لاہور (فورم رپورٹر) ”وجد کی رات“ سے خطاب کرتے ہوئے چیف ایگزیکٹو ”خبریں“ گروپ ضیاشاہد نے کہا ہے کہ عشق مصطفی کا پیغام عام کرتے رہیں گے۔ خواہش ہے کہ ہمارا میڈیا گروپ ایسی پاکیزہ محافل کا تسلسل ہمیشہ قائم رکھے۔ ایوان اقبال میں منعقدہ تیسری عظیم ا لشان ”وجد کی رات“ سے بطور میزبان خصوصی خطاب کے دوران انہوں نے مہمانان گرامی، شرکاءسے تقریب اور معاون اداروں کا شکریہ ادا کرتے ہوئے کہا کہ ”خبریں“ گروپ ”وجد کی رات“ کا انعقاد ہر سال کرتا رہے گا۔ ایسی پرنور محافل میں شرکت کی خواہش ہر دم دل میں مچلتی رہتی ہے کیونکہ اللہ تبارک تعالیٰ اور اس کے پیارے حبیب کے ذکر سے سجی محفلوں میں روحانی تسکین میسر کرتی ہے۔ امسال بھی ”وجد کی رات“ میں حاضری سے ایمان تازہ ہو گیا۔ اللہ تعالیٰ کی توفیق سے حضور کے ذکر کی محفلیں عمر بھر سجاتے رہیں گے۔ ملتان سمیت جنوبی پنجاب میں ”وجد کی رات“ ایسی نورانی سرگرمیاں ہماری پہچان ہیں۔ ”خبریں“ کی تقریبات کی کامیابی پر فخر محسوس کرتا ہوں۔ تین سال قبل لاہور میں بھی ”وجد کی رات“ کی روایت قائم کی۔ آئندہ بھی یہ سعادت حاصل کرتے رہیں گے۔ انچارج کلچرل اینڈ سپورٹس ونگ محمد اکمل وینس اور ان کی پوری ٹیم کو مبارکباد دیتا ہوں۔
