وزیر اعظم عمران خان نے کہا کہ سکردو ائیرپورٹ کو انٹرنیشنل ائیرپورٹ کا درجہ دے دیا گیا ہے ، اب یہاں سیاحت کیلئے دروازے کھل جائیں گے ۔
وزیر اعظم عمران خان دورے پر سکردو پہنچے ، عوام سے خطاب میں انہوں نے کہا کہ سیاحت گلگت بلتستان کا اثاثہ بن سکتا ہے،سوئٹرزلینڈ گلگت بلتستان سے آدھا ہے،سوئٹرزرلینڈ سیاحت سے سالانہ 70ارب ڈالر کماتا ہے،جب وہ اتنا کما سکتے ہیں تو ہم کیوں نہیں ، میں نے دنیا کے خوب صورت ترین علاقے دیکھے ہوئے ہیں،گلگت بلتستان دنیا کا خوبصورت ترین علاقہ ہے، سکردو ایئرپورٹ کو انٹرنیشنل ایئرپورٹ کا درجہ دیا گیا، بیرون ملک مقیم پاکستانی گلگت بلتستان آئیں گے جس سے سیاحت کو فروغ ملے گا۔
وزیر اعظم نے کہا کہ گلگت بلتستان میں غربت زیادہ ہے، میری کوشش ہے کہ پسماندہ علاقوں میں کام کریں،جب تک غریب کو اوپر لے کر نہیں آتا ملک ترقی نہیں کر سکتا،پاکستان میں امیر امیر سے امیرتر اور غریب غریب سے غریب تر ہو گیا،اللہ نے اس ملک کو بے پناہ نعمتیں بخشی ہیں مگر ہم نے اللہ کی دی ہوئی کسی نعمت کا فائدہ نہیں اٹھایا۔
ان کا مزید کہنا تھا کہ آٹا ،گھی اور دالوں پر سبسڈی کے لیے احساس راشن کارڈ متعارف کرایا ہے ، ہم پورے گلگت بلتستان میں ہر خاندان کوہیلتھ انشورنس دیں گے،ہر گھرانے کے پاس10لاکھ روپے کی ہیلتھ انشورنس ہوگی،دنیا کے امیر ترین ملکوں میں بھی یونیورسل ہیلتھ انشورنس نہیں ہوتی۔
وزیر اعظم نےکہا کہ دہشت گردی کیخلاف جنگ میں سب سے زیادہ تباہی خیبرپختونخوا میں ہوئی،یو این ڈی پی کی رپورٹ کے مطابق خیبرپختونخوا میں زیادہ تیزی سے غربت کم ہوئی،گلگت بلتستان کو آزاد کشمیر سے منسلک کررہے ہیں ، منصوبے پر این ایچ اے اور ایف ڈبلیو او کو خراج تحسین پیش کرتا ہوں،یہ بھی وقت آئے گا کہ لوگ یہاں روزگار ڈھونڈنے آئے گا۔

پاکستان سٹاک مارکیٹ میں اُتار چڑھاؤ کے بعد 635.66 پوائنٹس کی شدید مندی ریکارڈ کی گئی اور 100 انڈیکس 43731.20 پوائنٹس کی سطح پر پہنچ کر بند ہوا، پورے کاروباری روز کے دوران 1.43 فیصد کی تنزلی دیکھی گئی ہے۔ شدید مندی کے باعث سرمایہ کاروں کے اربوں روپے ڈوب گئے۔

کرائسٹ چر چ مسجد حملے میں شہید نعیم راشد کو نیوزی لینڈ کے بہادری کے سب سے بڑے اعزاز سے نواز دیا گیا۔
نیوزی لینڈ کا بہادری کا سب سے بڑا کراس ایوارڈ پاکستانی نژاد شہید نعیم راشد کو فائرنگ کے دوران انتہائی خطرناک صورتحال میں عظیم اور بہادرانہ اقدام پر دیا گیا۔ شہید نعیم راشد نے کندھے میں گولی لگنے کے باوجود سفید فام دہشت گرد ٹیرنٹ کو جزوی طور پر گرا کر غیر مسلح کرنے کی کوشش کی تھی۔ ان کے صاحبزادے طلحہ بھی جان سے گئے تھے، حملے سے بچانے کی کوشش کرنےوالے 10افراد کو بہادری ایوارڈ دیا گیا ہے۔
وزیراعظم جیسنڈا آرڈرن نے کہا کہ حملے کو روکا نہ جاتا تومزید اموات ہوسکتی تھیں، 2019 کے دہشت گردانہ حملے میں سفید فاموں کی بالادستی کے مسلح حامی ٹیرنٹ نے کرائسٹ چرچ شہرکی مسجد النورمیں اندھا دھند فائرنگ کر کے 51 نمازیوں کو شہید کردیا تھا۔

خانیوال پی پی 206 میں ضمنی الیکشن کے لئے پولنگ کا عمل جاری ہے۔ ن لیگ اور پی ٹی آئی کے امیدوار کے درمیان کانٹے کا مقابلہ متوقع ہے۔
ضمنی الیکشن کے لئے حلقے میں 183 پولنگ اسٹیشن بنائے گئے ہیں۔ 2 لاکھ 30 ہزار 698 ووٹرز اپنا حق رائے دہی استعمال کریں گے۔ ہر پولنگ اسٹیشن پر پولیس کے ساتھ رینجرز اہلکار سیکورٹی کے فرائض سر انجام دے رہے ہیں۔ الیکشن کمیشن کا کہنا ہے کہ امن و امان کے پیش نظر تمام پولنگ اسٹیشن پر پولیس کے ساتھ رینجرز اہلکاروں کو تعینات کیا گیا ہے۔