لندن: (ویب ڈیسک) بین الاقوامی سائنس دانوں اور امراضِ قلب کے ماہرین کی ایک ٹیم کو تین کروڑ برطانوی پاؤنڈ کی رقم بطور تحقیق دی گئی ہے جس سے جینیاتی امراضِ قلب کو دور کرنے کے لیے انقلابی انجکشن بنایا جائے گا۔
اصل میں یہ بہت بڑی غیرمنافع بخش گرانٹ ہے جس کے تحت ایسے ہزاروں افراد کی جان بچانا ممکن ہوگا جو خاص جینیاتی بگاڑ کی وجہ سے ’اب تک‘ ناقابلِ علاج دل کے مرض میں گرفتار ہیں۔
یہ رقم ایک چھوٹے تحقیقی گروہ، ’ کیورہارٹ‘ کو دی گئی ہے جس کا مقصد موروثی طور پر دل کی بیماری کا حل تلاش کرنے لیے درست ترین جین تھراپی وضع کرنا ہے۔ حیرت انگیز طور پر یہ تھراپی ایک ٹیکے کی صورت میں ہوگی۔
برطانیہ، امریکا اور سنگاپور کے سائنسداں بھی اس پینل میں شامل ہیں جن میں حکومتِ برطانیہ کے مشیرانِ طب و سائنس بھی موجود ہیں۔ اس جینیاتی کیفیت میں دل اچانک رک جاتا ہے اور مریض ہلاک ہوجاتا ہے یا پھر تیزی سی ہارٹ فیل کی جانب بڑھتا ہے۔
اسے طب کی زبان میں جینیاتی کارڈیو میوپیتھیس کہا جاتا ہے۔ ان کے نصف مریضوں کو عطیہ قلب درکار ہوتا ہے کیونکہ یہ مرض لاعلاج ہے اور عطیات بھی محدود ہیں۔ اندازہ ہے کہ دنیا بھر میں 250 میں سے ایک فرد اس کیفیت کا شکار ہوسکتا ہے اور صرف برطانیہ میں ہی اسے ڈھائی لاکھ سےزائد مریض موجود ہیں۔
ٹیکے میں سی آر آئی اس پی آر نامی ٹیکنالوجی استعمال کی جائے گی جس کی بدولت مریضوں کے ڈی این اے کو نئے سرے سے لکھا جائے گا یا ناقص جین کو درست کیا جائے گا تاہم اس میں ماہرین نے غوروفکر کرکے اس تکنیک کو مزید بہتر بنایا ہے۔

سان فرانسسكو: (ویب ڈیسک) یوٹیوب نے ایک آپشن کا اضافہ کیا ہے جس کی بدولت آپ بہت آسانی سے طویل ویڈیو کو ایک منٹ کے شارٹ کلپ میں تبدیل کرسکتے ہیں یعنی پہلے سے اپ لوڈ شدہ ویڈیو بھی کاٹ کر اس کے ٹکڑے بنائے جاسکتے ہیں۔
کئئی ویب سائٹ نے اس کے اسکرین شاٹ بھی دکھائے ہیں جسے ’ایڈٹ انٹو شارٹس‘ کا نام دیا گیا ہے۔ اس طرح یوٹیوبر کو شارٹ بنانے میں بہت آسانی ہوگی جبکہ ہرسال ڈیڑھ ارب صارفین طویل اور شارٹ ویڈیو بناکر سائٹ پر اَپ لوڈ کررہے ہیں۔ یہی وجہ ہے کہ کروڑوں صارفین اس آپشن کے لیے بے تاب تھے جس کی کمی اب پوری کردی گئی ہے۔
شارٹ بنانے کے آپشن میں ایڈیٹنگ کے تمام ضروری ٹول شامل ہیں جن میں ٹیکسٹ، فلٹر اور ٹائم لائن ایڈیٹر شامل ہیں۔ دوسری جانب آپ تبدیل شدہ کلپ میں مزید ویڈیو بھی شامل کرسکیں گے تاہم اس کی گنجائش صرف 60 سیکنڈ تک ہی ہوگی۔ تبدیل شدہ ویڈیو دیکھتے ہوئے صارفین اصل اور بڑی ویڈیو پر بھی جاسکتے ہیں جس کے لیے ایک کلک کی ضرورت ہوگی۔
جیسا کہ پہلے کہا گیا کہ یوٹیوب نے ٹک ٹاک کو اپنا شعوری حریف سمجھتے ہوئے مختصر ویڈیو کے لیے اپنے صارفین کو کئی ترغیبات دی تھیں جن میں فنڈنگ بھی شامل ہے۔ دوسری جانب ٹک ٹاکر اب تک کمپنی کی جانب سے رقم کے معاملے پر خفا ہیں اور اس کا فائدہ بھی یوٹیوب نے اٹھایا ہے۔