لاہور (چودھری اسلم سے) مال روڈ بم دھماکہ میں ہلاک ہونے والے والدین کے اکلوتے بیٹے بلال کو سینکڑوں سوگواروں کی آہوں‘ سسکیوں میں سپردخاک کردیا گیا۔ ایک ماہ بعد دولہا بننے والا نوجوان منوں مٹی تلے جا سویا۔ متوفی کا جنازہ اٹھنے پر کہرام برپا ہو گیا۔ ماں بیٹے کی شادی کیلئے لایا جانے والا جوڑا چوم چوم کر اسے پکارتی رہی۔ اس موقع پر موجود ہر آنکھ اشکبار ہوگئی۔ تفصیل کے مطابق جوہر ٹاﺅن پی آئی اے سوسائٹی کا رہائشی 24سالہ بلال دو بہنوں کا اکلوتا بھائی اور بوڑھے والدین کا واحد سہارا تھا۔ وقوعہ کے روز بلال اپنی شادی کے کارڈ رشتہ داروں کو دینے کیلئے جا رہا تھا کہ مال روڈ سے گزرتے ہوئے بم دھماکے میں ہلاک ہوگیا۔ موت کی اطلاع گھر پہنچتے ہی ماں ہوش و حواس کھو بیٹھی۔ بہنیں جوان بھائی کی موت کا سن کر سکتے میں آ گئیں۔ گزشتہ روز بلال کی نعش پوسٹمارٹم کے بعد ورثاءکے حوالے کر دی گئی جسے سینکڑوں سوگواروں کی آہوں‘ سسکیوں میں سپردخاک کردیا گیا۔ متوفی کا جنازہ اٹھنے پر علاقے میں کہرام برپا ہو گیا۔ ماں اپنے لال کا جوڑا بار بار چومتی اور اسے گلے لگا کر پکارتی رہی۔ اس موقع پر موجود ہر آنکھ اشکبار ہو گئی۔ متوفی کے رشتہ داروں اور اہل محلہ نے ”نیااخبار“ سے گفتگو کرتے ہوئے کہا کہ تاحال کوئی بھی حکومتی نمائندہ متاثرہ خاندان سے اظہار ہمدردی کیلئے نہیں آیا۔
