امریکا نے روس پر چین سے ہتھیار اور دیگر فوجی امداد لینے کا الزام عائد کیا ہے۔

برطانوی میڈیا کے مطابق امریکا نے روس پرالزام عائد کیا ہےکہ وہ یوکرین کے ساتھ لڑائی میں چین سے اسلحہ اور دیگر فوجی امداد لے رہا ہے جب کہ امریکا نے چین کو اس حوالے سے خبردار بھی کیا ہے۔

میڈیا رپورٹس کے مطابق امریکی عہدیدار کی جانب سے جاری بیان میں کہا گیا ہےکہ اگر یوکرین پر جاری حملوں میں چین نے روس کی کسی طرح بھی مدد کی تو دونوں ممالک کو اس کے نتائج بھگتنا ہوں گے۔

برطانوی میڈیا کا کہنا ہےکہ امریکی میڈیا رپورٹس میں امریکی عہدیدار کا نام ظاہر نہیں کیا گیا ہے تاہم امریکی میڈیا میں اس عہدیدارسے منسلک بیان میں کہا گیا ہےکہ روس نے یوکرین پر حملے کے بعد چین سے فوجی امداد کا مطالبہ کیا تھا۔

امریکا کے مقامی میڈیا کا کہنا ہے کہ حالیہ دنوں میں روس نے چین نے خاص فوجی امداد کا مطالبہ کیا جن میں ڈرونزبھی شامل ہیں تاہم چین کی جانب اب تک اس پر کوئی رد عمل نہیں دیا گیا۔

دوسری جانب واشنگٹن میں چینی سفارتخانے نے روسی امداد سے متعلق خبروں پر لاعلمی کا اظہار کیاہے۔

میڈیا رپورٹس میں بتایا گیا ہے کہ امریکا کی جانب سے یہ وارننگ ایک ایسے وقت میں سامنے آئی ہے جب روم میں امریکی اورچینی عہدیداروں کی ملاقات متوقع ہے۔

میڈیا رپورٹس میں بتایا گیا ہےکہ یوکرین اور روس کے درمیان کشیدگی کے آغاز سے ہی چین پرانے اتحادی روس کی حمایت میں نظر آیا ہے تاہم اس کا اظہار عوامی سطح پر نہیں کیا گیا۔

یوکرین کے دارالحکومت کے نزدیک روسی افواج کی فائرنگ میں نیویارک ٹائمز کا ایک صحافی ہلاک ہوگیا جب کہ دوسرا شدید زخمی ہے۔
عالمی خبر رساں ادارے کے مطابق یوکرین کے دارالحکومت کیف سے متصل شہر ایرپن میں پناہ گزین کیمپ کی کوریج کے بعد واپس آنے والے دو امریکی صحافیوں پر فائرنگ کی گئی ہے۔
فائرنگ سے 51 سالہ صحافی برینٹ ریناؤڈ موقع پر ہی ہلاک ہوگئے جب کہ ان کے ساتھی کو شدید زخمی حالت میں اسپتال منتقل کیا گیا ہے جہاں ان کی حالت تشویشناک بتائی جا رہی ہے۔
کیف پولیس کے چیف نے میڈیا کو بتایا کہ دونوں صحافیوں کو ایرپن میں روسی فوج نے ایک چیک پوسٹ پر گولیوں کا نشانہ بنایا جب صحافی پناہ گزین کیمپ پر ٹیلی فلم کی ریکارڈنگ کرکے واپس آرہے تھے۔
نیویارک ٹائمز کے مطابق مقتول صحافی کئی برسوں سے ان کے ساتھ منسلک تھے اور یوکرین میں خصوصی اسائنمنٹ پر تھے۔ روسی فوج نے تاحال امریکی صحافی کے قتل پر کوئی ردعمل نہیں دیا۔

روس کے وزیر خزانہ اینٹن سلوانوف کا کہنا ہےکہ غیر ملکی پابندیوں سے روس کے سونے اور زرمبادلہ کے 640 ارب ڈالر کے ذخائر میں سے 300 ارب ڈالر منجمد ہوئے ہیں۔
غیر ملکی خبرایجنسی کے مطابق روسی میڈیا کو دیےگئے ایک انٹرویو میں روسی وزیر خزانہ کا کہنا تھا کہ مغرب چین پر بھی روس سے تجارت محدود کرنے کے لیے دباؤ ڈال رہا ہے اور چینی یوآن میں روسی ذخائر تک روس کی رسائی روکنا چاہتا ہے۔
اینٹن سلوانوف کا کہنا تھا کہ مغربی دباؤ کے باوجود چین کے ساتھ ہماری شراکت داری روس چین تعاون کو نہ صرف برقرار رکھے گی بلکہ روس چین تعاون وہاں بھی بڑھایا جائے گا جہاں مغربی مارکیٹیں بند ہیں۔
روسی وزیر خزانہ کا کہنا تھا کہ روس اپنی ریاست کے قرض کی ذمہ داریاں پوری کرے گا اور قرض کی مد میں اس وقت تک روبل ادا کرے گا جب تک ریاستی ذخائر منجمد نہ کر دیے جائیں۔