لاہور (خصوصی رپورٹ) شہر میں بجلی چوری کی روک تھام اور اووربلنگ کی شکایات کے ازالہ کیلئے لیسکو کے میگا پراجیکٹ ”ایڈوانسڈ میٹرنگ انفراسٹرکچر“ کی منظوری دے دی گئی۔ لاہور الیکٹرک سپلائی کمپنی نے اووربلنگ اور بجلی چوری روکنے کا میگا پراجیکٹ تیار کیا تھا جس کی پلاننگ کمیشن نے منظوری دے دی۔ منصوبے کے تحت شہر میں کمپنی کے ناردرن‘ سنٹرل اور ساﺅتھ سرکل کے 17لاکھ صارفین کے میٹرز لگائے جائیں گے۔ لیسکو چیف واجد علی کاظمی کے مطابق ”ایڈوانسڈ میٹرنگ انفراسٹرکچر“ پر 23ارب روپے لاگت آئے گی۔ لیسکو 20فیصد جبکہ ایشیائی ترقیاتی بینک 80فیصد اخراجات برداشت کرے گا۔ منصوبے کے تحت کنٹرول روم کا قیام عمل میں لایا جائے گا جس کی مدد سے صارفین کے میٹرز کی مانیٹرنگ کی جائے گی۔ بلوں کی عدم ادائیگی پر کنٹرول روم سے کنکشن منقطع کیا جا سکے گا اور صارفین گھر بیٹھے لوڈ مینجمنٹ بھی کر سکیں گے۔

اسلام آباد (خصوصی رپورٹ)بجلی کی تلاش میں ”بجلی“ ہی چلی گئی، چینی کمپنی کے ساتھ توانائی معاہد پر دستخط کے دوران بجلی غائب، چینی مہمانوں کے ساتھ معاہدے پر دستخط کی تقریب میں دو بار بجلی بند ہوئی، وزیرپانی و بجلی خواجہ آصف اور چینی وزیر پریشان ہوگئے اور موبائل کی روشنی میں معاہدے پر دستخط کا عمل مکمل کیا گیا۔ پاکستان اور چین کی کمپنی چائنہ پاور کے درمیان حب میں 1320 میگاواٹ اورت تھر میں مقامی کوئلے سے 330 میگاواٹ بجلی منصوبے لگانے کے معاہدوں پر دستخط ہوگئے، حب میں 1320 میگاواٹ کا منصوبہ جون 2019ءاور تھر کے مقامی کوئلے سے 330 میگاواٹ بجلی پیدا کرنے کا منصوبہ دسمبر 2019ءمیں مکمل ہوگا ۔ حب میں 1320 میگاواٹ منصوبے پر 2ارب ڈالر جبکہ تھرکے مقامی کوئلے سے 330میگاواٹ بجلی کے منصوبے پر 300ملین ڈالر لاگت آئے گی۔معاہدے کی تقریب سے خطاب کرتے ہوئے وفاقی وزیر پانی وبجلی خواجہ آصف کاکہنا تھا سی پیک انرجی فریم ورک کا ایک اور سنگ میل عبور کرلیا۔ مقامی کوئلے سے سستی بجلی پیدا کرنے پر توجہ دے رہے ہیں جس سے زرمبادلہ کی بھی بچت ہوگی ، تھر کو ملک کا انرجی حب بنائیں گے ، نندی پور پاور پلانٹ کو گیس پر منتقلی کا کام اپریل تک مکمل ہوجائیگا، گیس ملنے سے نندی پور پاورپلانٹ سے 525 میگاواٹ بجلی حاصل ہوگی ، بھاشا اور منڈا ڈیم منصوبوں کا افتتاح رواں سال ہوگا، واٹر پالیسی جلد متعارف کروائیں گے۔میڈیا نے بار بار بجلی غائب ہونے پر سوال اٹھایا تو خواجہ آصف نے بات رفع دفع کرنے کیلئے نندی پور بجلی گھر آپریشنل ہونے کی نوید سنادی۔