اسلام آباد: (ویب ڈیسک) وفاقی وزیر سائنس اینڈ ٹیکنالوجی شبلی فراز نے کہا کہ حکومت نے بلاک چین ٹیکنالوجی اور کرپٹو کرنسی کو ریگولرائز کرنے کا منصوبہ شروع کر دیا۔ وفاقی وزیر سائنس اینڈ ٹیکنالوجی شبلی فراز کا کہنا ہے کہ حکومت کرپٹو کرنسی کو ریگولرائز کرنا چاہتی ہے، اسٹیٹ بینک، ایس ای سی پی اور خزانہ ڈویژن اس پر کام کر رہے ہیں، شفافیت اور احتساب کیلیے بلاک چین ٹیکنالوجی پر کام کر رہی ہے، وزارت سائنس کی ماتحت یونیورسٹیوں میں بلاک چین ٹیکنالوجی پائلٹ منصوبہ شروع کیا جائے گا۔ بلاک چین سمٹ سے خطاب کرتے ہوئے کہا کہ وزارت نے ٹیکنالوجی کے استعمال کی طرف جانے کے لیے اہم اقدام اٹھائے ہیں۔ ای وی ایم بنائی اور سائنس انوویشن پالیسی بنائی۔ بلاک چین 2024 تک 20 ارب کی مارکیٹ بن جائے گی۔ انھوں نے کہا کہ 200 کے قریب ممالک کسی نہ کسی طرح اپنے سسٹم میں بلاک چین کو شامل کر چکے ہیں، بینک بلاک چین کو استعمال کر کے 8 سے 10 ارب سالانہ بچا سکتے ہیں، اس ٹیکنالوجی کے استعمال سے ووٹنگ شفاف ہو سکتی ہے۔

کراچی: (ویب ڈیسک) ویکسی نیشن کا عمل متاثر ہونے کے باعث ویکسی نیشن سینٹر کے انچارج ڈاکٹر راج کمار خود انٹری کیلیے بیٹھ گئے جس پر احتجاجی ورکرز نے سسٹم کا پاس ورڈ دینے سے انکار کردیا جس کے بعد ڈاکٹر راج کمار نے ویکسی نیشن کے لیے آنے والے عوام کی مینوئل انٹری کی۔ اس موقع پر احتجاجی ویکسی نیٹرز اور ڈیٹا انٹری آپریٹرز کا کہنا تھا کہ جب تک 9 ماہ کی تنخواہ نہیں ملتی کام نہیں کریں گے، ہم نے چھٹی بار ہڑتال کی ہے ہر بار انتظامیہ کے کہنے پر کام شروع کیا تاہم اس حوالے سے ڈی جی صحت کراچی ڈاکٹر اکرم سلطان کا کہنا تھا کہ تنخواہ دینا میرا اختیار نہیں ہے میں کوششوں میں مصروف ہوں ملازمین کے ساتھ ناانصافی ہورہی ہے، آئندہ ہفتے انھیں تنخواہیں فراہم کردی جائے گی۔ واضح رہے کہ کراچی ایکسپو سینٹر میں قائم میگا ویکسی نیشن سینٹر میں تعینات 200 سے زائد ویکسی نیٹرز اور ڈیٹا انٹری آپریٹرز گزشتہ 9 ماہ سے تنخواہوں نہ ملنے کے باعث احتجاج پر ہیں۔

کراچی: (ویب ڈیسک) سندھ میں نجی تعلیمی اداروں پر حکومتی کنٹرول کمزور ہونے کے سبب پرائیویٹ اسکولوں اور جامعات نے سرکاری منظوری کے بغیر اپنے کیمپسز از خود بند کرنا شروع کردیے ہیں۔ کراچی کی نجی شعبے کی معروف جامعہ حبیب یونیورسٹی نے طلبہ کے لیے اپنا کیمپس بند کرتے ہوئے انھیں پیر سے آن لائن کلاسز کی ہدایت کردی ہے، ادھر شہر کے معروف اور قدیم مانا پارسی اسکول، بے ویو اکیڈمی اور نیکسر کالج بھی بند کردیا گیا ہے بند ہونے والے اسکولوں میں ڈیفنس ، کلفٹن اور پی ای سی ایچ ایس کے کچھ مزید اسکول بھی شامل ہیں۔ ان اسکولوں میں فزیکل کلاسز کی بندش کے سبب والدین اور طلبہ میں بے چینی پھیلی گئی ہے کیونکہ والدین کا کہنا ہے کہ رواں تعلیمی سیشن 2021/22 میں بمشکل تاہم بغیر کسی رکاوٹ کے فزیکل بنیادوں پر تدریسی سلسلہ شروع ہوا تھا جو ایک بار پھر رکنا شروع ہوگیا ہے۔ اچانک اسکولوں سے سرکلر بھیج دیا گیا ہے کہ ہم آن لائن جا رہے ہیں اور کم از کم جنوری کے لیے فزیکل کلاسز بند کی جا رہی ہیں جبکہ آن لائن کلاسز کے حوالے سے ہماری کوئی تیاری نہیں، ایک نجی اسکول میں پڑھنے والے کم عمر طالب علم کی والدہ کا کہنا تھا وہ خود ایک اسکول میں ٹیچر ہیں ان کا اسکول کھلا ہوا ہے لیکن میرے بیٹے کا اسکول آن لائن ہوگیا ہے۔ اب گھر میں صبح کے وقت بچے کے ساتھ آن لائن کلاسز کے وقت کوئی موجود نہیں ہو سکتا۔ حبیب یونیورسٹی کے ایک طالب علم نے بتایا کہ ہماری آخری فزیکل کلاس جمعرات 13 جنوری کو ہوئی تھی اسی دوران ای میل ملی کہ اب پیر 17 جنوری سے کلاسز آن لائن ہوں گی، طالب علم کا کہنا تھا کہ پہلے ہی کم از کم 3 سیمسٹر آن لائن پڑھ چکے ہیں اب ایک بار پھر آن لائن سیمسٹر شروع کردیا گیا ہے۔ یونیورسٹیز کی مانیٹرنگ باڈی چارٹر انسپکشن اینڈ ایویلیو ایشن کمیٹی کے سربراہ ڈاکٹر طارق رفیع سے رابطہ کیا تو ان کا کہنا تھا کہ تعلیمی اداروں کی بندش سے متعلق فی الحال کوئی حکومتی پالیسی نہیں آئی ہے لہذا اس معاملے پر ہم نجی یونیورسٹی سے ضرور پوچھیں گے۔ علاوہ ازیں ماما پارسی اسکول کی انتظامیہ کی جانب سے جاری سرکلر میں کہا گیا ہے کہ اومیکرون ویرینٹ کے سبب مانا پارسی اسکول 19 جنوری سے 28 جنوری تک واپس آن لائن کلاسز پر جا رہا ہے، مزید براں جنوری کے آخری ہفتے میں طے کیا جائے گا کہ اسکول آن لائن کلاسز جاری رکھیں جائیں یا نہیں۔