سیالکوٹ کے ظفروال سیکٹر پر بھارتی فورسز کی بلااشتعال فائرنگ اور گولہ باری کے بعد پاکستانی فوج نے بھرپور جوابی کارروائی کی، جس میں بھارتی فوجی تنصیبات کو نشانہ بنایا گیا۔ یہ کارروائی بھارتی فورسز کی جانب سے ورکنگ باؤنڈری پر سیز فائر کی خلاف ورزی کے ردعمل میں کی گئی۔ پاکستانی فورسز نے بھارتی کواڈکوپٹر ڈرون کی دراندازی کی کوشش کو ناکام بنایا اور اس کے بعد ہونے والی فائرنگ کا مؤثر جواب دیا۔ مقامی ذرائع کے مطابق بھارتی فورسز نے پاکستانی سرحدی علاقوں کے دیہاتوں اور چوکیوں کو نشانہ بنایا، جس کے نتیجے میں پاکستانی چناب رینجرز نے بھارتی جارحیت کا منہ توڑ جواب دیا۔
اس دوران، بھارتی میڈیا نے پاکستان کے خلاف جھوٹ پر مبنی رپورٹنگ اور غلط خبروں پر سخت ردعمل ظاہر کیا ہے۔ متعدد بھارتی صحافیوں نے اپنے ہی میڈیا اداروں کی پاکستان کے خلاف جھوٹ پر مبنی رپورٹنگ پر تنقید کی ہے اور میڈیا کو ذمہ داری کا مظاہرہ کرنے کی ضرورت پر زور دیا ہے۔ ایک سینئر صحافی نے سوشل میڈیا پر تبصرہ کرتے ہوئے کہا: "سوشل میڈیا پر جنگی ماحول پیدا کرنے والے نام نہاد جنگجوؤں کو واپس اپنے بنکروں میں جانا چاہیے۔”
اس پس منظر میں، امریکی ترجمان ٹیمی بروس نے بھارتی دعوؤں پر انٹیلیجنس شواہد کی تصدیق سے انکار کیا ہے اور کہا کہ دونوں ممالک سے رابطے جاری ہیں لیکن ذمہ دارانہ حل چاہتے ہیں۔ انہوں نے مزید کہا کہ ہم چاہتے ہیں کہ ذمہ داران کو انصاف کے کٹہرے میں لایا جائے اور ہم اس مقصد کے لیے کسی بھی کوشش کی حمایت کرتے ہیں۔
