اسلام آباد ( ویب ڈیسک ) سینیٹ میں قائد حزب اختلاف علامہ راجا ناصر عباس نے کہا ہے کہگر پاکستان پیپلز پارٹی سنجیدہ ہے تو خیبرپختونخوا میں غیرآئینی طور پر گرائی گئی حکومت بحال کرے اور اپنے گورنر سے استعفیٰ لے۔اسلام آباد ہائی کورٹ کے باہر میڈیا سے گفتگو کرتے ہوئے انہوں نے کہا کہ پاکستان پیپلز پارٹی باتیں نہیں عمل سے کچھ ثابت کرے اور پہلا قدم گورنر کو ہٹا کر اٹھا لے۔انہوں نے کہا کہ اگر پیپلز پارٹی سنجیدہ ہے تو خیبر پختونخوا میں غیر آئینی طور پر گرائی گئی حکومت بحال ہونی چاہیے اور اپنے گورنر سے استعفیٰ لے اور ایک قدم پیچھے ہٹائے تو ہم سمجھیں گے کہ وہ سنجیدہ ہے۔ان کا کہنا تھا کہ اس وقت ملک آئین کی بالادستی کے بغیر آگے نہیں بڑھ سکتا، بلاول بھٹو زرداری کی باتیں ایک طرف لیکن عملی اقدامات نظر آنے چاہئیں، جب پیپلز پارٹی کے عملی اقدامات نظر آئے تو ہی اعتماد کیا جا سکتا ہے۔دریں اثناء قائد حزب اختلاف سینیٹ علامہ راجہ ناصر عباس اور مصطفی نواز کھوکھر نے اپوزیشن لیڈر محمود خان اچکزئی سے ان کی رہائش گاہ پر ملاقات کی۔ترجمان تحریک تحفظ آئین پاکستان کے مطابق ملاقات میں بانی پی ٹی آئی کے خلاف زیر سماعت مقدمات، ان کے ساتھ روا رکھے جانے والے سلوک اور مبینہ منظم عدالتی ناانصافی پر تفصیلی تبادلہ خیال کیا گیا۔ملاقات میں پیپلز پارٹی کی جانب سے سامنے آنے والے بیانات اور ملک کی مجموعی سیاسی و آئینی صورتحال پر بھی گفتگو ہوئی۔قبل ازیں چیئرمین پی ٹی آئی بیرسٹر گوہر علی خان نے کہا ہے کہ عمران خان اور ان کی اہلیہ ناحق جیل میں ہیں، چیف جسٹس انصاف کے تقاضے پورے کریں، پوری دنیا عدالتوں کو دیکھ رہی ہے۔اسلام آباد ہائی کورٹ کے باہر میڈیا سے گفتگو کرتے ہوئے بیرسٹر گوہر نے کہا کہ موجودہ سیاسی تقسیم کے ماحول میں چیف جسٹس صاحبان پر بڑی ذمہ داری عائد ہوتی ہے، عدلیہ ایسا انصاف کرے کہ ہوتا ہوا بھی نظر آئے۔انہوں نے کہا کہ پاکستان تحریک انصاف ملک کی سب سے بڑی سٹیک ہولڈر ہے،پی ٹی آئی کے بغیر ملک میں کوئی سیاسی پیش رفت ممکن نہیں، بلاول بھٹو کی پریس کانفرنس کے مقاصد کا علم نہیں، خوشی ہے کہ بالآخر سب نے پی ٹی آئی کی سیاسی حیثیت تسلیم کر لی، پی ٹی آئی پاور شیئرنگ کے لیے نہیں بلکہ اصولوں کی جنگ لڑ رہی ہے، ملک اور قوم کے مفاد میں جو فیصلہ کریں گے، پارٹی مشاورت سے کریں گے۔بیرسٹر گوہر نے کہا کہ فیصلے بانی پی ٹی آئی کی ہدایات اور مشاورت سے ہوں گے،پی ٹی آئی کے سیاسی کارڈز ابھی ہمارے سینے میں ہیں،صوبوں کے قیام اور وسائل کی تقسیم پر غیر ذمہ دارانہ بیانات نہیں دینے چاہئیں،صوبوں کا قیام اور وسائل کی منصفانہ تقسیم عوامی مسائل کے حل میں اہم ہیں،ہم سسٹم کے بینیفشری بننے نہیں بلکہ اصولوں کی جنگ لڑنے آئے ہیں۔ان کا کہنا تھا کہ بانی پی ٹی آئی کی اہلیہ اور بہن بھی ناحق قید ہیں، بانی پی ٹی آئی کی بہن نے پاکستان کی تاریخ میں طویل قید کا سامنا کیا، بانی پی ٹی آئی کی بہنوں کے ساتھ ہونے والی زیادتیوں کی مذمت کرتے ہیں، عمران خان نے ججز کو خط لکھ کر اپنی آئینی اور قانونی حقوق کی یاد دہانی کرائی، بانی پی ٹی آئی نے عدالتوں سے ریلیف یا رعایت نہیں اپنا قانونی حق مانگا ہے، یہ ملک ہمارا ہے، اسی ملک میں جئیں گے اور سر اٹھا کر جئیں گے۔چیئرمین کا کہنا تھا کہ عدالتی فیصلوں کو پورا پاکستان اور دنیا دیکھ رہی ہے، ججز سے درخواست ہے کہ انصاف کے ترازو کے دونوں پلڑے برابر رکھیں، انصاف کا ترازو برابر ہوا تو ہمارا کپتان کل بھی بے گناہ تھا اور آج بھی بے گناہ ہے، ہمیں امید ہے کہ عوام انصاف کی جدوجہد میں ہمارے ساتھ کھڑے ہوں گے، پی ٹی آئی کے بغیر کوئی سیاسی بات آگے نہیں بڑھ سکتی، چیف جسٹس انصاف کے تقاضے پورے کریں، پوری دنیا عدالتوں کو دیکھ رہی ہے۔
علامہ ناصر عباس
