اسلام آباد (آن لائن) وزیر دفاع خواجہ آصف نے کہا ہے کہ وزارت دفاع نے لیفٹیننٹ جنرل اکرام الحق سمیت 5سینئر جنرلز کے ناموں کی سمری وزیراعظم کو ارسال کردی ہیں۔ ترکمانستان سے وطن واپسی کے بعد وزیراعظم چیئرمین جوائنٹ چیف آف سٹاف اور آرمی چیف کے ناموں کا اعلان کرینگے۔ جمعہ کے روز خواجہ آصف نے میڈیا سے گفتگو کرتے ہوئے کہا کہ 4سینئر جنرلز کے ناموں کے ساتھ کور کمانڈر گوجرانوالہ لیفٹیننٹ جنرل اکرام الحق نام سمیت 5سینئر جنرلز کے ناموں کی سمری وزیراعظم کو ارسال کردی گئی ہے۔ پانچوں لیفٹیننٹ جنرلز کے نام سنیارٹی کی بنیاد پر آگے بھیجے گئے ہیں، ان میں لیفٹیننٹ جنرل زبیر حیات، لیفٹیننٹ جنرل جاوید اقبال رمدے، لیفٹیننٹ جنرل قمر جاوید باجوہ، لیفٹیننٹ جنرل اشفاق ندیم اور لیفٹیننٹ جنرل اکرام الحق کا نام بھی زیر غور ہے۔ لیفٹیننٹ جنرل اکرام الحق کا نام سنیارٹی لسٹ میں پانچویں نمبر پر ہے۔ وزیر دفاع خواجہ آصف کا کہنا تھا کہ نئے آرمی چیف اور جوائنٹ چیفس آف اسٹاف کمیٹی کے ناموں کا فیصلہ وزیراعظم نواز شریف بیرون ملک سے واپس آ کر کریں گے۔
