پشاور: (ویب ڈیسک) پشاور میں بی آر ٹی سروس تو چل رہی ہے لیکن منصوبے میں شامل شاپنگ مالز اور پلازے نہ بن سکے، تعمیراتی کام بھی سست روی کا شکار ہوگیا۔
خیبر پختونخوا حکومت نے پشاور میں بی آر ٹی بس تو دوڑا دی لیکن منصوبے میں شامل شاپنگ مالز اور پارکنگ پلازے تاحال پایہ تکمیل تک نہ پہنچ سکے۔ بی آرٹی منصوبے میں تین شاپنگ مالز اور پارکنگ پلازہ بھی شامل تھے لیکن عوامی دباؤ کے تحت صرف بس سروس ہی شروع کی جاسکی، کامیابیوں اور ایوارڈز کے دعوؤں کے باوجود منصوبے کا تعمیراتی کام مکمل نہیں کیا جاسکا۔
معاون خصوصی اطلاعات بیرسٹر سیف نے ایک بار پھر جان چھڑاتے ہوئے جلد مکمل کرلیا جائیگا کے الفاظ دہرا دیئے۔ شہریوں نے بھی تعمیراتی میں سست روی پر حکومت کو آڑے ہاتھوں لیا۔ ان کا کہنا ہے کہ حکومت کام کو جلد مکمل کرے۔
بی آر ٹی منصوبے میں حکومت کی جانب سے سبسڈی نہ دینے کا اعلان بھی کیا گیا تھا لیکن ایک بار پھر یوٹرن لیتے ہوئے 2020-21 میں 1 اعشاریہ 8 ارب روپے کی سبسڈی بھی دی گئی ہے۔

لاہور: (ویب ڈیسک) حکومت گرانے کا مشن، ماڈل ٹاؤن میں شہباز شریف کی رہائش گاہ پر بڑی بیٹھک، اپوزیشن جماعتوں کی قیادت سر جوڑ کر بیٹھ گئی۔ اہم فیصلے متوقع ہیں۔
سابق صدر آصف علی زرداری وفد کے ہمراہ شہباز شریف کی رہائش گاہ ماڈل ٹاؤن پہنچے، جس میں پیپلزپارٹی کے چئیرمین بلاول بھٹو زرداری، سابق وزیراعظم سید یوسف رضا گیلانی، پارلیمانی لیڈر سید حسن مرتضی سمیت دیگر شامل ہیں۔ شہباز شریف اور مولانا فضل الرحمان نے آصف علی زرداری اور بلال بھٹو کا استقبال کیا۔ اپوزیشن رہنماؤں کے درمیان حکومت مخالف تحریک کے حوالے سے اہم مشاورت ہوگی۔

اسلام آباد: (ویب ڈیسک) فواد چودھری نے کہا ہے کہ تحریک عدم اعتماد کیلئے تین ایم این ایز کو پیسوں کی آفر ہوئی، لوٹ مار کے دو بڑے سوداگر اکٹھے ہوگئے، تمام معاملات پر نظر ہے، ہارس ٹریڈنگ نہیں ہونے دیں گے۔
وفاقی وزیر اطلاعات و نشریات نے اسلام آباد میں میڈیا سے گفتگو کرتے ہوئے کہا کہ پارٹی کی سینٹرل ایگزیکٹو کمیٹی کا اجلاس ہوا، وزیراعظم نے دورہ روس سے متعلق اعتماد میں لیا، شرکاء نے وزیراعظم کی پالیسیوں پر اعتماد کا اظہار کیا، 23 سال بعد پاکستان کے وزیراعظم روس کا دورہ کر رہے ہیں، دنیا کی نظریں وزیراعظم اور روسی صدر کی ملاقات پر ہوں گی، وزیراعظم نے کل واضح کیا کہ کسی گروپ کا حصہ نہیں ہے، دنیا کی 40 فیصد سے زیادہ گندم روس اور یوکرین میں پیدا ہوتی ہے۔
فواد چودھری کا کہنا تھا کہ رات پاکستان کے 2 بڑے سوداگر اکٹھے ہوئے، ہمارے 3 ایم این ایز کو عدم اعتماد کے لئے پیسوں کی آفر کی گئی، پاکستان میں کرپشن کی 2 تصاویر شہباز شریف اور زرداری ہیں، ان میں طے ہوا کہ عدم اعتماد کے لئے کتنے کتنے پیسے لگائیں گے، 3 ایم این ایز کو پیسوں کی آفر شرمناک ہے، اگر ان میں جرات ہے تو عدم اعتماد کل ہی لے کر آئیں، اپوزیشن کو چیلنج ہے کہ عدم اعتماد لائیں ان کو لگ پتہ جائے گا، شہباز شریف کیس کی روزانہ سماعت کے امکانات پیدا ہو رہے ہیں، جس دن کیس روزانہ چلے گا شہباز شریف کو جیل جانا ہوگا، اپوزیشن عدم اعتماد کی تحریک نہیں لاسکتی۔
وزیر مملکت فرخ حبیب نے کہا کہ منڈی بہاؤالدین کا جلسہ کامیاب رہا، عوام نے وزیراعظم عمران پر بھرپور اعتماد کا اظہار کیا، پنجاب میں پہلی بار ضلعی ترقیاتی بجٹ دیا گیا ہے۔

اسلام آباد: (ویب ڈیسک) لاہور کے بعد اب اسلام آباد کے سرکاری اسکولوں کے بچوں کو بھی مفت کھانا ملے گا۔
اب اسلام آباد کے سرکاری پرائمری اسکولوں کے بچوں کو گھروں سے لنچ باکس لانے کی ضرورت نہیں پڑے گی اور نہ ہی باہر سے چپس، پاپڑ یا بسکٹ کھانا پڑیں گے۔
لاہور کے بعد اب اسلام آباد کے سرکاری پرائمری اسکولوں کے بچوں میں بھی مفت کھانا فراہم کیا جائے گا اور روزانہ کا مینیو مختلف ہو گا۔
وفاقی وزیر تعلیم شفقت محمود نے اسلام آباد میں اسکول کھانا پروگرام کا افتتاح کر دیا۔ جس میں 100 سرکاری اسکولوں کے 25 ہزار بچے دوپہر کا کھانا اسکول میں ہی کھا سکیں گے۔
وفاقی وزیر تعلیم کی جانب سے ایف سکس تھری میں پرائمری ماڈل اسکول میں اسکول کھانا پروگرام کا آغاز کیا گیا۔ وزیر تعلیم شفقت محمود نے مقامی ٹرسٹ کی زیرپرستی چلنے والے پروگرام کا افتتاح کیا۔
اس موقع پر وفاقی وزیر تعلیم شفقت محمود نے کہا کہ اس اچھے اقدام سے اسکولوں میں طلبا کی حاضری میں زبردست بہتری آئی ہے۔
مقامی ٹرسٹ کے چیئرمین شاہد لون نے کہا کہ بچوں کو غذائیت سے بھرپور کھانے کی فراہمی کے لیے کھانے نیوٹریشن میل پر لے کر جا رہے ہیں۔
واضح رہے کہ اسکولوں میں ایسے پروگرامز نہ صرف طلبا کی حاضری کو یقینی بنائیں گے بلکہ بچوں کی اچھی صحت کے بھی ضامن ہوں گے۔

کراچی : (ویب ڈیسک) کراچی بندرگاہ ایک دن بعد بھی کھل نہ سکی.14 جہاز لنگ انداز نہیں ہو سکے۔
کراچی میں ماہی گیروں کی جانب سے بندرگاہ کے چینل کا گھیراؤ جاری ہے ۔ احتجاج کو تقریباًچوبیس گھنٹے کا وقت گزر گیا ہے تاہم بندرگاہ ابھی تک کھولی نہیں جا سکی۔ چینل بند ہونے سے اب تک 14 جہاز لنگر انداز نہیں ہوسکے۔
وزیراعظم کے مشیر بحری امور محمود مولوی کے ماہی گیروں کے ساتھ مذاکرات ناکام ہو گئے تھے۔ محمود مولوی کہتے ہیں آج پھر بات چیت ہوگی۔ مذاکرات ناکام ہوئے تو ایکشن ہو گا۔
ماہی گیروں کا مطالبہ ہے کہ انہیں بلوچستان سمیت دیگرسمندری حدود میں شکارکی اجازت دی جائے۔ کشتیاں ضبط کرنےکےساتھ بھاری جرمانوں کوبھی روکا جائے۔
مشیر بحری امور محمود مولوی کا کہنا ہے کہ ہم کسی صورت بندرگاہ کو اس طرح بند نہیں رکھ سکتے ۔ آج ماہی گیروں سے مذاکرات کا آخری راونڈ ہوگا۔ ہم نے تمام تیاریاں مکمل کرلی ہیں۔ اگر مذاکرات ناکام ہوئے تو ایکشن ہوگا۔
انہوں نے کہا رات ہونے والے مذاکرات میں چیزیں طے پا گئی تھی تاہم کچھ عناصر کی جانب سے مذاکرات کو سبوتاژ کرنے کی کوشش کی گئی۔

لاہور: (ویب ڈیسک) مسلم لیگ ن کی ترجمان مریم اورنگزیب کو کافی شاپ پر ایک انوکھا سرپرائز ملا، جس کی تصویر بھی انہوں نے ٹوئٹر پر شئیر کی۔
مریم اورنگزیب نے کافی کے دو مگ کی تصویر شئیر کی ہے، جس کے ایک کپ پر ” شیر آگیا ” درج ہے، جبکہ دوسرے میں شیر کی تصویر بھی واضح دکھائی دے رہی ہے۔ مریم اورنگزیب نے اس پوسٹ پر لکھا کہ انہوں نے لاہور کے ایک ریسٹورنٹ میں کافی کا آرڈر دیا اور انہیں یہ خوشگوار سرپرائز ملا۔
مسلم لیگ ن کی ترجمان نے بھی پوسٹ پر اردو میں ”شیر آگیا” لکھنے کے ساتھ شیر کے ایموجی کا استعمال بھی کیا۔