وفاقی وزیر اطلاعات فواد چوہدری نے کہا ہے کہ مسلم لیگ(ن) کی جانب سے ویڈیوز جاری کرنے کا واحد مقصد عدلیہ کو دباؤ میں لانا ہے اور امید ہے کہ عدلیہ اس دباؤ کو مسترد کر دے گی۔

اسلام آباد میں کابینہ کے اجلاس کے بعد پریس کانفرنس کرتے ہوئے فواد چوہدری نے کہا کہ جس طریقے سے یہ ساری ویڈیوز جعلی ثابت ہوئیں اس پر فارنزک ڈپارٹمنٹ کی تعریف نہ کرنا زیادتی ہو گی، یہ پہلا موقع نہیں ہے کہ مسلم لیگ(ن) کی طرف سے اس طرح کی ویڈیوز جاری کی گئی ہوں اور اس کا واحد مقصد عدلیہ کو دباؤ میں لانا ہے۔

انہوں نے کہا کہ وہ کیوں مہم چلا کر یہ سمجھے تھے کہ فوج کے جرنیل دباؤ میں آ جائیں گے اور جب کیسز چلنا شروع ہوتے ہیں تو اس طرح کی مہم چلائی جاتی ہے کہ شاید ججز دباؤ میں آ جائیں، مجھے امید ہے عدلیہ اس دباؤ کو مسترد کرے گی، جس طرح سے سپریم کورٹ بار ایسوسی ایشن نے اس معاملے پر اپنا لائحہ عمل دیا ہے۔

ان کا کہنا تھا کہ اس معاملے کو یہاں نہیں رکنا چاہیے اور جو لوگ اس کام میں ملوث ہیں وہ ہمارے سامنے ہیں، مریم نواز کا رویہ ہمیشہ منفی رہا ہے، لوگوں کی ٹیپ بنانا، جعلی لیکس بنانا، انہوں نے جعلی لیکس تیار کرنے کے لیے ٹیمیں بنائی ہوئی ہیں، یہ ٹیکنالوجی کی مدد سے جعلی ویڈیوز تیار کرکے یہ سمجھتے ہیں کہ ججز اور اکابرین ان کے دباؤ میں آجائیں گے۔

وزیر اطلاعات نے کہا کہ یہ شاید اپنی پارٹی کو قابو کرنے کے لیے بھی اسی طرح کی ویڈیوز بنا رہی ہیں، میرا خیال ہے کہ پاکستان کی تاریخ میں کسی جماعت نے اس طرح کی حرکتیں نہیں کی ہوں گی جس طریقے کی حرکتیں مسلم لیگ(ن) کا مریم نواز گروپ کررہا ہے، ہم اس کی مذمت کرتے ہیں اور پرامید ہیں کہ یہ معاملہ بھی اپنے منطقی انجام کو پہنچے گا۔

انہوں نے کہا کہ پورا ہفتہ سیمینار کا سلسلہ منعقد کیا گیا، پہلے لاہور میں اور پھر اسلام آباد میں ایک سیمینار کیا گیا، دونوں سیمینار غیرملکی فنڈنگ سے کیے گئے اور آج کابینہ میں ڈاکٹر شیریں مزاری نے دفتر خارجہ سے مطالبہ کیا ہے کہ اس فنڈنگ کے ڈونرز سے ویانا کنونشن کے سیکشن 41 کے تحت بات کی جائے اور غیرملکی فنڈنگ کا معاملہ بھی کابینہ میں زیر بحث رہا۔

ان کا کہنا تھاکہ کابینہ نے الیکٹرانک ووٹنگ مشین کے حوالے سے الیکشن کمیشن سے بات کرنے کے لیے ایک کمیٹی تشکیل دی ہے تاکہ اس بات کا تعین کیا جا سکے کہ الیکشن منعقد کرانے کے لیے کتنی مشینیں درکار ہیں، کتنے اخراجات ہوں گے اور ہمیں تکنیکی طور پر کیا معاونت درکار ہو گی۔

فواد چوہدری نے کہا کہ یہ ایک لازمی بات ہے کہ اگلے انتخابات لازمی طور پر الیکٹرانک ووٹنگ مشین کے تحت ہوں گے اور اس کے ساتھ ساتھ 90لاکھ پاکستانی بھی ووٹ ڈالیں گے بلکہ مسلم لیگ(ن) کو ہمارا شکر گزار ہونا چاہیے کیونکہ پہلی بار نواز شریف کے بیٹے بھی ووٹ ڈالنے کے اہل ہوں گے۔

انہوں نے میڈیا کی تنقید پر گلا کرتے ہوئے کہا کہ جب چینی اور ٹماٹر کی قیمتیں بڑھتی ہیں تو ہیڈ لائن لگ جاتی ہیں لیکن جب کم ہوتی ہے تب بھی لوگوں کو بتانا چاہیے، چینی اس وقت 90 سے 95 روپے پر بک رہی ہے اورع اگلے دس سے پندرہ دن میں یہ قیمت 85روپے فی کلو تک آ جائے گی، جب قیمتیں برھتی ہیں تو ہم ہیڈ لائن لگا دیتے ہیں لیکن جب کم ہوتی ہیں تو لوگوں کو لگتا ہے کہ کچھ ہوا ہی نہیں ہے۔

ان کا کہنا تھا کہ ہمیں سب ےس بڑا سندھ بالخصوص کراچی میں آ رہا ہے، 18ویں ترمیم کے بعد مسئلہ یہ ہے کہ وفاقی حکومت پالیسی ہی بنا سکتی ہے، اس پر عمل صوبوں نے ہی کرنا ہے، جب ہم نے سندھ سے کہا کہ آپ گندم ریلیز کریں تو انہوں نے گندم ریلیز نہیں کی ، جب انہیں کہا کہ چینی ریلیز کریں تو انہوں نے چینی ریلیز نہیں ہوتی۔

فاقی وزیر نے کہا کہ ملک میں مہنگائی کے حوالے سے جاری ہونے والے ڈیٹا میں سے 40فیصد کی بنیاد کراچی کی قیمتیں ہیں، بدقسمتی سے کراچی میں پورے پاکستان سے زیادہ قیمتیں ہیں، لاہور میں 20 کلو آٹا 1100 روپے کا مل رہا ہے اور وہی بیگ کراچی میں 1441 روپے کا مل رہا ہے جبکہ چینی کی قیمت بھی زیادہ ہے۔

ان کا کہنا تھا کہ وزارت خزانہ نے کابینہ کو آئی ایم ایف کے پیکج کی تفصیل بھی بتائی جبکہ وفاقی وزارت تعلیم اور صنعت و پیداوار میں خالی آسامیوں پر بھی بریفنگ دی گئی ہے۔

وزیراعظم نےسینئرجوائنٹ سیکرٹری کابینہ ڈویژن حماد شمیمی کے خلاف انکوائری کا حکم دے دیا۔ 

تفصیلات کے مطابق گریڈ اکیس کےافسرحماد شمیمی کے حکومت کےخلاف سوشل میڈیا پربیان دینے پرڈی جی ایف آئی اے ثنااللہ عباسی کوحماد شمیمی کے خلاف انکوائری کی ہدایات کردی گئیں۔

حکومت کے جاری کردہ نوٹفکیشن کے مطابق حماد شمیمی کے خلاف انکوائری 60 روزمیں مکمل کی جائے گی۔ تحقیقات مکمل ہونے کے بعد انکوائری رپورٹ وزیراعظم عمران خان کو پیش کی جائے گی۔

نوٹفکیشن میں یہ بھی کہا گیا کہ حماد شمیمی ضابطے کی خلاف ورزی کے مرتکب ہوئے ہیں۔ حماد شمیمی کے خلاف انکوائری سول سرونٹس رولزکے تحت کی جائے گی۔

واضح رہے کہ گریڈ اکیس کےافسرحماد شمیمی نے سوشل میڈیا پر بیان دیا تھا کہ ’پی ٹی آئی اورطالبان میں ایک مشابہت یہ بھی ہے کہ دونوں حکومت ملنے کےبعد یہ سوچ رہے ہیں کہ اسے چلانا کیسے ہے۔‘ دونوں کی امیدوں کا مرکزبھی آبپارہ ہی ہے۔

پشاور: حکومت نے تحریک طالبان پاکستان کی جانب سے سیز فائر کے اعلان کے بعد 100 سے زائد قیدیوں کو رہا کر دیا جن میں اکثریت کا تعلق انٹرمنٹ سینٹرز سے ہے۔

ذمے دار اعلیٰ سیکیورٹی ذرائع نے اس بات کی تصدیق کی ہے کہ حکومت نے تحریک طالبان کے 100سے زائد قیدیوں کو رہا کر دیا ہے۔ رہائی پانے والوں میں اکثریت ان لوگوں کی ہے جو حکومت کے قائم کردہ انٹرمنٹ سینٹرز میں اصلاح کے عمل سے گزر رہے تھے اور انھیں 6ماہ کی اصلاحی عمل کی تکمیل سے پہلے رہا کر دیا ہے۔ رہائی پانے والے دیگر قیدیوں میں پیدل سپاہی شامل ہیں۔

سیکیورٹی حکام کے مطابق حکومت پاکستان نے یہ فیصلہ تحریک طالبان ( جن کے ساتھ حکومت کے مذاکرات جاری ہیں ) کے مطالبے پر نہیں کیا بلکہ طالبان کی جانب سے یکم نومبر کو سیز فائر کے اعلان کے بعد خیر سگالی کے طور پر کیا ہے۔

ایک اعلیٰ سیکیورٹی اہلکار نے یہ بھی بتایا کہ حکومت نے یہ فیصلہ ماضی کو دیکھ کر اپنی جانب سے کیا ہے اور طالبان کی جانب سے کوئی شرط نہیں عائد کی گئی تھی۔

واضح رہے کہ افغانستان میں اگست کے مہینے میں طالبان حکومت کے قیام کے بعد پاکستان نے تحریک طالبان افغانستان کے کہنے پر تحریک طالبان پاکستان سے مذاکرات کا سلسلہ شروع کیا۔ جس میں افغان طالبان نے پاکستانی طالبان کے مستقبل میں امن میں رہنے اور آئین پاکستان تسلیم کرنے کی ضمانت دی ہے۔ جس کے بعد تحریک طالبان سے مذاکرات جاری ہیں۔ یکم نومبر کو تحریک طالبان نے سیز فائر کا اعلان کیا جس پر بدستور عمل جاری ہے۔

اعلیٰ سیکورٹی حکام کے مطابق تحریک طالبان کے مختلف دھڑوں سے بیک وقت مذاکرات جاری ہیں تاہم یہ مذاکرات ، مذاکرات کاروں کے ذریعے ہو رہے ہیں۔

 فواد چودھری کا کہنا ہے کہ نواز اینڈ کمپنی جعلی ویڈیوز، لیکس اور گیمز سے باہر آ کر الزامات کا جواب دے۔

وفاقی وزیر اطلاعات و نشریات فواد چودھری نے سماجی رابطے کی ویب سائٹ پر ٹویٹ کرتے ہوئے کہا کہ ن لیگ کے ڈرامے مکمل طور پر فلاپ ہو چکے، اگر انہوں نے جیل نہیں جانا تو پیسے واپس کریں، ن لیگ والوں کے پاس یہ ہی مختصر حل ہے، یہ لوگ اس معاملے کو پیچیدہ بنا کر نکلنا چاہتے ہیں۔

نواز اینڈ کمپنی جعلی ویڈیوز، لیکس اور گیمز سے باہر آ کر الزامات کا جواب میرٹ پر دے یہ ڈرامے مکمل فلاپ ہو چکے ہیں جیل نہیں جانا پیسے واپس کریں یہ مختصر حل ہے جس کو پیچیدہ بنا کر نکلنا چاہتے ہیں

— Ch Fawad Hussain (@fawadchaudhry) November 23, 2021