اسلام آباد : (ویب ڈیسک) ہر ممبر باوقار لوگوں کا چنا ہوا ہے اور وہ اپنے ضمیر کے مطابق اپنے فیصلے کرنے کا پابند ہے، وزیر خارجہ مخدوم شاہ محمود قریشی کا اہم بیان سامنے آگیا ہے۔
شاہ محمود قریشی کا کہنا ہے کہ کوئی فیصلہ کرنے سے پہلے ان توقعات کو ذہن میں رکھنا ہو گا جو حلقے کی عوام نے منتخب کرتے ہوئے، آپ سے وابستہ کیں، آج نوے کی سیاست کو دہرایا جا رہا ہے، اسی طرز سیاست کے خلاف میثاق جمہوریت لایا گیا تھا، میثاق جمہوریت میں کچھ اصول طے کیے گئے تھے۔
انہوں نے کہا کہ سندھ ہاؤس میں جو کچھ ہو رہا ہے وہ میثاق جمہوریت کی روح کے منافی ہے، پارلیمنٹ کے محافظوں کے ہاتھوں اگر پارلیمنٹ کو نقصان پہنچے تو یہی کہا جائے گا کہ گھر کو آگ لگ گئی گھر کے چراغ سے، کراچی میں گورنر راج کی تجویز کے حق میں نہیں ہوں، آج وزیر اعظم عمران خان کی زیر صدارت پولیٹیکل کمیٹی کا اجلاس ہے میں ماضی کے تجربات کی روشنی میں وہاں بھی اپنا نقطہ نظر پیش کروں گا۔
وزیر خارجہ نے مزید کہا کہ 22 مارچ کو اسلام آباد میں او آئی سی وزرائے خارجہ کونسل کے اڑتالیسویں اجلاس کی میزبانی پاکستان کیلئے بہت بڑا اعزاز ہے، میں اس حوالے سے کافی عرصہ سے تگ و دو میں مصروف ہوں، نیامے میں منعقدہ او آئی سی وزرائے خارجہ کونسل کے سنتالیسویں اجلاس میں ہمیں دو بڑی کامیابیاں حاصل ہوئیں، ایک کامیابی یہ حاصل ہوئی کہ ہم نے قائل کرلیا کہ اگلے او آئی سی وزرائے خارجہ کونسل کے اجلاس کی میزبانی پاکستان کرے گا۔
دوسری کامیابی اسلاموفوبیا کے بڑھتے ہوئے رجحان سے نمٹنے کے حوالے سے متفقہ قرارداد کی منظوری تھی، وہ قرارداد ہم نے اقوام متحدہ بھجوائ جو الحمد للہ اقوام متحدہ جنرل اسمبلی سے بھی منظور ہو چکی ہے، اب او آئی سی ممالک کے وزرائے خارجہ پاکستان تشریف لا رہے ہیں وہ پچھترویں یوم پاکستان پریڈ میں بھی شرکت کریں گے۔
بھارت کے حوالے سے بیان دیتے ہوئے انہوں نے کہا کہبھارت نے تاحال اس مبینہ “حادثاتی میزائل فائر” کا تسلی بخش جواب نہیں دیا، افغانستان کی صورتحال سب کے سامنے ہے، یوکرین میں بڑھتی ہوئی کشیدگی کے باعث، آئل کی قیمتوں میں اضافہ ہو رہا ہے، جس سے معیشت پر بوجھ مزید بڑھے گا، ان حالات میں غیر یقینی صورتحال پیدا کرنا، نہ جمہوریت کے مفاد میں ہے، نہ معیشت کے مفاد میں ہے اور نہ ہی پاکستان کی عوام کے مفاد میں ہے۔
وہ لوگ جو اقتدار کی ہوس کیلئے ملک میں غیر یقینی صورتحال پیدا کر رہے ہیں انہیں اپنے فیصلے پر نظر ثانی کرنی چاہیے۔

کراچی: (ویب ڈیسک) جہانگیر ترین سے تحریک انصاف نے رابطے کی دوبارہ کوشش کی تاہم ملاقات طے ہوئی نہ ٹیلیفونک گفتگو ہو سکی۔
بتایا گیا ہے کہ گورنرسندھ عمران اسماعیل نے لندن میں موجود جہانگیر ترین کو ٹیلیفون کیا تاہم جہانگیرترین کی گورنرسندھ سے بات ہوئی نہ ملاقات سے متعلق کوئی پیش رفت ہو سکی۔
دوسری جانب جہانگیر ترین گروپ موجودہ سیاسی صورتحال پر آج دوبارہ لاہور میں سرجوڑ کربیٹھے گا، گروپ کااجلاس شام چھ بجے جہانگیر ترین کی رہائش گاہ پرہوگا جس میں ترین گروپ کے رہنما آئندہ سیاسی حکمت عملی سے متعلق مشاورت کریں گے ،کس سیاسی جماعت کے ساتھ الحاق کرنا ہے یہ معاملہ بھی زیربحث آئے گا۔

اسلام آباد: (ویب ڈیسک) اسلام آباد ہائیکورٹ نے الیکشن کمیشن کووزیراعظم عمران خان کے خلاف کارروائی سے روکنے کی استدعا مسترد کردی۔
جسٹس عامرفاروق نے ریمارکس دیئے کہ کنڈیکٹ کودیکھتے ہوئے یہ عدالت حکم امتناع جاری نہیں کرسکتی۔عدالت نے الیکشن کمیشن اور اٹارنی جنرل کونوٹس جاری کردیا۔ چیف جسٹس اطہرمن اللہ کی رخصت کے باعث بنچ کوتبدیل کیا گیا۔
وزیراعظم عمران خان نے محمد زبیرسرفرازنامی شہری کواتھارٹی دے دی۔ محمد زبیر سرفراز نے بائیو میٹرک کرا کے رجسٹرار آفس کا اعتراض دور کیا۔ جس کے بعد جسٹس عامرفاروق نے سماعت کی، دوران سماعت وکیل بیرسٹرعلی ظفرکا کہنا تھا کہ عدالت آئندہ سماعت تک الیکشن کمیشن کو عمران خان کے خلاف کارروائی سے روکے۔
جسٹس عامرفاروق نے کہا کہ آپ کو الیکشن کمیشن کے سامنے پیش ہونا چاہیے تھا۔ وزیراعظم خود نہ پیش ہوتے لیکن آپ کو تو پیش ہونا چاہیے تھا۔ آپ سارے نکات الیکشن کمیشن کے سامنے کیوں نہیں اٹھاتے؟
بیرسٹرعلی ظفرکا کہنا تھا کہ الیکشن کمیشن پہلے ہی آرڈیننس کے خلاف جا کر آرڈر جاری کر چکا۔ جسٹس عامرفاروق نے کہا کہ معذرت کے ساتھ حکومت نے بھی آرڈیننس کی فیکٹری لگا رکھی ہے۔
جو کام پارلیمنٹ کے کرنے والے ہیں وہ آرڈیننس کے ذریعے ہو رہے ہیں، یہ کام کوئی آرڈیننس کے ذریعے کرنے والا تھا۔ کیا آپ 14 مارچ کو الیکشن کمیشن کے سامنے پیش ہوئے، آپ کا اپنا کنڈکٹ دیکھ کر عدالت حکم امتناع نہیں دے سکتی، عدالت نے سماعت 28 مارچ تک ملتوی کردی۔

لاہور: (ویب ڈیسک) لاہور میں شہباز شریف وزیراعظم کے فلیکسز آویزاں کر دیئے گئے ہیں جن پر “وقت کی مجبوری شہباز شریف ضروری” کے نعرے درج ہیں۔
بتایا گیا ہے کہ مسلم لیگ کے صدر شہباز شریف کی احتساب عدالت پیشی کے موقع پر “وزیراعظم پاکستان انشاءاللہ ” پر مبنی فلیکسز لگائے گئے ہیں، پوسٹرز پر نوازشریف، مریم نواز اور حمزہ شہباز کی تصاویر بھی نمایاں ہیں۔
واضح رہے کہ چند روز مسلم لیگ ق کے رہنما پرویز الہی کے بھی بینرز لگائے گئے تھے جن پر “پنجاب کی مجبوری ہے، پرویز الہی وزیراعلی ضروری ہے” لکھا گیا تھا۔

لاہور: (ویب ڈیسک) مسلم لیگ ن کے رہنما حمزہ شہباز نے کہا ہےکہ عوام نے 4 سال عمران نیازی کی فضول باتیں سن لیں، اب عمران نیازی پر عدم اعتماد کا اظہار کر دیا ہے۔
لاہور میں میڈیا سے گفتگو کرتے ہوئے لیگی رہنما حمزہ شہباز کا کہنا تھا کہ عمران خان میں نہ مانوں کےاصول پر عملدرآمد کرتے ہیں، حکومتی اتحادی بھی کہتے ہیں وزیراعظم ہماری بات نہیں سنتے، عوامی نمائندوں نےعوام کے پاس جانا اور جواب دینا ہوتا ہے، منتخب نمائندوں کا مؤقف ہے عوام کے سامنے کیا منصوبہ لے کر جائیں گے، عمران نیازی نے 4 سال میں کون سا تیر مارا ہے۔
قبل ازیں لیگی رہنما شاہد خاقان عباسی نے کراچی میں میڈیا سے بات چیت کے دوران سوال اٹھایا کہ سندھ میں گورنر کیوں لگے گا؟ گورنر راج کی پنجاب میں ضرورت ہے جہاں وزیراعلیٰ اکثریت کھو چکا ہے۔ انہوں نے کہا کہ جو آئین توڑے گا وہ غداری کا مرتکب ہو گا، اس پر آرٹیکل 6 لگے گا، اپوزیشن نے کبھی خرید و فروخت نہیں کی۔