لاہور(نیوزایجنسیاں)اسلام آباد یونائیٹڈ کے معطل ہونے والے کرکٹر خالد لطیف نے کہا ہے کہ وہ بے قصور ہیں اور اللہ گواہ ہے کہ انہوں نے کچھ غلط نہیں کیا۔ خالد لطیف گھر سے نکلے تو باہر موجود صحافیوں نے ان سے سوالات کی بھرمار کردی جس پر وہ بار بار ’نو کمنٹس‘ کہتے رہے لیکن مسلسل سوالات کیے جانے پر انہوں نے مختصراً اتنا کہا کہ اللہ جانتا ہے کہ میں نے کچھ غلط نہیں کیا اور میں بے قصور ہوں۔اس سے قبل شرجیل خان کے والد سہیل خان نے بھی اپنے بیٹے کے بارے میں اسی طرح کے الفاظ کہے تھے، 27 سالہ بیٹسمین کے والد نے کہا تھا کہ شرجیل یو اے ای میں کچھ افراد سے ملے لیکن انہیں ان کے بارے میں معلوم نہیں تھا کہ ان کا تعلق کسی مافیا سے ہے۔واضح رہے کہ پی سی بی نے اینٹی کرپشن کوڈ کی مبینہ خلاف ورزی پر پی ایس ایل سے معطل ہونے والے شرجیل خان اور خالد لطیف کو تحقیقات مکمل ہونے تک معطل کردیا تھا۔ اور ایونٹ سے باہر کرتے ہوئے وطن واپس بھجوا دیا تھا۔ ذرائع کے مطابق کھلاڑیوں پر تاحیات پابندی لگ سکتی ہے۔
