اسلام آباد: (ویب ڈیسک) اسلام آباد کی عدالت نے سابق وزیراعظم و چیئرمین پی ٹی آئی عمران خان کی 10 مقدمات میں عبوری ضمانتوں کو منظور کر لیا۔
چیئرمین تحریک انصاف عمران خان ضمانت کی درخواستوں پر سماعت کے سلسلے میں اسلام آباد کی ڈسٹرکٹ اینڈ سیشن عدالت میں پیش ہوئے جہاں جج کامران بشارت مفتی نے درخواستوں پر سماعت کی۔
عدالت نے عمران خان کی 10 مقدمات میں عبوری ضمانتوں کو کنفرم کردیا اور انہیں 5 ،5 ہزار روپے کے مچلکے جمع کرانے کی ہدایت کی۔
واضح رہے کہ عمران خان کے خلاف اسلام آباد کے مختلف تھانوں میں لانگ مارچ کے دوران توڑ پھوڑ اور املاک کو نقصان پہنچانے کے مقدمات درج کیے گئے تھے جس میں وہ عبوری ضمانت پر تھے۔

اسلام آباد: (ویب ڈیسک) پاکستان مسلم لیگ ن کے رہنماء محمد زبیرنے کہا ہے کہ قوم کوایمان داری کا لیکچردینے والے عمران خان کوفارن فنڈنگ کا حساب دینا ہوگا، فنانشل ٹائمز کی سٹوری فارن فنڈنگ کا ایک چھوٹاسا حصہ ہے، حضرت عمرفاروق کی چادرکی مثالیں دینے والا عمران خان خود احتساب کیلئے تیار نہیں ہے، عمران خان سے فارن فنڈنگ کا سوال کریں گے اور بار بار کریں گے۔
اسلام آباد میں پریس کانفرنس کرتے ہوئے مسلم لیگ ن کے رہنما محمد زبیرنے کہا کہ فارن فنڈنگ کیس 8 سال سے الیکشن کمیشن میں پڑاہے تاکہ عمران خان اورپی ٹی آئی اس کاجواب دیں، یہ ایک سادہ کیس ہے، باہر سے پیسے آئے ہیں اورملکی قانون کے مطابق ان پیسوں کے زرائع اورماخذ بتانا ضروری ہے۔
محمد زبیر نے کہا کہ یہ کیس مسلم لیگ ن یاپی پی پی نے نہیں بلکہ اکبرایس بابر نے فائل کیا تھا جو مسلم لیگ ن کے بانی رکن ہے، اکبرایس بابرنے 2014 میں یہ کیس فائل کیا اورشواہدپیش کئے جس میں واضح طور پر بتایا گیا تھا کہ کونسے زرائع سے کون سے اکاونٹس میں کتنے پیسے آئے تھے اوران میں سے کتنے ڈکلئیرکئے گئے اورکونسے ڈکلئیرنہیں کئے، ملکی قانون کے مطابق تمام پیسوں کے زرائع اور ان منتقل ہونے والی اکاونٹس کو ڈکلئیر کرنا ضروری ہے۔
انہوں نے کہا کہ عمران خان سب سے زیادہ سچے اورایماندارہونے کادعوی کرتے ہیں، سب پرانگلی اٹھاتے ہیں، الزام لگاتے ہیں کہ فلاں نے حساب نہیں دیا فلاں نے رسیدیں نہیں دیں۔ ہم ان سے کہتے ہیں کہ جناب آپ اپنا حساب تودیں لیکن وہ کبھی ہائیکورٹ بھاگتے ہیں اورکبھی الیکشن کمیشن میں کارروائی رکواتے ہیں، کبھی سپریم کورٹ بھاگتے ہیں، اس عمل میں 8 سال گزرگئے ہیں۔

پشاور: (ویب ڈیسک) پشاور میں بچیوں سے زیادتی میں ملوث ملزم کو مقامی عدالت نے جوڈیشل ریمانڈ پر جیل بھیج دیا۔
تفصیلات کے مطابق پشاور میں بچیوں سے زیادتی اور قتل میں ملوث ملزم کو ایک روزہ ریمانڈ کے بعد آج دوبارہ مقامی عدالت میں پیش کیا گیا، ملزم کو بکتربند گاڑی میں سخت سیکورٹی میں عدالت لا کر مجسٹریٹ کی عدالت میں پیش کیا گیا، مقامی عدالت نے ملزم کو جوڈیشل ریمانڈ پر جیل بھیجنے کے احکامات جاری کئے۔
ملزم پر تین بچیوں سے زیادتی کے بعد دو کو قتل کرنے کا الزام ہے، بچیوں سے زیادتی کے واقعات رواں ماہ جولائی کی تین تاریخ اتوار کو رونما ہوئے تھے۔
واضح رہے کہ مقامی عدالت نے ملزم کو گزشتہ روز ایک روزہ ریمانڈ پر پولیس کے حوالے کیا گیا تھا۔

لاہور : (ویب ڈیسک) مسلم لیگ ن نے اسپیکر پنجاب اسمبلی کا الیکشن لاہور ہائیکورٹ میں چیلنج کر دیا۔
مسلم لیگ ن نے درخواست میں نومنتخب اسپیکر سبطین خان سمیت دیگر کو فریق بنایا ہے۔ لاہور ہائیکورٹ میں درخواست منصور عثمان اعوان کی وساطت سے دائر کی گئی۔
درخواست میں مؤقف اختیار کیا گیا کہ اسپیکر پنجاب اسمبلی کے الیکشن میں قانونی تقاضے پورے نہیں کیے گئے اور اسپیکر پنجاب اسمبلی کے الیکشن خفیہ رائے شماری کے ذریعے ہوتی ہے۔
مؤقف اختیار کیا گیا کہ اسپیکر کے الیکشن میں بیلٹ پیپرز پر سیریل نمبر درج کرنا قانون کی خلاف ورزی ہے۔
درخواست میں استدعا کی گئی کہ لاہور ہائیکورٹ اسپیکر پنجاب اسمبلی کے انتخاب کو کالعدم قرار دے اور عدالت اسپیکر پنجاب اسمبلی کا انتخاب دوبارہ کروانے کا حکم دے۔

لاہور : (ویب ڈیسک) پنجاب میں نکاح کے لیے ختم نبوت کے حلف نامے پر دستخط کرنا لازمی قرار دے دیا گیا۔
وزیر اعلیٰ پنجاب پرویز الہیٰ نے نکاح کے لیے ختم نبوت پر ایمان کے حلف والے نئے فارم استعمال کرنے کی ہدایت کر دی۔ پرویز الہیٰ کا کہنا ہے کہ نکاح نامے میں ختم نبوت پر ایمان کا حلف شامل ہونے پر قوم کو مبارک باد پیش کرتا ہوں۔
انہوں نے کہا ہے کہ نکاح کے وقت دلہا اور دلہن کے لیے ختم نبوت کے حلف نامے پر دستخط کرنا لازمی ہوگا اور نکاح رجسٹرار کو ختم نبوت کے حلف نامے والے نئے فارم دیےجائیں۔
ان کا کہنا ہے کہ نیا نکاح فارم استعمال نہ کرنے والے نکاح رجسٹرار کو ایک ماہ قید اور جرمانے کی سزا ہو سکتی ہے۔

اسلام آباد: (ویب ڈیسک) کشمیری حریت رہنما یاسین ملک کی اہلیہ مشعال ملک نے کہا ہے کہ یاسین ملک کو کچھ ہوا تو ذمہ داری بھارتی حکومت پر عائد ہو گی۔
یاسین ملک کی اہلیہ مشعال ملک نے بھارتی وزیر اعظم نریندر مودی کو خط لکھ دیا۔ جس میں انہوں نے نریندر مودی کو کہا ہے کہ میرے شوہر اس وقت بھارتی جیل میں ہیں۔ یاسین ملک کشمیریوں کی توانا آواز اور عدالتی ٹرائل میں ناانصافی و عمر قید کی سزا کے بعد بھوک ہڑتال پر ہیں۔
انہوں نے کہا کہ یاسین ملک کے خلاف جاری ٹرائل ناانصافی اور جمہوری نظام کے برعکس ہے۔ مسلسل قید و تشدد کے باعث یاسین ملک کو کئی بیماریاں لاحق ہوچکی ہیں۔
مشعال ملک نے کہا کہ کیس کی تاریخ کے دوران یاسین ملک نے متعدد بار عدالت میں موجود ہونے کی درخواست کی لیکن بھارتی حکام نے ان کی موجودگی کے بغیر جراح کی۔ جس سے اندازہ ہوتا ہے کہ یاسین ملک کے خلاف یکطرفہ ٹرائل کیا جا رہا ہے۔
انہوں نے کہا کہ یاسین ملک کیس میں انصاف کے تقاضے پورے نہیں کیے جا رہے اور انصاف کے حصول کی خاطر اب یاسین ملک جیل میں بھوک ہڑتال پر ہیں۔
انہوں نے بھارتی وزیراعظم نریندر مودی سے درخواست کی کہ معاملے کا نوٹس لیا جائے۔ کشمیری اقوام متحدہ کی قراردادوں کے مطابق جہدوجہد کر رہے ہیں اور اگر یاسین ملک کو دوران قید کچھ ہوا تو اس کی ذمہ داری بھارتی حکومت پر ہو گئی۔