لاہور: (ڈیلی خبریں) ملک بھر میں ایک مرتبہ پھر فی تولہ سونے کی قیمت میں 300 روپے کی کمی ریکارڈ کی گئی ہے۔
تفصیلات کے مطابق بین الاقوامی مارکیٹ میں فی اونس سونے کی قیمت میں 11 ڈالر کا اضافہ دیکھا گیا اور نئی قیمت ایک ہزار 818 ڈالر فی اونس ہوگئی ہے۔
عالمی مارکیٹ میں قیمتیں بڑھنے کے بعد ملکی صرافہ مارکیٹوں لاہور، کراچی، اسلام آباد، پشاور،کوئٹہ، حیدر آباد، سکھر، گوجرانوالہ سمیت دیگر جگہوں پر فی تولہ سونے کی قیمت میں 300 روپے کمی ریکارڈ کی گئی اور نئی قیمت ایک لاکھ 25 ہزار 700 روپے ہوگئی۔
اُدھر 10گرام سونےکی قدر 258 روپےکم ہوکر ایک لاکھ 7 ہزار 767 روپے ہو گئی ہے

کراچی: (ڈیلی خبریں) اسٹیٹ بینک اور حکومت پاکستان نے کرپٹو کرنسی پر مکمل پابندی کی سفارش کردی ہے ۔
ڈیجیٹل کرپٹو کرنسی کیس میں بڑی پیش رفت سامنے آئی ہے اور اس حوالے سے سندھ ہائیکورٹ میں رپورٹ پیش کی گئی کہ کرپٹو کرنسی غیر قانونی ہے اور اس کرنسی میں کاروبار کی اجازت نہیں دی جاسکتی ۔
عدالت نے قانونی پہلوئوں کا جائزہ لینے کیلئے رپورٹ وزارت خزانہ اور وزارت قانون کو بھیجنے کی ہدایت کرتے ہوئے ریمارکس دیئے کہ دونوں وزارتیں 3 ماہ میں حتمی فیصلہ کریں اورپابندی لگانے کی صورت میں پابندی کی آئینی حیثیت سے بھی عدالت کو آگاہ کیا جائے ۔
جسٹس کے کے آغا نے ریمارکس دیئے کہ کرنسی میں کاروبار کی اجازت کی صورت میں لیگل فریم ورک تیار کیا جائے، کرپٹو کرنسی کا موجودہ اسٹیٹس قانون نافذ کرنے والے ادارے خود طے کریں اور متعلقہ ادارے قانون کے مطابق کارروائی کریں ۔

لاہور: (ڈیلی خبریں) کرتار پور راہداری سے جہاں بھارتی سکھوں کو اپنے مقدس مقام گوردوارہ دربار صاحب کرتار پور پر حاضری کی سہولت میسرآئی ہے وہیں برسوں سے بچھڑے دوستوں اوربھائیوں کے ملاپ کا ذریعہ بھی بن گئی ہے۔
متروکہ وقف املاک بورڈ کے ذرائع کے مطابق چند روز قبل 74 سال سے بچھڑے دو بھائیوں نے کرتارپورصاحب میں ایک دوسرے سے ملاقات کی ہے۔ فیصل آباد کے نواحی چک 255 بوگرا کے رہائشی 80 سالہ بزرگ محمدصدیق کی 74 برسوں بعد 1947 میں بچھڑنے والے بھائی سے ملاقات ہوگئی ہے۔
بزرگ محمد صدیق کے مطابق قیام پاکستان سے دو دن قبل ان کی والدہ ان کے چھوٹے بھائی حبیب، جن کی عمراس وقت چندماہ تھی، کو ساتھ لیکر بھارتی پنجاب میں اپنے والدین کو ملنے گئی اوراس دوران تقسیم کا اعلان ہوگیا۔ وہ کئی روزتک اپنی والدہ کی راہ تکتے رہے ہیں مگروہ لوٹ کرواپس نہ آسکیں، انہوں نے اپنی والدہ اورچھوٹے بھائی کوتلاش کرنے کی کافی کوشش کی مگرکامیابی نہ مل سکی اوراب 74 برسوں بعد انہیں ان کا چھوٹا بھائی حبیب مل گیا ہے۔
راہداری میں برسوں سے راہ تکتے بھائیوں کی نظر جب ایک دوسرے پر پڑی تو دل پر قابو نہ رکھ سکے اور بے اختیاران کے آنسو چھلک پڑے۔ دونوں بھائی گلے لگ کر روئے اور جذبات کو ہلکا کیا۔
محمدصدیق کا کہناتھا انساں زندہ ہو تو مل ہی جاتا ہے۔ حبیب نے کہا یہ راہداری ان کے لئے ملاپ کی راہداری ثابت ہوئی ہے دونوں بھائیوں کے ایک دوسرے سے ملنے کی جذباتی ویڈیوسوشل میڈیاپر شیئرکی گئی ہے۔
دونوں بھائیوں کی ملاقات کا انتظام پنجابی پرچارنامی این جی اونے کیاتھا جواس سے قبل 1947 میں بچھڑے کئی خاندانوں اوردوستوں کوملانے کا ذریعہ بن چکی ہے۔ پنجابی پرچار کے کے نمائندوں نے بتایا کہ محمدصدیق کے بھائی کی تلاش میں سوشل میڈیا سمیت مشرقی پنجاب میں موجود دوستوں نے کافی مدد کی ہے۔ پنجابی پرچارنے کچھ عرصہ قبل محمدصدیق کی ویڈیوزشیئرکی تھیں جس کے بعد بھارتی پنجاب میں ان کے بھائی کوجاننے والے ان سے رابطہ کیااوربالاخردونوں بھائیوں کی کرتارپور راہداری کے ذریعے ملاقات کروائی گئی ہے۔
اس سے قبل نارووال سے تعلق رکھنے والے محمدبشیربھی 1947 میں بچھڑنے والے اپنے جگری دوست سردارگوپال سنگھ سے ملاقات کرچکے ہیں۔ دونوں دوستوں کا چندبرس قبل سوشل میڈیا کے ذریعے ہی رابطہ ہواتھا مگرملاقات نہیں ہوسکی تھی۔ تاہم کرتارپور راہداری کھلنے کے بعد دونوں دوستوں نے گوردوارہ دربارصاحب میں ملنے کا فیصلہ کیا اوربالاخر74 برسوں بعد دونوں نے ایک دوسرے کوگلے لگایا،اس وقت سردارگوپال سنگھ کی عمر94 جبکہ محمدبشیرکی عمر91 سال ہے۔گوپال سنگھ کےمطابق بچپن میں دونوں دوست یہاں اس گوردوارہ صاحب میں آتے اورگھنٹوں اکٹھے کھیلتے تھے۔
نومبر2021 میں ایک خاندان کے دوافرادکی ملاقات ہوئی تھی۔ 1947 میں بچھڑنے والے پھوپھا اوربھتیجا کرتارپورراہداری کے راستے ملے تھے۔ پھوپھا ہمایوں فیصل آباد اور بھتیجا محمد بشیر بھارتی گاؤں تارن سے آیاتھا، بچھڑے ہوئوں نے کرتارپور راہداری سے ملاپ پر حکومت کا شکریہ ادا کیا۔

پشاور: (ڈیلی خبریں) عدالت نے قومی احتساب بیورو (نیب) کو مالم جبہ، بلین ٹری سونامی اور بینک آف خیبر سے متعلق انکوائری رپورٹ جمع کرنے کا حکم دے دیا۔
پشاور ہائیکورٹ میں مالم جبہ، بلین ٹری سونامی اور بینک آف خیبر سے متعلق انکوائری کے حوالے سے کیس کی سماعت ہوئی۔
دوران سماعت مذکورہ معاملے کے درخواست گزار کے وکیل علی گوہر درانی نے کہا کہ عدالت نے نیب کو رپورٹ جمع کرنے کا حکم دیا تھا لیکن ابھی تک رپورٹ جمع نہیں کرائی گئی۔
جس پر نیب پراسیکیوٹر عظیم داد نے کہا کہ دو رپورٹس ہے، بلین ٹری سونامی رپورٹ تقریبا تیار ہے وہ جلد جمع کرادی جائیں گی۔
اس پر جسٹس روح الامین نے ریمارکس دیے کہ عدالت نے دو نہیں 3 رپورٹ جمع کرنے کا حکم دیا تھا، عدالت نے حکم دیا تھا کہ یہ 2 ڈپارٹمنٹس کے درمیان مسلہ ہے مل بیٹھ کر اس کو حل کریں۔
جسٹس روح الامین نے مزید ریمارکس دیے کہ عدالت نے انکوائری بند کرنے کا نہیں کہا، مسلہ حل کرنے کی بجائے نیب نے انکوائری ہی بند کردی۔
عدالت کی جانب سے برہمی کا اظہار کیا گیا کہ کس طرح نیب حکام نے عدالتی حکم کو بنیاد بنا کر مالم جبہ کیس کی انکوائری بند کردی، عالت نے انکوائری جاری رکھنے کی ہدایت کی تھی۔
نیب پراسیکیوٹر نے کہا کہ بلین سونامی ٹریز کے خلاف بھی 10 انکوائریز چل رہی ہیں جبکہ ایک ریفرنس دائر کردیا ہے۔
بعدازاں عدالت نے نیب کو مالم جبہ، بلین ٹری سونامی اور بینک آف خیبر کی انکوائری رپورٹ 26 جنوری تک جمع کرنے کا حکم دیتے ہوئے سماعت بھی 26 جنوری تک ملتوی کردی۔

لاہور: (ڈیلی خبریں) پاکستان مسلم لیگ (ن) کے رہنما اور رکن پنجاب اسمبلی بلال یاسین پر فائرنگ کیس میں انتہائی اہم پیش رفت سامنے آئی اور سی آئی اے پولیس نے فائرنگ کرنے والے دونوں ملزمان کو گرفتار کرلیا ہے ۔
ترجمان پنجاب پولیس کے مطابق وزیر اعلیٰ پنجاب سردار عثمان بزدار اور آئی جی راؤ سردار علی خان خود اس کیس کی نگرانی کر رہے تھے ، سی سی پی او لاہور اور ڈی آئی جی انویسٹی گیشن نے 16 ٹیمیں ملزمان کو ٹریس کرنے اور گرفتار کرنے کیلئے تشکیل دیں تھیں ۔
ترجمان کا مزید کہنا تھا کہ رات گئے سی آئی اے پولیس نے خفیہ اطلاع پر کارروائی کرتے ہوئے 10 مختلف مقامات پر چھاپے مارے ، ملزمان کو شاہدرہ کے علاقے سے خفیہ آپریشن کے بعد گرفتار کیا گیا جبکہ کل صبح ملزمان کو شناخت پریڈ کیلئے عدالت میں پیش کیا جائے گا ۔
پنجاب پولیس کے ترجمان نے کہا کہ اس سے قبل پولیس نے لیگی ایم پی اے پر فائرنگ کے کیس میں متعدد لوگوں کو شامل تفتیش کیا تھا ، واقعہ کے مرکزی دونوں سہولت کار ساجد اور فخر عالم اسلحہ ڈیلر کو بھی پولیس نے گرفتار کر لیا ہے ، آئی جی پنجاب کی ہدایت پر اس کیس میں ملوث دیگر افراد سے پوچھ گچھ کا سلسلہ جاری ہے ۔
خیال رہے کہ بلال یاسین پر موہنی روڈ لاہور پر دو موٹر سائیکل سوار شوٹرز نے 30 دسمبر کی رات کو فائرنگ کی تھی ۔

اسلام آباد: (ڈیلی خبریں) وزیراعظم عمران خان نے ہدایت دی ہے کہ منافع خوروں اور ذخیرہ اندوزوں کے ساتھ کوئی نرمی نہ کی جائے۔
وزیر اعظم عمران خان کی زیرصدارت ملک میں کھاد کی طلب اور رسد کا جائزہ اجلاس ہوا، جس میں بریفنگ دی گئی کہ گزشتہ ہفتےاوسطاً 19,000 میٹرک ٹن فی دن کھاد کی فراہمی کو یقینی بنایا گیا، انسداد اسمگلنگ میں پنجاب، خیبرپختونخوا اور بلوچستان کی صوبائی حکومتوں نے یوریا کے 92,845 تھیلے ضبط کیے ہیں۔
وزیراعظم عمران خان کا کہنا تھا کہ منافع خوروں اور ذخیرہ اندوزوں کے ساتھ کوئی نرمی نہ کی جائے، ملک میں اشیائے ضروریہ کی کوئی کمی نہیں ہے، کھاد کی ذخیرہ اندوزی ربیع سیزن کے لیے فصل کی پیداوار کو بری طرح متاثر کر سکتی ہے، کھاد کی کسانوں کو مناسب فراہمی کے لیے انتظامی اقدامات کو یقینی بنایا جائے۔
وزیراعظم نے کہا کہ تحریک انصاف کی حکومت نے ملکی تاریخ میں پہلی بار کسان دوست پالیسیاں متعارف کرائی ہیں، کسان پاکستان کی معیشت میں ریڑھ کی ہڈی کی حیثیت رکھتے ہیں، یوریا کی قلت سے متعلق افواہوں کو دور کرنے کے لیے موثر عوامی آگاہی مہم چلائی جائے۔