اسلام آباد(ویب ڈیسک)عوامی مسلم لیگ کے سربراہ شیخ رشید احمد نے کہاہے کہ راناثنااللہ اور عابد شیر علی حکومت کی بہتری کا سبب نہیں بن رہے، وزیراعظم نوازشریف بھی کہتے ہیں کہ شیخ رشید پلان ماسٹر ہے دیکھیں گے کیسے اسمبلی میں آئے گا، پی ایس ایل کے فائنل میں جو بھی ٹیم فاتح ہو جیت پاکستان کی ہی ہوگی۔ ٹورنامنٹ کے آغاز سے ہی پشاور زلمی ان کی فیورٹ ٹیم ہے اس لئے فائنل میں بھی اسی کو سپورٹ کریں گے۔ ہفتہ کو نجی ٹی وی سے خصوصی گفتگو کرتے ہوئے شیخ رشید نے کہا کہ حکومت کو ان کا میچ دیکھنا بھی برداشت نہیں۔ اسی لئے جہاز اور ٹرین کے ٹکٹ بک کرا رکھے ہیں جبکہ گاڑی کا آپشن بھی موجود ہے مگر ریل کار کے ذریعے ہی لاہور جائیں گے۔ انھوں نے کہا کہ راناثنااللہ اور عابد شیر علی حکومت کی بہتری کا سبب نہیں بن رہے۔ نوازشریف بھی کہتے ہیں کہ شیخ رشید پلان ماسٹر ہے دیکھیں گے کیسے اسمبلی میں آئے گا۔ مگر انھیں پتہ ہونا چاہئے کہ سب فیصلے آسمانوں پر ہوتے ہیں اور ابھی تو پناما کا فیصلہ بھی آنے والا ہے۔
