکر سے نکلنے کیلئے ٹیکس کو تیزی سے بڑھانے کی ضرورت ہے۔ یہ ٹیکنالوجی کی طرف جانے سے ہی ممکن ہے آج کا اقدام اس حوالے سے بہت اہم ہے ۔ مجھے امید ہے کہ ہم جس تیزی سے آگے بڑھ رہے ہیں ہمارے ٹیکس محصولات جلد 8ہزار ارب روپے تک پہنچ جائیں گے ۔ ٹیکس محصولات کے اضافے میں ایف بی آر کا بڑا کردار ہے۔ انہوں نے کہاکہ ہمارے ملک کی 60 فیصد آبادی 30 سال سے کم لوگوں پر مشتمل ہے ہمارے پاس ٹیکس اکٹھا ہوگا تو ہم ان پرخرچ کرپائیں گے۔ ٹریک اینڈ ٹریس نظام اہم شعبوں کی الیکٹرانک نگرانی یقینی بنائے گا ٹیکنالوجی کی مدد سے ٹیکس وصولیوں میں اضافہ ہوگا۔وزیراعظم عمران خان نے کہا ہے کہ آلودگی سے بچنے کیلئے پائیدار ماحولیاتی تحفظ کا منصوبہ وقت کی ضرورت ہے، متعلقہ محکمے آلودگی سے بچنے کیلئے صوبوں کے ساتھ مل کر حکمت عملی وضع کریں، ہمارے منشور کے مطابق صاف اور آلودگی سے پاک پاکستان اولین ترجیح ہے، بڑے پیمانے پر شجرکاری سے شہروں کو سرسبز بنانے پر توجہ مرکوز کر رہے ہیں۔
لندن (ڈاکٹر اختر گلفام سے) سکھوں نے برطانیہ کے بعد جنیوا میں بھی خالصتان ریفرنڈم کا اعلان کر دیا ہے۔ یورپ اور دنیا بھر کے سکھوں کو 10 دسمبر کو سوئٹزرلینڈ پہنچنے کی ہدایات دے دی ہیں۔ بھارت ابھی برطانیہ میں سکھوں کے علیحدہ وطن خالصتان کے لئے ہونے والے ریفرنڈم کا ماتم کر رہا تھا کہ اسے ایک اور آفت نے آ گھیرا ہے کہ سکھس فارجسٹس نے جنیوا میں بھی خالصتان کے قیام کے لئے ریفرنڈم کا اعلان کرتے ہوئے کہا ہے کہ اگلے ماہ یعنی دسمبر میں اقوام متحدہ انسانی حقوق کونسل کے ہونے والے سیشن کے دوران 10 دسمبر کو یورپ، بھارت اور برطانیہ سمیت دنیا بھر سے ہزاروں سکھ خالصتان ریفرنڈم میں حصہ لینے کے لئے جنیوا پہنچیں گے۔ ذرائع کے مطابق بھارت نے جنیوا میں ہونے والے سکھوں کے اس خالصتانی ریفرنڈم کو رکوانے کے لئے سوئٹزرلینڈ کی حکومت سے رابطہ کر کے سخت احتجاج کیا ہے لیکن اس بھارتی احتجاج کا کورا جواب دے دیا۔ اس طرح برطانیہ کے بعد سوئٹزرلینڈ میں بھی بھارت کو مایوسی کا سامنا کرنا پڑا ہے۔
15 فروری سے پاسپورٹ کی میعاد ختم ہوچکی، درخواست کونسل کے ذریعے پاکستانی سفارتخانہ کودی۔
پاکستانی سفارتخانے کا پاسپورٹ کے معاملے پر وزارت داخلہ ، خارجہ سے رابطہ۔
ذرائع کے مطابق واپسی کا بہانہ ختم کرنے کیلئے پاسپورٹ بنانے پر سوچ بچار شروع۔
قائد ن لیگ کو پاکستانی عدالتیں کئی مقدمات میں اشتہاری قرار دے چکیں۔
برطانیہ جاتے وقت نواز شریف کے پاس ڈپلومیٹ پاسپورٹ تھا۔
سکیورٹی بانڈز پر علاج کیلئے برطانیہ گئے تھے۔
عالمی ادارہ صحت (ڈبلیو ایچ او) نے مارچ 2022 تک یورپ میں کورونا وائرس سے مزید 7لاکھ ہلاکتوں کا خدشہ ظاہر کردیا۔
فرانسیسی خبر رساں ادارے اے ایف پی کے مطابق عالمی ادارہ صحت نے حالیہ عرصے میں یورپ میں کورونا کیسز کی تعداد میں اضافے پر تشویش کا اظہار کرتے ہوئے کہا ہےکہ اگر یہی صورت حال رہی تو مارچ 2022 تک وائرس سے ہونے والی ہلاکتوں کی تعداد 15 لاکھ سے بڑھ کر 22 لاکھ تک پہنچ سکتی ہے۔
عالمی ادارہ صحت کا کہنا ہے کہ کورونا کیسز میں اضافے کے باعث اسپتالوں کے خصوصی نگہداشت کے شعبوں پر دباؤ میں اضافےکا بھی خدشہ ہے۔
خیال رہے کہ حالیہ کچھ عرصے میں یورپ میں کورونا کیسز میں واضح اضافہ دیکھنے میں آیا ہے، جرمنی، برطانیہ، ہالینڈ اور آسٹریا میں متاثرہ افراد کی تعداد میں اضافہ ہوا ہے جس کے بعد حکومتوں کی جانب سے نئی پابندیاں بھی لگائی جارہی ہیں۔
وزیراعظم عمران نے مسلم لیگ (ن) اور پیپلزپارٹی کی حکومتوں کو تنقید کا نشانہ بنایا ہے۔
فیڈرل بورڈ آف ریونیو (ایف بی آر) میں ٹریک اینڈ ٹریس سسٹم کی افتتاحی تقریب سے خطاب میں وزیراعظم کا کہنا تھاکہ ہمارا بڑا مسئلہ یہ ہے کہ ہمارے پاس ملک چلانے کیلئے پیسے نہیں، ملک چلانے کیلئے ہمیں قرض لینا پڑتا ہے جبکہ اشرافیہ نے ملک میں کبھی ٹیکس کلیکشن سسٹم مضبوط نہیں ہونے دیا۔
ان کا کہنا تھاکہ ملک کو 30 ٹریلین کا مقروض بنانے والوں کو سزائیں ملنی چاہئیں، 10 سال میں اتنا قرض لینے کے باوجود ڈیم بنائے نہ کوئی بڑا کام کیا بلکہ ماضی میں حکمرانوں نے بیرونی دوروں پر دس دس گنا زیادہ خرچ کیا۔
ان کا مزید کہنا تھاکہ عوام کو یقین ہوگا کہ پیسہ ان پر خرچ ہوگا تو وہ ٹیکس دیں گے، ملک اور عوام کی خوشحالی ٹیکس دینے میں ہے اور ہمارا ہدف 6ہزار ارب روپے کا ریونیو جمع کرنا ہے۔
وزیراعظم کا کہنا تھاکہ ٹیکنالوجی کی مدد سے ٹیکس وصولیوں میں اضافہ ہوگا، ایف بی آر کا ٹیکس وصولیوں میں بہت بڑا کردار ہے۔
وزیر جیل خانہ جات پنجاب فیاض الحسن چوہان کا کہنا ہے کہ اگر عظمیٰ بخاری جیل بھیجیں تو جانے کو تیار ہوں۔
پنجاب اسمبلی کے باہر وزیر جیل خانہ جات پنجاب فیاض الحسن چوہان اور رہنما (ن) لیگ عظمی بخاری کے درمیان دلچسپ نوک جھوک دیکھنے میں آئی، اس موقع پر عظمیٰ بخاری کے ہمراہ لیگی رہنما حناپرویز بٹ بھی موجود تھیں۔
رہنما (ن) لیگ عظمیٰ بخاری نے کہا کہ چوہان صاحب، جیل میں اپنے لیے سیل بنالیں جس پر فیاض الحسن چوہان نے کہا کہ عظمیٰ بخاری اگر جیل بھیجیں تو جیل جانے کو تیار ہوں۔
افغانستان کے دارالحکومت کابل میں آج سہہ پہر ہونے والے دھماکے میں 2 سیکیورٹی اہلکاروں کے زخمی ہونے کی اطلاعات ہیں۔
پولیس ترجمان جنرل مبین نے ٹوئٹر بیان میں بتایا کہ آج سہہ پہر 3 بجے کابل کے مجاہدین بازار میں نگرانی پر مامور پولیس پیٹرول گاڑی بم سے ٹکرا گئی جس کے باعث ہونے والے دھماکے کے نتیجے میں گاڑی میں سوار دو سیکیورٹی اہلکار زخمی ہوگئے۔
ابھی تک کسی گروپ کی جانب سے دھماکے کی ذمے داری قبول نہیں کی گئی۔
وفاقی وزیر اطلاعات فواد چوہدری نے کہا ہے کہ مسلم لیگ(ن) کی جانب سے ویڈیوز جاری کرنے کا واحد مقصد عدلیہ کو دباؤ میں لانا ہے اور امید ہے کہ عدلیہ اس دباؤ کو مسترد کر دے گی۔
اسلام آباد میں کابینہ کے اجلاس کے بعد پریس کانفرنس کرتے ہوئے فواد چوہدری نے کہا کہ جس طریقے سے یہ ساری ویڈیوز جعلی ثابت ہوئیں اس پر فارنزک ڈپارٹمنٹ کی تعریف نہ کرنا زیادتی ہو گی، یہ پہلا موقع نہیں ہے کہ مسلم لیگ(ن) کی طرف سے اس طرح کی ویڈیوز جاری کی گئی ہوں اور اس کا واحد مقصد عدلیہ کو دباؤ میں لانا ہے۔
انہوں نے کہا کہ وہ کیوں مہم چلا کر یہ سمجھے تھے کہ فوج کے جرنیل دباؤ میں آ جائیں گے اور جب کیسز چلنا شروع ہوتے ہیں تو اس طرح کی مہم چلائی جاتی ہے کہ شاید ججز دباؤ میں آ جائیں، مجھے امید ہے عدلیہ اس دباؤ کو مسترد کرے گی، جس طرح سے سپریم کورٹ بار ایسوسی ایشن نے اس معاملے پر اپنا لائحہ عمل دیا ہے۔
ان کا کہنا تھا کہ اس معاملے کو یہاں نہیں رکنا چاہیے اور جو لوگ اس کام میں ملوث ہیں وہ ہمارے سامنے ہیں، مریم نواز کا رویہ ہمیشہ منفی رہا ہے، لوگوں کی ٹیپ بنانا، جعلی لیکس بنانا، انہوں نے جعلی لیکس تیار کرنے کے لیے ٹیمیں بنائی ہوئی ہیں، یہ ٹیکنالوجی کی مدد سے جعلی ویڈیوز تیار کرکے یہ سمجھتے ہیں کہ ججز اور اکابرین ان کے دباؤ میں آجائیں گے۔
وزیر اطلاعات نے کہا کہ یہ شاید اپنی پارٹی کو قابو کرنے کے لیے بھی اسی طرح کی ویڈیوز بنا رہی ہیں، میرا خیال ہے کہ پاکستان کی تاریخ میں کسی جماعت نے اس طرح کی حرکتیں نہیں کی ہوں گی جس طریقے کی حرکتیں مسلم لیگ(ن) کا مریم نواز گروپ کررہا ہے، ہم اس کی مذمت کرتے ہیں اور پرامید ہیں کہ یہ معاملہ بھی اپنے منطقی انجام کو پہنچے گا۔
انہوں نے کہا کہ پورا ہفتہ سیمینار کا سلسلہ منعقد کیا گیا، پہلے لاہور میں اور پھر اسلام آباد میں ایک سیمینار کیا گیا، دونوں سیمینار غیرملکی فنڈنگ سے کیے گئے اور آج کابینہ میں ڈاکٹر شیریں مزاری نے دفتر خارجہ سے مطالبہ کیا ہے کہ اس فنڈنگ کے ڈونرز سے ویانا کنونشن کے سیکشن 41 کے تحت بات کی جائے اور غیرملکی فنڈنگ کا معاملہ بھی کابینہ میں زیر بحث رہا۔
ان کا کہنا تھاکہ کابینہ نے الیکٹرانک ووٹنگ مشین کے حوالے سے الیکشن کمیشن سے بات کرنے کے لیے ایک کمیٹی تشکیل دی ہے تاکہ اس بات کا تعین کیا جا سکے کہ الیکشن منعقد کرانے کے لیے کتنی مشینیں درکار ہیں، کتنے اخراجات ہوں گے اور ہمیں تکنیکی طور پر کیا معاونت درکار ہو گی۔
فواد چوہدری نے کہا کہ یہ ایک لازمی بات ہے کہ اگلے انتخابات لازمی طور پر الیکٹرانک ووٹنگ مشین کے تحت ہوں گے اور اس کے ساتھ ساتھ 90لاکھ پاکستانی بھی ووٹ ڈالیں گے بلکہ مسلم لیگ(ن) کو ہمارا شکر گزار ہونا چاہیے کیونکہ پہلی بار نواز شریف کے بیٹے بھی ووٹ ڈالنے کے اہل ہوں گے۔
انہوں نے میڈیا کی تنقید پر گلا کرتے ہوئے کہا کہ جب چینی اور ٹماٹر کی قیمتیں بڑھتی ہیں تو ہیڈ لائن لگ جاتی ہیں لیکن جب کم ہوتی ہے تب بھی لوگوں کو بتانا چاہیے، چینی اس وقت 90 سے 95 روپے پر بک رہی ہے اورع اگلے دس سے پندرہ دن میں یہ قیمت 85روپے فی کلو تک آ جائے گی، جب قیمتیں برھتی ہیں تو ہم ہیڈ لائن لگا دیتے ہیں لیکن جب کم ہوتی ہیں تو لوگوں کو لگتا ہے کہ کچھ ہوا ہی نہیں ہے۔
ان کا کہنا تھا کہ ہمیں سب ےس بڑا سندھ بالخصوص کراچی میں آ رہا ہے، 18ویں ترمیم کے بعد مسئلہ یہ ہے کہ وفاقی حکومت پالیسی ہی بنا سکتی ہے، اس پر عمل صوبوں نے ہی کرنا ہے، جب ہم نے سندھ سے کہا کہ آپ گندم ریلیز کریں تو انہوں نے گندم ریلیز نہیں کی ، جب انہیں کہا کہ چینی ریلیز کریں تو انہوں نے چینی ریلیز نہیں ہوتی۔
فاقی وزیر نے کہا کہ ملک میں مہنگائی کے حوالے سے جاری ہونے والے ڈیٹا میں سے 40فیصد کی بنیاد کراچی کی قیمتیں ہیں، بدقسمتی سے کراچی میں پورے پاکستان سے زیادہ قیمتیں ہیں، لاہور میں 20 کلو آٹا 1100 روپے کا مل رہا ہے اور وہی بیگ کراچی میں 1441 روپے کا مل رہا ہے جبکہ چینی کی قیمت بھی زیادہ ہے۔
ان کا کہنا تھا کہ وزارت خزانہ نے کابینہ کو آئی ایم ایف کے پیکج کی تفصیل بھی بتائی جبکہ وفاقی وزارت تعلیم اور صنعت و پیداوار میں خالی آسامیوں پر بھی بریفنگ دی گئی ہے۔
