راولپنڈی (بیورو رپورٹ) آرمی چیف جنرل قمر جاوید باجوہ نے لائن آف کنٹرول پر اگلے مورچوں کا دورہ کیا اور وطن کے دفاع کیلئے سرحدوں کی حفاظت کرنے والے افسروں اور جوانوں سے ملاقاتیں کیں۔ کور کمانڈر راولپنڈی لیفٹیننٹ جنرل ملک ظفر اقبال بھی آرمی چیف کے ہمراہ تھے۔ آرمی چیف نے افسروں اور جوانوں کے بلند مورال کو سراہا۔ اس سے پہلے جنرل قمر جاوید باجوہ نے ٹین کور ہیڈ کوارٹرز کا دورہ کیا جہاں انہیں کنٹرول لائن کی صورتحال پر بریفنگ دی گئی۔پاک فوج کے شعبہ تعلقات عامہ (آئی ایس پی آر) کے مطابق آرمی چیف نے دشمن کو دو ٹوک پیغام دیتے ہوئے کہا ہے کہ بھارت کا جارحانہ انداز دنیا کی کشمیر میں جاری ظلم و ستم سے توجہ ہٹانے کی کوشش ہے۔ بھارت نے اب سیز فائر معاہدے کی خلاف ورزی کی تو اسے پوری طاقت سے جواب دیا جائے گا۔ سپہ سالار نے جوانوں کو حکم دیا کہ اب دشمن ایک بھی گولی چلائے تو پوری طاقت سے جواب دیا جائے۔ جمعہ کو پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ نے 10کور ہیڈ کوارٹر راولپنڈی اور لائن آف کنٹرول پر اگلے مورچوں کا دورہ کیا اور اپنا دن 10کور کے جوانوں کے ساتھ گزارا۔ آئی ایس پی آر کے مطابق چیف آف آرمی سٹاف کو 10کور راولپنڈی کے دورہ کے موقع پر لائن آف کنٹرول پر بھارتی فوج کی طرف سے سیز فائر معائدے کی خلاف ورزیوں پر بریفنگ دی گئی۔اس موقع پر آرمی چیف جنرل قمر جاوید باجوہ نے پاک فوج کے دستوں کی پیشہ وارانہ مہارتوں پر اطمینان کا اظہار کیا۔ انہوں نے لائن آف کنٹرول پر بھارتی فائرنگ کا منہ توڑ جواب دینے کا بھی حکم دیا۔ اس موقع پر انہوں نے پاک فوج کے جوانوں کو ہر دم تیار رہنے کی ہدایت کی۔آرمی چیف جنرل قمر جاوید باجوہ نے جوانوں اور افسروں سے خطاب کرتے ہوئے کہا ہے کہ بھارتی اشتعال انگیزی مسئلہ کشمیر سے توجہ ہٹانے کی کوشش ہے،مسئلہ کشمیر کے حل تک خطے میں دیر پا امن قائم نہیں ہوسکتا۔آرمی چیف نے کہا کہ بھارت مسئلہ کشمیر کو کشمیری عوام کی امنگوں کے مطابق حل کرے۔انہوں نے کہاکہ اقوام متحدہ کی قراردادوں کے مطابق بھارت مسئلہ کشمیر کو حل کیے۔10کور راولپنڈی کے کمانڈر لیفٹیننٹ جنرل ملک ظفر اقبال نے 10کور آمد پر آرمی چیف جنرل قمر جاوید باجوہ کا استقبال کیا اور بعد ازاں لائن آف کنٹرول پر اگلے مورچوں کے دورے کو دوران وہ آرمی چیف کے ہمراہ تھے۔
