لاہور (خصوصی رپورٹ) وفاقی وزیر خزانہ اسحاق ڈار کے 2گھریلو ملازمین کے اغوا کا ڈراپ سین ہو گیا۔ چھٹی نہ ملنے پر دونوں نے خود ہی اپنے اغوا کا ڈرامہ رچایا۔ چھٹی گزارنے کے بعد دونوں ملازمین دوبارہ نوکری پر پہنچ گئے۔ باوثوق ذرائع کے مطابق تھانہ قلعہ گجر سنگھ میں چار روز قبل وزیر خزانہ اسحاق ڈار کے منیجر منصور رضوی نے وفاقی وزیر کے گھریلو ملازمین عمران اور حماد کے اغوا کا مقدمہ درج کروایا تھا جس پر پولیس نے دونوں کی بازیابی کیلئے کوششیں شروع کر دیں۔ دوسری طرف حساس ادارے بھی متحرک ہوگئے اور دونوں کی تلاش شروع کر دی۔ گزشتہ روز دونوں ملازمین حماد اور عمران ڈرامائی انداز میں واپس پہنچ گئے۔ پولیس نے تفتیش کی تو پہلے انہوں نے بتایا کہ وہ وفاقی وزیر کے گھر سے نکل کر رکشے میں لنڈا بازار جارہے تھے کہ راستے میں نامعلوم کار سواروں نے انہیں اغوا کر لیا۔ پولیس نے بیان مشکوک ہونے پر روایتی طریقہ سے پوچھ گچھ کی تو دونوں نے سچ اگل دیا۔ دونوں ملازمین نے بتایا وہ اپنے گھر لیہ جانا چاہتے تھے لیکن چھٹی نہیں مل رہی تھی جس پر انہوں نے اپنے اغوا کا ڈرامہ رچایا اور 4روز چھٹی گزارنے کے بعد واپس آ گئے۔ پولیس نے حماد اور عمران کو حراست میں لے لیا۔
اغوا کا ڈرامہ
