حکومت مخالف اتحاد پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ مشترکہ اجلاس میں پارلیمنٹ کو کھلونا بنایا گیا، اسلام آباد کی جانب مارچ کرینگے، پھرآپ نے نہیں ہم راستے بند کرینگے۔
پشاور میں پاکستان ڈیمو کریٹک موومنٹ کے تحت ہونے والے جلسے سے خطاب کرتے ہوئے مولانا فضل الرحمان نے کہا کہ مشترکہ اجلاس میں پارلیمنٹ کو کھلونا بنایا گیا۔ موجودہ حکومت نےتاریخی قرضے لیے۔ مہنگائی سے پریشان لوگ بچےبیچنےپرمجبورہیں۔ یہ آمروں کےایجنٹ ہیں عوام کے نہیں۔ ہم نےاب تمہارے گریبان میں ہاتھ ڈال دیا ہے۔
ان کا کہنا تھا کہ عمران خان ملکی سیاست کاغیرضروری عنصرہیں، یہ عوام کےنمائندہ نہیں، نوجوان نسل کوگمراہ کرنےکی کوشش کی گئی۔ ہمیں اقتدارکی لالچ نہیں۔ ناجائزحکومت کو سمندر برد کریں گے۔ ملک کو تین سال سے جاری گندے نالے سے نکالنا ہو گا، پاکستان کو آزادی حاصل کرنی ہے تو حکومت سے آزادی حاصل کرنا ہو گی، اداروں کو اب غیر جانبدار رہنا ہو گا، مودی کو دعائیں دینے والے نے کشمیر بیچ دیا، وہ کشمیر کو ایسا کھا گئے کہ ڈکار تک نہیں لی۔
فضل الرحمان نے کہا کہ عدالتوں کو بتانا چاہتا ہوں ہمارا مطالبہ بلدیاتی نہیں جنرل انتخابات ہیں، جولوگ اب بھی حکومت کے دوست ہیں خود کو پشتون مت کہیں، 2018ء میں ان لوگوں نے ووٹ کو چوری کیا تھا، پشاور کو بھی بلاک کیا جائے تب بھی مولانا اکیلا انکے خلاف کھڑاہوگا، اسلام آباد کی جانب ایسے مارچ کرینگے، پھرآپ نے نہیں ہم راستے بند کرینگے۔
پی ڈی ایم سربراہ کا کہنا تھا کہ عمران خان کٹھ پتلی وزیراعظم ہے، یہ عوامی نہیں، جن لوگوں نے منتخب کیا وہ توبہ کر کے معافی مانگیں، ملک میں خود کشیوں کے واقعات بڑھ رہے ہیں، اس وقت جو کچھ ہو رہا ہے مغرب کے لیے کیا جا رہا ہے، ملک کوبیرونی اداروں کے حوالے کر کے گروی رکھ دیا، اداروں کو بتاناچاہتاہوں کہ اس کی پشت پنائی کو چھوڑ دیں۔
اس سے قبل سابق وزیراعظم شاہد خاقان عباسی کا کہنا تھا کہ جو حکمران عوام کی آواز نہیں بنیں گے وہ اقتدار میں نہیں ہو سکتے، الیکشن چوری کرنے کے لیے قانون میں تبدیلی کی گئی، پارلیمانی نظام کو بلڈوز کرتے ہوئے، 30 سے زائد قوانین کو منظور کیا گیا، پی ڈی ایم واحد عوام کے مسائل اور مہنگائی پر بات کرتی ہے، حکمران یہ نہیں بتاتے کہ چینی، پٹرول، آٹے کی قیمتوں میں کیوں اضافہ ہوا، 2018ء میں جو دھاندلی کی گئی اس کے نتائج اب سامنے آگئے۔

لاہور: وفاقی وزیر تعلیم شفقت محمود نے اسموگ کے باعث اسکول بند کرنے کے امکان کو مسترد کردیا۔

لاہور میں نیشنل کالج آف آرٹس کے دورے پر میڈیا سے گفتگو میں شفقت محمود نے کورونا کے باعث تعلیمی صورتحال سے متعلق سوال پر کہا کہ تمام امتحانات وقت پر ہوں گے۔

وزیر تعلیم کا کہنا تھا کہ اسموگ کے باعث ایسےحالات نہیں کہ اسکول بند کیے جائیں۔ْ

اس موقع پر شفقت محمود نے اپوزیشن کو نشانے پر لیتے ہوئے کہا کہ اپوزیشن بغیر وجہ روڑے اٹکا رہی تھی،الحمد اللہ تمام بل منظور کرلیے ہیں۔

اسلام آباد : وزیراعظم عمران خان کا کہنا ہے کہ ہم پاکستان میں چینی سرمایہ کاری کو فروغ دینے کیلئے کوشاں ہیں ، پاکستان میں صنعت لگانے پر سرمایہ کاروں کو سہولیات فراہم کریں گے۔

تفصیلات کے مطابق وزیراعظم عمران خان سے چینی کاروباری وفد کی ملاقات ہوئی ، ملاقات میں وزیر توانائی حماد اظہر، مشیر تجارت عبدالرزاق داؤد، شہباز گل اور خالد منصور بھی موجود تھے۔

وزیراعظم نے کہا دونوں ممالک میں عوامی رابطوں کو قدرکی نگاہ سے دیکھتے ہیں، ہم پاکستان میں چینی سرمایہ کاری کو فروغ دیں گے۔

عمران خان کا کہنا تھا کہ پاکستان اور چین آئندہ نسلوں تک ایک دوسرے سے جڑے رہیں گے ، ترجیحی بنیادوں پر پاکستان میں چینی کاروباری اداروں کی حمایت کریں گے

وزیراعظم نے کہا کہ پاکستان میں صنعت لگانے پر سرمایہ کاروں کو سہولیات فراہم کریں گے جبکہ سڑکوں اور یوٹیلیٹی سہولیات کی فراہمی سے متعلق مسائل کو حل کیا جائے گا

اس موقع پر چینی سرمایہ کاروں کا کہنا تھا کہ پاکستان میں گلاس، سرائمکس اور انفارمیشن ٹیکنالوجی کے شعبوں میں کام کرنے کے خواہشمند ہیں۔

نوجوت سنگھ سدھو کرتارپور آمد راہداری سے پاکستان آئے ہیں۔ نوجوت سنگھ سدھو کی پاکستان آمد کا مقصد بابا گرونانک کے جنم دن کی تقریبات میں شرکت کرنا ہے۔

بھارت سے آئے 3000سکھ یاتری بھی مذہبی رسومات کی ادائیگی میں مصروف ہیں۔ سکھ یاتریوں نے پاکستان کی جانب سے کئے گئےانتطامات پر بھرپور اطمینان کا اظہار کیا ہے۔سکھ یاتریوں کی سہولت کیلئے 30 نومبر تک 10 دن کی پیشگی اطلاع کی شرط میں نرمی کی گئی ہے۔ واضح رہے کہ بھارت نے انتہائی مختصر نوٹس پر کرتار پور راہداری کھولنے کا اعلان کیا تھا۔

وزیراعظم عمران خان نےسکھ برادری کے نام اپنے پیغام میں کہا ہے کہ ہزاروں سکھ ياتری پاکستان ميں مذہبی مقامات ديکھنےآتےہيں،حکومت پاکستان انہیں مذہبی رسومات کی ادائيگی ميں سہولیات فراہم کرتی رہے گی۔

اپوزیشن کا ارادہ ہے کہ حکومتی جماعت تحریک انصاف کی حکومت کو کمزور کر دیا جائے اور پھر ختم کر دیا جائے۔ اب یہ بات کوئی ڈھکی چھپی بات نہی رہی کہ تحریک انصاف کا حکومتی جماعت ہوتے ہوئے اگلے انتخابات میں ووٹروں کا سامنا کرنا باقی تمام جماعتوں کی نسبت سب سے مشکل کام ہوگا کیونکہ ووٹرز صرف اور صرف حکومتی جماعت سے ہی سوال کرتی ہے کہ آپ کی جماعت ہمارے مسائل حل کرنے میں ناکام کیوں رہی۔ آپ کی جماعت نے تو ہم سے بہت سے وعدے ایسے کئے تھے جس کو آپ کی جماعت پورا نہ کر سکی جبکہ اپوزیشن کی جماعتوں کو اس طرح کے سوالات کا سامنا نہیں کرنا پڑے گا کیونکہ وہ تو اپوزیشن میں تھیں۔ تو یہ بات بالکل عجیب سی لگتی ہے کہ اپوزیشن کی جماعتیں حکومتی جماعت تحریک انصاف کو اس مشکل سے نکال دیں گی کیونکہ انتخابات کے موقع پر تو ووٹرز صرف اور صرف اس جماعت سے زیادہ سوالات کرتی ہے جو حکومت میں رہی ہو۔ جس کی اپنی حکومت ہو۔ اپوزیشن میں جتنی بھی قابل ذکر جماعتیں ہیں ان سب کو اس بات کا بخوبی اندازہ ہے کہ اگلے انتخابات میں تحریک انصاف ہی سب سے زیادہ مشکل میں ہوگی اور تحریک انصاف کے لئے اگلے انتخابات میں ووٹ حاصل کرنا انتہائی مشکل مرحلہ ہوگا کیونکہ لوگ مہنگائی کی وجہ سے اور دیگر مسائل کی وجہ سے پسے ہوئے ہیں بلکہ آنے والے وقت میں مزید مہنگائی کا سامنا کرنا پڑ سکتا ہے۔ اس لیے اپوزیشن جماعتیں خاص طور پر پاکستان مسلم لیگ ن اور پی پی پی یہ بالکل نہیں چاہیں گی کہ تحریک انصاف کو سب سے مشکل مرحلے سے نکال دیا جائے۔ اپوزیشن کی جماعتوں کو بخوبی اس بات کا اندازہ ہوگا کہ ہمسایہ ملک انڈیا میں سترہ وزیراعظم میں سے سات وزراءاعظم اپنی جماعت کی حکومت کی آئینی مدت پوری نہیں کر سکے تھے۔ یہ سات وزیراعظم پارلیمینٹ یعنی کہ لوک سبھا کا اعتماد کھو بیٹھی تھیں اور انہیں استعفے پڑے۔ کسی نے کچھ مہینے حکومت کی اور کسی نے زیادہ سے زیادہ ڈیڑھ دو سال حکومت کی۔ استعفیٰ کے بعد ان سات وزراءاعظم نے درمیانی مدت کے انتخابات کا اعلان کیا تو یہ تمام کے تمام وزراءاعظم اپنی جماعتوں کو کامیاب کروانے میں بری طرح ناکام رہے۔ ان سات وزراءاعظم میں مرار جی ڈیسائی، چرن سنگھ، وی پی سنگھ، چندرا شیکھر، دیو گاودا اور اندر کمار گجرال شامل ہیں۔ حتیٰ کہ انڈیا کے کامیاب وزیراعظم اٹل بہاری باجپائی اپنی پہلی حکومت میں صرف کچھ ہی مہینے وزیراعظم رہ سکے تھے۔ اٹل بہاری باجپائی اپنی دوسری حکومت میں آئینی مدت تو پوری کر سکے لیکن انتخابات نہ جیت سکے تھے۔ یہ تمام کے تمام واقعات اس بات کی مکمل تائید کرتے ہیں کہ حکومتی جماعت کے لئے انتخابات بہت ہی مشکل مرحلہ ہوتے ہیں۔ ان جماعتوں کی نسبت جو اپوزیشن میں ہوتی ہیں۔ ملک کی صورتحال جس خوفناک موڑ پر ہے، وہاں تحریک انصاف کو حکومت سے دور کرنا تحریک انصاف کی ڈگمگاتی کشتی کو سہارا دینے والی بات ہوگی۔

لاہور(وقائع نگار)علامہ خادم حسین رضوی کے عرس کی تین روزہ تقریبات کا آغازہوگیا ہے،تحریک لبیک پاکستان کے امیر حافظ سعد حسین رضوی نے جمعہ کے اجتماع خطاب کرتے ہوئے کہا کہ اب باتوں سے زیادہ کام ہوگا، ہم صرف کام کریں گے اور حسب ضرورت جو باتیں ہوئیں وہ بھی کریں گے،کارکنوں نے میری اسیری کے دوران ظلم و زیادتی برداشت کی لیکن ثابت قدم رہے، کارکنان نے جان و مال، اولاد اور گھر کی قربانی دے کر ظلم برداشت کیا لیکن کمزور نہ پڑے، ساری قربانیاں آپ نے دیں میں تو قید میںتھا، آپ نے اپنی منزل نظر کی جانب رکھی اور ہماری منزل کیا ہے یہ بابا جی (خادم حسین رضوی ؒ)ہمیں اتنے طریقے سے بتاکر گئے ہیں کہ یہ سارے مل کر بھی آپ کو منزل سے نہیں ہٹاسکے۔ جمعہ کی نماز کے بعد سربراہ ٹی ایل پی حافظ سعد حسین رضوی اور مجلس شوریٰ کے اراکین نے مزار پر چادر پوشی کی،اس موقعہ پر مجلس شوریٰ کے رکن علامہ محمد شفیق امینی، پیر سید ظہیر الحسن شاہ، قاضی محمود اعوان، علامہ غلام عباس فیضی، مولانا فاروق الحسن قادری، علامہ غلام غوث بغدادی، پیر سید عنایت الحق شاہ بھی موجودتھے، خصوصی د±عا رکن شوریٰ و سرپرست اعلیٰ ٹی ایل پی قاضی محمود اعوان نے کی، کارکنان کی بڑی تعداد مرکز جامع مسجد رحمة اللعالمین کے اندر اور باہر موجود تھی۔علامہ سعد حسین رضوی کا استقبال کارکنوںنے لبیک یا رسول اللہ ﷺ کے نعروں اور پھولوں کی پتیاں نچھاور کرکے کیا، سربراہ تحریک کو کارکنوں کی بڑی تعداد نے گھیر لیا اور بغلگیر ہوئے سربراہ تحریک کارکنوں سے ملتے آبدیدہ ہوگئے۔ انہوں نے کہا کہ ملک بھر سے کارکنان کی عرس مبارک میں شرکت بابا جی سے انکی والہانہ محبت کا ثبوت ہے۔ سربراہ تحریک سعد حسین رضوی نے جمعة المبارک کے اجتماع سے خطاب کیانمازیوں کی بہت بڑی تعداد کے باعث ملتان روڈ اور اطراف کی گلیوں میں بھی نمازیوں کی کثیر تعداد موجود تھی۔