اسلام آباد (صباح نیوز)وزیراعظم نوازشریف نے ترکی کے شہر استنبول کے نائٹ کلب میں دہشتگرد وں کے حملے کی شدید الفاظ میں مذمت کرتے ہوئے قیمتی جانوں کے ضیاع پر گہرے دکھ اور افسوس کا اظہار بھی کیااور کہا ہے کہ دہشت گردی ہماری مشترکہ دشمن ہے اور پوری دنیا کو مل کر اس کے خلاف لڑنا ہوگا۔وزیراعظم نواز شریف نے ترکی کے شہر استنبول میں ہونے والے دہشت گردی کے واقعہ کی پرزور مذمت کرتے ہوئے انسانی جانوں کے ضیاع پر دکھ کا اظہار کیا ہے۔ ان کا کہنا تھا کہ دکھ اور مشکل کی اس گھڑی میں پوری پاکستانی قوم اور حکومت ترک حکومت اور وہاں کے عوام کے ساتھ کھڑی ہے، فائرنگ کے واقعہ میں مرنے والوں کے لواحقین سے اظہار یکجہتی کرتے ہیں جب کہ زخمیوں کی جلد صحتیابی کے لئے دعا گو ہیں۔وزیراعظم کا کہنا تھا کہ دہشت گردی سے پاکستان کو بھی بے ناہ جانی و مالی نقصان اٹھانا پڑا،تاہم پاکستان دہشتگردی کے خاتمے کیلئے اقدامات جاری رکھے گا۔ دہشت گردی ہماری مشترکہ دشمن ہے اور اس ناسور سے نجات حاصل کرنے کے لئے پوری دنیا کو مل کر لڑنا ہوگا۔
