گلگت: (ویب ڈیسک) استور اور گلگت میں زلزلے کے جھٹکے محسوس کئے گئے جس سے لوگوں میں خوف و ہراس پھیل گیا۔
چلاس اور گردو نواح میں زلزلے کے جھٹکے محسوس کیے گئے ہیں جس کے باعث لوگوں میں خوف و ہراس پھیل گیا اور وہ کلمہ طیبہ کا ورد کرتے ہوئے گھروں سے باہر نکل آئے۔ زلزلہ پیما مرکز کے مطابق زلزلے کی شدت کا اندازہ لگایا جا رہا ہے۔

راولپنڈی: (ویب ڈیسک) عدالت نے 10 سالہ طالب علم سے زیادتی اور اسے قتل کرنے والے مجرم کو موت کی سزا سنا دی۔
راولپنڈی کے ایڈیشنل ڈسٹرکٹ اینڈ سیشن جج افضل مجوکہ نے 10 سالہ طالب علم کو اغوا کرکے زیادتی کرنے اور اس کے بعد قتل کرنے والے سفاک مجرم کو پھانسی کی سزا سنادی۔
عدالت نے سفاک مجرم کاشف کو جرم ثابت ہونے پر عمر قید اور 5 لاکھ روپے جرمانہ کی سزا بھی سنائی، اور حکم دیا کہ مجرم کو اس وقت تک تختہ دار پر لٹکائے رکھا جائے جب تک موت واقع نہ ہوجائے۔

راولپنڈی: (ویب ڈیسک) ضلعی انتظامیہ نے او آئی سی کانفرنس کے پیش نظر 22 مارچ کو عام تعطیل کا اعلان کردیا، تعلیمی اداروں کے ساتھ دیگر ادارے بھی بند رہیں گے۔
تفصیلات کے مطابق ضلعی انتظامیہ نے راولپنڈی میں 22 مارچ کو عام تعطیل کا اعلان کردیا ، اس حوالے سے راولپنڈی کی تحصیل اور کنٹونمنٹس کی حدود میں عام تعطیل کا نوٹیفکیشن جاری کردیا گیا ہے۔
ضلعی انتظامیہ کا کہنا ہے کہ او آئی سی کانفرنس کی وجہ سے عام تعطیل کا اعلان کیا گیا،22مارچ کو تعلیمی اداروں کے ساتھ دیگر ادارے بھی بند رہیں گے۔
یاد رہے اس سے قبل وزیر داخلہ شیخ رشید نے او آئی کانفرنس کے سلسلے میں 22 سے 24 مارچ تک مقامی تعطیل کا اعلان کیا تھا۔
خیال رہے اسلامی تعاون تنظیم کے وزرائے خارجہ کونسل کا اجلاس 22 اور 23 مارچ کو اسلام آباد میں منعقد ہوگا، جس میں 48 ممبر ممالک کے وزرا شرکت کریں گے۔

اسلام آباد: (ویب ڈیسک) وزیراعظم عمران خان کے معاون خصوصی شہباز گل نے کہا ہے کہ ہارس ٹریڈنگ کرنے کی کوشش کی گئی اور مخالف طاقتوں نے ایڑی چوٹی کا زور لگایا۔ ان کا کہنا تھا کہ ہر موقع پر عمران خان کی حکومت گرانے کے لیے بیرونی سازش ہوئی۔
ذرائع ابلاغ سے بات چیت کرتے ہوئے شہباز گل نے کہا کہ عوام عمران خان کے ساتھ کھڑی ہے۔ ان کا کہنا تھا کہ ہم ان کا مقابلہ کریں گے اور ہرا کر بھی دکھائیں گے۔
شہباز گل نے کہا کہ ہمارے جعلی پلاسٹک کے بنے ہوئے لیڈران ہیں، انہیں یورپی یونین کے بارے میں کوئی قانونی بیان بھی دے دیا جائے تو برا لگتا ہے۔ انہوں نے کہا کہ پاکستان میں ڈرون حملے ہو رہے تھے، 80 ہزار پاکستانی شہید ہو گئے۔
انہوں نے کہا کہ ہماری بہادر افواج نے ہر میدان میں اپنا لوہا منوایا، اس ملک کی بہادر ماؤں کے علاوہ کسی نے ہماری مدد نہیں کی لیکن پاکستان دہشت گردی کے خلاف جنگ میں سرخرو ہوا۔
شہباز گل نے کہا کہ عمران خان بکھری ہوئی معیشت کو جوڑنے کی کوشش کرتے رہے، غریبوں کے لیے کام کر رہے ہیں اور ملکی ترقی کے لیے نئی صنعتیں لگا رہے ہیں جب کہ مراد سعید 43 کروڑ روپے میں بننے والی سڑک 17 کروڑ میں بنا رہے ہیں۔ انہوں نے کہا کہ عمران خان پاکستان کو آگے لے کر گئے ہیں۔
وزیراعظم کے معاون خصوصی شہباز گل نے کہا کہ پاکستان میں ہمیشہ اشرافیہ کو آگے کرنے کے لیے لائن توڑی گئی ہے۔ انہوں نے کہا کہ عمران خان نے بھی لائن توڑی لیکن غریب کو آگے لانے کے لیے۔ انہوں نے کہا کہ عمران خان نے آج ہر غریب کی جیب میں دس لاکھ روپیہ ڈال دیا ہے۔
شہباز گل نے واضح طور پر کہا کہ جہاں ہمارا خون بہے گا ہم انکار کریں گے۔ انہوں نے کہا کہ ہم آپ کے کرائے کے غنڈے یا چوکیدار نہیں ہیں۔
انہوں نے کہا کہ عمران خان نے حرمت رسول ﷺ کی جنگ لڑی ہے۔ انہوں نے کہا کہ عمران خان نے صاف انکار کر کے عام پاکستانی کی چھاتی بھی چوڑی کی۔ ان کا کہنا تھا کہ واضح طور پر کہہ رہا ہوں عمران خان تیار ہے ان چوروں سے لڑنے کے لیے۔
شہباز گل نے کہا کہ ڈی سی آفس میں جلسے کے لیے درخواست دی ہے۔ انہوں ںے کہا کہ ہم نے جلسے کا پہلے اعلان کیا تھا جب کہ اپوزیشن نے محاز آرائی کی خاطر جلسے کے لیے اسی جگہ کا انتخاب کیا ہے۔ ان کا کہنا تھا کہ ن لیگ کے ایک رکن نے پہلے ایف اے کیا اور پھر میٹرک کیا۔
اس موقع پر پی ٹی آئی کی رکن قومی اسمبلی کنول شوذب نے پاکستان سمیت پوری مسلم دنیا کو مبارکباد پیش کرتے ہوئے کہا کہ مجھے فخر ہے کہ میں عمران خان کی ورکر ہوں۔ انہوں نے کہا کہ پوری دنیا اس وقت عمران خان کو مبارکباد پیش کر رہی ہے۔
رکن قومی اسمبلی کنول شوذب نے کہا کہ عمران خان صرف پاکستان ہی نہیں پوری اسلامی دنیا کے لیڈر ہیں اور وہ چوروں کے خلاف آپ کی اور میری نسلوں کی لڑائی لڑ رہے ہیں۔

اسلام آباد: (ویب ڈیسک) قومی احتساب بیورو(نیب) کے ایگزیکٹیو بورڈ نے 11 نئی انکوائریوں اور 2 انویسٹی گیشنز کی منظوری دے دی ہے۔
چیئرمین نیب کی زیر صدارت نیب ایگزیکٹو بورڈ کا اہم اجلاس ہوا، جس میں یوٹیلیٹی اسٹور کارپوریشنز، پنجاب کو آپریٹو بورڈ، پاکستان ریلویز، وزرات ہاؤسنگ اورمحکمہ آبپاشی لاڑکانہ کے خلاف تحقیقات کی منظوری دی گئی۔
سابق آئی جی پولیس سندھ غلام حیدرجمالی اور اورڈسٹرکٹ ڈائریکٹرمحکمہ زراعت ڈی آئی خان کے خلاف بھی انوسٹی گیشن ہوگی، نیب ایگزیکٹو بورڈ نے محکمہ جنگلات ہری پور، محکمہ آبپاشی لاڑکانہ، شہید بے نظیر بھٹو میڈیکل یونیورسٹی لاڑکانہ سمیت دیگر کے خلاف بھی انکوائریز کی منظوری دے دی۔
چیئرمین نیب نے کہا ہے کہ بڑی مچھلیوں کے خلاف میگا کرپشن کے مقدمات منطقی انجام تک پہنچانا اولین ترجیح ہے، نیب کا تعلق کسی سیاسی جماعت، گروہ اور فرد سے نہیں بلکہ ریاست پاکستان سے ہے۔